106
Yes Israela tizorzoor Maaron aliiŋa. Eemon i ighamgham ŋgar popoia pazi
1 Aleluia! Tapait Yoova pa poia tooni toman loloon poia. Pasaa, i poia kat.
I loolo isaghav tamtamon tooni, ve iuluul zi irau saawe.
2 Sei irau isavia uraat tintiina tau Yoova ighamgham zi na?
Ve sei irau ipaiti pa ŋgar popoia naol tau i ighamgham zi na ve ipasov zi? Eta irao mako.
3 Yes tau tighagharaat pataŋani to tamtamon ve titaghon ŋgar duduuŋa irau saawe,
ene pale lolozi poia kat, ve poia to Maaron izazaa toozi.
4-5 O Yoova, saawe tau ugham poghania tamtamon tsio ve ugham mulin zi pa pataŋani toozi, na matam iŋgal ghau ve uul ghau paam.
Maaron, yo taum usiigh yes Israela timin lem motot. Yes tamtamon tsio. Tauvene naghe taug naghit zi tileep poi.
Leso yeŋa nilup ghei toman tintiinmai ve nipait ghom.
6 Yei nisosor wa. Nisosor pa eez tsio, raraate imin timbumaiŋa.
Yei nighamgham ŋgar saghati. Ŋgar tsiei iduduuŋ ila yo matam mako.
7 Saawe tau timbumaiŋa tileep izi Isip na, yo ugham gabua ŋgeretazi tintiina ivotvot.
Eemon tighilaal zi mako.
Saawe naol, yo utotoi poia tsio pazi, itaghon ŋgar tsio tau lolom isaghav tamtamon tsio ve uluul zi.
Eemon yes tigham ŋgar pa uleeŋ tsio tana mako.
Saawe tau tila tivot Te Siŋsiŋai, tizoor aliŋam, ve tighur murizi payo. *Igham 14:11+
8 Eemon Yoova, i eeza tiina pa tapiri ve poia tooni, ve ighe igham zi tighilaal katin tapiri.
Tauta igham mulin zi.
9 Saawe tana, i isaav ariaaŋ pa Te Siŋsiŋai le ivalagh ghi imin ru. Sirivu ila pa tapir, sirivu ila pa ŋas, ve taan mamaasa ivot.
Ra igherev yes Israela, ve tilaagh ila maghat tau igheen izila siiŋa kat na, gha tila tivool pa ziige ite. *Igham 14:21+
10 Tauvene i igham mulin zi ila koiazŋa nimazi.
I iyooz pazi, ve iuul zi. Tauta yes tau tighur koi pazi na irau tivaghamun zi mako.
11 Saawe tana, te itav koiazŋa le tisov timataar.
Eta ileep muul mako.
12 Maaron igham tauvene, tauta yes Israela tighur ila saveeŋ mbuaaŋ tooni,
ve timbou mbouŋ to tipaiti. *Igham 15:1+
13 Eemon rekia mon ve lolozi iveegh pa gabua ŋgeretazi tau i igham zi na.
Yes tisaŋan Maaron to ivotia ŋgar tooni pazi ne mako.
Tigham gabua itaghon tauzi ŋgar toozi.
14 Saawe tau tilepleep izi nugh ŋginaaŋa, luazi itaŋ tighe le tighan aniiŋ popoia imin tau muuŋ tighanghani izi Isip.
Tauvene titoov Yoova tapiri izi nugh ŋginaaŋa. *Igham 16:3; 1Kor 10:6, 9
15 Ve Maaron ilooŋ taŋiiz toozi ve igham lezi gabua tau tighason pani na.
Eemon i igham moroghooŋ saghati ivot le ivaghamun zi paam.
16 Saawe tau tilepleep ila niazi to lepoogh izi nugh ŋginaaŋa,
tamtamon toozi siriv tiburig ve tiŋooŋ pa Mose yesuru toogha Aron tau Yoova besooŋa tooni patabuyaaŋ na. Tighe tigham uraat raraate imin yesuru, o poia. *Nam 16:1+
17 Tauvene taan ikaak, ve Datan gha Abiram tomania ziiri waaro toozi tisov titaptap tizila,
ve taan aavo ila ivool muul.
18 Ra yav ivot, ve ighan tamtamon siriv tau titaghon zi pa ŋgar toozi tawe.
Zeran sasaghati tawe, yav yaama ighaniir zi le tisov.
19 Saawe tau yes Israela tilepleep izi loloz Sinai puughu, tigham gol ve tigharaat makau naatu tamoot anunu,
ve tiput aghezi pani ve tipakuru. *Igham 32:4
20 Tauvene Maaron toozi tau eeza tiina pa tapiri ve poia tooni na, yes tighur murizi pani.
Ve tighur gabua tau ighanghan kikiliiŋ na anunu igham Maaron niia. *Ro 1:23
21 Onoon kat, Maaron toozi tau igham uraat tintiina ivotvot izi Isip ve igham mulin zi na, lolozi iveghaini kat.
22 I igham gabua ŋgeretazi tintiina izi taan to yes Isipa, *Saveeŋ tau tiboode na, isaav ighe ‘taan to yes Hama.’ Hama, ene Isipa ezazi ite.
ve igham uraat tintiina izi Te Siŋsiŋai ziige paam.
Uraat tawe, tamtamon tighit zi le roiŋ tiina igham zi.
Eemon yes Israela tigham ŋgar pa gabua tana mako.
