12
Tapul tauun tamin Maaron le
1 Tauvene yam toŋvetaz, aghita. Maaron loolo isaghatin ghiit ve igham mulin ghiit wa. Puughu tane ta naghe napariaaŋ gham to aghur anoŋamim ila pa Maaron imin watooŋrau maata yaryaare. Watooŋrau tauvene, ene patabuyaaŋ ila i maata, ve ighamu loolo poia kat. Ighe tabees pa Maaron itaghon eez tauvene, ene iduduuŋ. *Yo 4:24; Ro 6:13; 1Pe 2:5
2 Yes tau titaghon taan ŋgara na, yam apaak zi pa ŋgar toozi muul sov. Apul Maaron itoor ŋgar tsiam ve gabuamim imin paaghu kat. Leso aghilaal ŋgar tau Maaron loolo pani na. Ene ŋgar tau poia kat, ve iduduuŋ mon, ve ighamu loolo poia. *Ep 4:23, 5:17; 1Yo 2:15+
Tagabiiz poghania tauun, ve iit eŋaeŋa tagham uraat tau Maaron ighuru ila nimaan na
3 Maaron ighur ghau namin uraata tooni itaghon tauu loolo ve poia tooni. Tauvene yau naghe napariaaŋ gham asov tauvene: Agham ŋgar sorok aghe yam popoiamim aliiv zeetmimŋa sov. Yam aat agabiiz poghania taumim: Maaron igham gham aghur ila ariaaŋ ve ataghon katin ghuruuŋ ila tsiam ŋgara, ma mako? *2Kor 13:5; Pil 2:3
4 Iit tamtamon anoŋaan siriv siriv katini: Agheen, nimaan, avoon, mataan, ve gabua siriv paam. Ve anoŋaan siriv siriv tana, lezi uraat ite ite. *1Kor 12:12+; Ep 4:16
5 Iit tau tapaak Krisi ne, tauvene paam. Iit tamin Krisi niima, aaghe, ve anooŋa siriv siriv paam tau tilup zi timin eemon. *1Kor 12:12-27; Ep 4:4, 25
6 Maaron irei uraat ve tapiri maata maata le irau ghiit, itaghon tauu loolo ve poia tooni. Tauvene iit aat tagham uraat toit toit. Isaav ighe Maaron ighur ŋeer eta imin propet, ŋeer tana aat ivotia Maaron aliiŋa pa tamtamon itaghon ghuruuŋ ila tooni. *Eez ite to tatoor saveeŋ ziiri tane, ene vene: “ŋeer tana aat ivotia Maaron aliiŋa pa tamtamon itaghon saveeŋ tau iit taghur ila na.” *1Kor 12:4+; Ep 4:11+; 1Pe 4:10+
7 Isaav ighe Maaron igham ŋeer eta le ŋgar pa uraat to uleeŋ tamtamon, i aat itaghon duduŋai ŋgar to uleeŋ. Ve isaav ighe eta le uraat to ipaduduuŋ tamtamon pa Maaron aliiŋa, i aat ipaduduuŋ zi kat. 8 Ve isaav ighe eta le ŋgar pa uraat to palotiiŋ tamtamon, i aat ipalot zi. Ve ighe eta le uraat to reiŋ gabua pa yes mbolaaŋa, i aat iuul zi kat, ve irei gabua tooni toman loolo poia. Isaav ighe eta le ŋgar pa ŋginiiŋ uraat, i aat maata izaa pa uraat tooni, ve ighamu kat. Ve ighe eta le ŋgar pa uraat to uleeŋ yes tau pataŋani igham zi na, i aat iuul zi toman loolo poia. *2Kor 9:6-13; 1Pe 5:2
Tutuuŋ siriv tau iŋarui tamtamon to Krisi
9 Isaav ighe yam aghur lolomim pa tamtamon, na agham karom sov. Aghur lolomim pazi kat, ve atotoi anooŋa ivot. Yam aat aghur koi pa ŋgar saghati ve aleep soghan pani. Ve ŋgar poia, o akisi tuŋia. *2Kor 6:6; 1Tes 5:21+; 1Pe 1:22
10 Yam amin toŋvetaz to Krisi wa. Tauvene lolomim pa taumim kat ve avaghamu poghani gham. Agham ŋgar pa taumim ezamim sov. Apait zeetmimŋa pa ŋgar popoia tau yes tighamghamu na. *Ga 5:26; Pil 2:3; Hib 13:1
11 Besooŋ tau agham pa Ŋeer Tiina, na arogroog matamim sov. Apul Avuvu Patabuyaaŋ ipaburigin gham, leso matamim izaa pa uraat tsiam, ve aghamu toman lolomim. *1Tes 5:19
