81
Mbouŋ to lupuuŋ tiina to suŋuuŋ
Mbouŋ to Asap
1 Lolomim poia pa Maaron, ve ambou pani. Pa iit taghamgham tapiriin ila tooni.
Tintinmim pa Maaron to Yakop, ve ayoor eeza toman aliŋamim tiina.
2 Ait mbouŋ ve ambou.
Ve atok kakaap, ve arav gita ve gabua siriv, leso agham mbouŋ paghuuna.
3 Saawe to kaiyo izaa paaghu, ve saawe to kaiyo dodoliiŋ, ene saawe to talup ghiit ve tasuŋ.
Tauvene aviv tavuur *Saawe tau yes Israela tipaburigin suŋuuŋ toozi, tiviviv mekmek zitamoot zoŋazi imin iit taviv tavuur.
ve apaburigin suŋuuŋ.
4 Pa ŋgar tauvene, ene itaghon tutuuŋ tau Maaron ighuru pa iit Israela alok wa.
Maaron to Yakop ighe tataghon tutuuŋ tane.
5 Saawe tau i igham malmal pa yes Isipa,
i isaav pa iit Israela to tataghon tutuuŋ tane, leso itiŋa tavalupu ghiit tamin eemon.
Yau nalooŋ ŋeer ee aliiŋa ilam.
Ta muuŋ ve ilam, nalooŋ aliiŋa tauvene mako. Isaav ighe:
6 “Yau ta nazugh yauyauŋ pataŋani izi pa avaramim,
ve nagham gham amariau pa badooŋ gabua. *Igham 1:11, 6:6; Mt 11:28
7 Muuŋ, yam aleep ila pataŋani tiina loolo, ve ataŋ rarai ghau to nauul gham.
Ve yau nalooŋ taŋiiz tsiam, ve napas gham avot pa pataŋani tsiam.
Yau nayooŋ ila taitai gabgabuai tau lalaav lutluutu ivotvot pani na, ve nayol aliŋamim.
Ve yau natoov gham izi yaa ziige to nugh Meriba. *Igham 17:7
8 Yam tamtamon tsiau, alooŋ saveeŋ ariaaŋa tau naghe nasavia payam ne.
Yam Israela, aghur taliŋamim pa aliŋag tane ve ataghoni, o poi!
9 Maaron ite paam ileep ila sosomim ve abees pani sov. Yau mon, o abees payau.
Tauvene aput aghemim pa maaron karomŋa to nugh siriv sov. *Igham 20:3
10 Pa yau Yoova ta Maaron tsiam. Yau ta nagham gham apul Isip.
Yau nasaav payam naghe: Akaak avomim tiina. Leso napavoni pa gabua popoia.
11 Eemon tamtamon tsiau tilooŋ aliŋag mako.
Yes Israela timbuzir payau. *Igham 32:1+
12 Ŋgar toozi iyaryaaŋ kat. Lolozi pa loŋaaŋ saveeŋ mako.
Tauta napul zi titaghon tauzi ŋgar toozi. *Mbaŋ 7:42; Ro 1:24
13 Yau napasawal naghe le tamtamon tsiau tilooŋ aliŋag, ve titaghon eez tsiau!
14 Leso rekia mon ve koiazŋa tiyamaan nimag, ve natatan zi.
15 Yes tau tighurghur koi payau na, pale tilam titap izi naghog toman roiŋ tiina.
Ve atuya tau pale izaa toozi, ene aat ighengheen tauvene taghon taghon gha ila.
16 Eemon yam Israela, pale napan gham pa aniiŋ popoia,
ve napaghun gham pa tok to su suuru le isooŋ gham.”
*81:3: Saawe tau yes Israela tipaburigin suŋuuŋ toozi, tiviviv mekmek zitamoot zoŋazi imin iit taviv tavuur.
*81:6: Igham 1:11, 6:6; Mt 11:28