23 Tauvene Maaron ighe ivaghamun zi le tisov.
Eemon besooŋa tooni Mose tau i tauu isiigho na,
iyooz ila Maaron naagho imin sigheu pa yes Israela.
Tauta itatan Maaron aatyavyav tooni, ve Maaron ivaghamunia tamtamon tooni mako. *Igham 32:11-14, 32+
24 Saawe tau yes Israela tigharau taan Kanaan, yes tirere pa taan poia tau Yoova ighe igham pazi na.
Pasaa, tighur ila saveeŋ mbuaaŋ tooni mako.
25 Yes lolozi pa loŋaaŋ Yoova aliiŋa mako.
Tilepleep iloŋ ila balbaal toozi, ve lolozi ŋurŋuria pa Maaron.
26-27 Tauta Yoova niima izaa, ve imbu saveeŋ ariaaŋ ighe:
I pale irav zi tisov timataar izi nugh ŋginaaŋa,
ve ivarewai paaghu toozi gha timbiriis tirau nugh nugh.
28 Murei, ra yes Israela tila tivot loloz Peor. Saawe tana, tipaak yes tau tibesbees pa maaron karom Baal.
Pasaa, aniiŋ tau zeran tawe tigham pa maaron maate toozi tawe, yes Israela tighani paam. *Nam 25:1+
29 Ŋgar tau tighamu na, ipas Yoova aate, le aate yavyav kat.
Tauta igham moroghooŋ saghati ivot pazi.
30 Tauvene Pineas iburig ve irav tamtamon ru tau tizoor Maaron aliiŋa na gha timatmaat.
Ra moroghooŋ saghati tawe isov. *Nam 25:1-13
31 Ŋgar tooni tawe, tauta Maaron ighita ighe i ŋeer duduuŋa.
Ve Maaron pale maata iŋgalŋgali tauvene taghon taghon gha ila.
32 Yes Israela tila tivot yaa Meriba, ve tigham Yoova aate yavyav muul.
Saawe tana, tigham pataŋani pa Mose paam.
33 Pasaa, yes tizoora kat le tipas aate.
Tauta igham ŋgar poi mako, ve isik aliiŋa isosor. *Nam 20:1+
34 Saawe tau tiloŋ tila taan Kanaan, Yoova isaav ariaaŋ pazi ighe tirav yes tau tileep ta sewe na, tisov timataar.
Eemon titaghon Yoova aliiŋa mako.
35 Yesŋa Kanaana tiluplup zi, ve titaghon ŋgar toozi.
36 Yes tibesbees pa maaron karomŋa toozi,
ve ŋgar tawe imin liis pazi.
37 Ve tigham tauzi natuzŋa zitamoot ve zilivaa, gha tirav zi timaat, imin watooŋrau pa avuvu sasaghati.
38 Onoon kat, natuzŋa zitamoot ve zilivaa tau lezi sosor eta mako na,
ene yes tirav zi timaat imin watooŋrau pa maaron karomŋa to yes Kanaana.
Siŋ toozi tau imaliŋ na, ivaghamunia taan toozi le isaghat ila Maaron maata. *Lo 18:10
39 Ŋgar tau tighamu na, igham zi tisaghat kat ila Yoova maata.
Yes tighur murizi pani, imin livaa tau ipul azaawa ve ila ighurghur boog.
40 Ŋgar tau tamtamon tooni Israela tighamu na, ene igham Yoova aate yavyav kat,
ve loolo pazi mako le mako kat.
41 Tauta ipul zi tila nugh nugh nimazi.
Yes tileep ila koiazŋa sambazi ve anazi tiŋgin zi.
42 Koiazŋa tawe tighur pataŋani naol pazi,
ve titatan zi pa tapirizi, ve tigham zi timin besooŋa toozi.
43 Pai katini, Yoova ipas yes Israela pa pataŋani toozi.
Eemon tighilaal uleeŋ tooni mako, ve tizorzoor aliiŋa, ve titaghon tauzi ŋgar toozi.
Ŋgar toozi saghati tawe igham zi tivaghamgham.
44 Eemon Yoova ighita pataŋani toozi, ve ilooŋ taŋiiz toozi.
45-46 Pasaa, maata iŋgal saveeŋ tau imbua tomania timbuzŋa na, ve loolo isaghav tamtamon tooni ve iuluul zi.
Tauta itatan aatyavyav tooni,
ve igham yes tau tikiskis yes Israela na lolozi isaghatin zi ve tigham poghani zi.
47 O Yoova, Maaron tsiei, ugham mulin ghei ila koiamaiŋa nimazi!
Ughita. Aazne, nileep irau nugh nugh.
Uyau ghei, ve ulup ghei ila taan tsiei muul.
Leso lolomai poia payo, ve nipait ezam patabuyaaŋ.
Ve matamai iŋgal yo ezam ve tapirim tiina irau saawe.
48 Iit tapait Yoova pa poia tooni. I Maaron to iit Israela.
Tapaiti ta aazne, ve taghon taghon gha ila!
Ve eval tiina aat tisaav tighe: “Onoon kat.”
Aleluia! Tapait Yoova!
*106:14: Igham 16:3; 1Kor 10:6, 9
*106:16: Nam 16:1+
*106:22: Saveeŋ tau tiboode na, isaav ighe ‘taan to yes Hama.’ Hama, ene Isipa ezazi ite.
*106:28: Nam 25:1+
*106:30: Nam 25:1-13
*106:33: Nam 20:1+
*106:38: Lo 18:10