12 Yam awatagh: Murei, Maaron pale igham mulin ghiit ve taleep poia. Matamim iŋgal gabua tane ve aghur matamim pani irau saawe. Leso igham gham lolomim poia. Ve ayooz ariaaŋ pa badooŋ pataŋani, ve asuŋ irau saawe. Apul suŋuuŋ sov. *Ro 5:2, 15:13; Kol 4:2; 1Tes 5:16+; Yems 1:4
13 Isaav ighe mbolaaŋ igham Maaron tamtamon tooni, na auul zi. Ve isaav ighe loomba tilat, na agham zi toman lolomim poia, ve aŋgin poghani zi. *2Kor 8:7; Hib 13:2; 1Pe 4:9
14 Isaav ighe tamtamon tighur pataŋani payam pasaa, ataghon Krisi, na yam aghur saghati izaa toozi sov. Asuŋ Maaron to igham poghani zi. *Mt 5:44+; 1Kor 4:12; 1Pe 3:9
15 Yes tau tintinizi na, yam ala tintinmim tomani zi. Ve yes tau lezi pataŋani ve titaŋ na, yam ala ataŋ tomani zi. 16 Yam asov alup lolomim ve ŋgar tsiam imin eemon. Apakur taumim, ve apaak yes tau ezazi tintiina mon na sov. Yam aat alup gham tomania yes tau lezi ezazi mako na. Ve apait taumim pa ŋgar tsiam sov. †Eez ite to tatoor saveeŋ ziiri tane, ene vene: Azuari gham pa uraat tintiina to agham ezamim pani na sov. Uraat tau tamtamon tighita tighe uraat sorok na, yam irau aghamu toman lolomim poia.” *Mbo 131:1+; Ro 15:5+; 2Kor 13:11; Pil 2:2
17 Isaav ighe tamtamon tigham ŋgar saghati payam, na ayatu pa ŋgar saghati sov. Atoova to ataghon ŋgar tau iduduuŋ mon ila eval tiina matazi. *Mt 5:39; 2Kor 8:21; 1Tes 5:15
18 Ve atoova to alup gham tomania tamtamon tisov amin eemon. Tauvene saa ŋgar tau yam irau aghamu to ilup gham na, aghamu. *Mt 5:9; Ro 14:19; Hib 12:14
19 Yam zeran tsiau, lolog igheen tsiam kat. Nayol saveeŋ tsiau muul. Ŋgar saghati tau tamtamon tigham payam na, ayatu sov. Apuli ila Maaron niima. I tauu pale ighur pataŋani iŋarui zi. Pasaa, Maaron aliiŋa tau tiboode na, isaav ighe:
“Yau leg uraat to naghur atuya pa ŋgar saghati. Taug pale nayatu.” *Lo 32:35; Mbo 94:1; Hib 10:30
20 Tauvene ayat ŋgar saghati sov. Agham poghania koiamimŋa. Pa Maaron aliiŋa ziiri ite isaav tauvene:
“Isaav ighe koiam eta pitoola, ugham le aniiŋ.
Ve ighe murunu, ugham le yaa.
Leso ughamu ighilaal sosor tooni, ve maaya.” *Igham 23:4+; Lp 25:21+; Mt 5:44
21 Tauvene apul ŋgar saghati itatan gham sov. Yam aat atatan ŋgar saghati pa ŋgar poia.
*12:1: Yo 4:24; Ro 6:13; 1Pe 2:5
*12:2: Ep 4:23, 5:17; 1Yo 2:15+
*12:5: 1Kor 12:12-27; Ep 4:4, 25
*12:6: Eez ite to tatoor saveeŋ ziiri tane, ene vene: “ŋeer tana aat ivotia Maaron aliiŋa pa tamtamon itaghon saveeŋ tau iit taghur ila na.”
*12:6: 1Kor 12:4+; Ep 4:11+; 1Pe 4:10+
*12:9: 2Kor 6:6; 1Tes 5:21+; 1Pe 1:22
*12:10: Ga 5:26; Pil 2:3; Hib 13:1
*12:12: Ro 5:2, 15:13; Kol 4:2; 1Tes 5:16+; Yems 1:4
*12:13: 2Kor 8:7; Hib 13:2; 1Pe 4:9
*12:14: Mt 5:44+; 1Kor 4:12; 1Pe 3:9
†12:16: Eez ite to tatoor saveeŋ ziiri tane, ene vene: Azuari gham pa uraat tintiina to agham ezamim pani na sov. Uraat tau tamtamon tighita tighe uraat sorok na, yam irau aghamu toman lolomim poia.”
*12:16: Mbo 131:1+; Ro 15:5+; 2Kor 13:11; Pil 2:2
*12:17: Mt 5:39; 2Kor 8:21; 1Tes 5:15
*12:18: Mt 5:9; Ro 14:19; Hib 12:14
*12:19: Lo 32:35; Mbo 94:1; Hib 10:30
*12:20: Igham 23:4+; Lp 25:21+; Mt 5:44