Rau Tau Paulus Iboode Pa Titus
Taitus—Titus
1
Paulus isavia uraat tooni
Yau Paulus nabood rau tane. Yau besooŋa to Maaron ve mbaŋooŋa to Yesu Krisi. Yau leg uraat to nauul yes tau Maaron isiigh zi timin i le na. Leso tighur ila to Krisi ariaaŋ, ve tiwatagh katin saveeŋ onoon tau ipaghazoŋai ghiit pa eez to Maaron, ve tighur matazi pa lepoogh to taleep mataan yaryaare tomania Maaron le alok. Lepoogh tawe, Maaron imbu saveeŋ pani muuŋ geeg, saawe tau gabua eta ivot soone. Ve i irau igham karom mako. Saveeŋ tooni isov, ene onoon mon. * 2Tim 1:9
Maaron tau Uleeŋa toit na, ighe ipaghazoŋai tamtamon pa saveeŋ tooni. Tauvene indeeŋ saawe tau i tauu ighuru na, ighur uraat ila nimag to navotia aliiŋa pazi. * Ro 1:5; Ga 1:1; 1Tim 1:11
O Titus, nabood rau tane ilat payo pasaa, ghuruuŋ ila toit ilup ghiit tamin eemon, ve naghit ghom utaghon duduŋai ŋgar tsiau imin taug natug.
Poia to Tamaan Maaron ve Uleeŋa toit Yesu Krisi izaa tsio, ve tiŋgin ghom uleep poia toman lolom luuma. Onoon.
Paulus ighe Titus ighur ŋginiiŋa popoia izi sisi Krit
(1Tim 3:2-7)
Yau napul ghom uleep izi sisi Krit, leso uparwai uraat siriv tau napasov zi soone na, ve ughur ŋginiiŋa tirau nugh eŋaeŋa tau tamtamon to Krisi tileep pani, itaghon aliŋag tau muuŋ nasavia payo na. * Mbaŋ 14:23; 2Tim 2:2
Ughur tamtamon tauvene: Laghooŋ toozi isov iduduuŋ mon ila tamtamon matazi, leso tiyau avozi pazi sov. Ve matazi kisin tauzi azuwazŋa mon. Ve natuzŋa tighur ila to Yesu Krisi, ve tiŋgin tauzi poi. Tigham taliiŋzizi mako, ve tizoor saveeŋ mako. Leso varuzi poia. Tamtamon tau imuuŋ pa uraat to ŋginiiŋ lupuuŋ to Krisi na, Maaron tauu ighur uraat tana ila niima. Tauvene laghooŋ tooni aat iduduuŋ mon ila tamtamon matazi. Leso tiyau avozi pani sov. Ve irau ipakur tauu ve ivelegh zeetŋa siriv mako, ve aate yavyav rekrekia mako. Ve irau ighun le isaghat ne mako. Ve aate ipazaagha pa malmal, ve ŋgar tooni iyaryaaŋ pa yauŋ le maet ma gabua siriv ne mako. * 1Kor 4:1; Ep 5:18; 1Pe 5:2
I aat igham yes loomba ve iŋgin zi poi, ve loolo pa ŋgar poia. Ve irau loolo ipazaagha rekrekia mako. I aat aate imaat ve igham ŋgar poi, o igham gabua. Ve itaghon ŋgar duduuŋa ve ŋgar patabuyaaŋ mon, ve iŋgin tauu poi. Saveeŋ to Maaron tau tapaduduuŋ tamtamon pani na, ene onoon mon. Irau taghur ila kat. Tauvene ŋeer tau imuuŋ pa uraat to ŋginiiŋ lupuuŋ to Krisi na, i aat ikis saveeŋ tana ariaaŋ. Leso i irau ipalot tamtamon, ve ipaghazoŋai zi pa ŋgar tau igham lupuuŋ to Krisi ilaan poia, ve ipaduduuŋ yes tau tizorzoor saveeŋ onoon na, ve igham zi tighilaal sosor toozi. * 2Tim 1:13; Tit 2:1
Ŋgar to zeran karomŋa tau tileep izi sisi Krit
10 Tauvene yo aat ughur tamtamon tauvene timin ŋginiiŋa. Pa tamtamon katini to Krit tizorzoor saveeŋ to Krisi, ve tiyauyau avozi pa saveeŋ soroksorok tau le anooŋa mako na, ve tipapaghau tamtamon pa eez to Maaron. Yes Yuda tau tiyooz ariaaŋ pa tutuuŋ to Mose ve ŋgar to ravuuŋ tamtamon warozi, tauta timuŋmuuŋ pa ŋgar tauvene. 11 Zeran tana, yo irau rekia upoon avozi. Pasaa, tikaukau ŋgar to tamtamon. Ughita. Tigham tamtamon tisov to ruum siriv tipul saveeŋ onoon wa. Zeran tana, mayazi mako. Tipamir tauzi tighe yes tipaghazoŋai tamtamon pa Maaron aliiŋa, ve tilaghlaagh irau ruum ruum, ve tisasavia saveeŋ tau iduduuŋ mako, leso imin eez pazi to titoom ve tiyau lezi maet. * 1Tim 6:5; 2Tim 3:6+; 1Pe 5:2
12 Muuŋ, yes Krita tamtamon toozi ŋgara ee ivotia gabuazi ighe: “Tamtamon to sisi Krit, monmon tighamgham karom. Ve yes sasaghatizi kat timin ŋgavuun sagsag. Yes tapirgomŋa, ve matazi ghanghani.”
13 Saveeŋ tane, ene onoon mon. Tauvene avom iyaryaaŋ pa zeran tana ve uvotia sosor toozi ivot ighazooŋ. Leso tighilaal, ve ghuruuŋ ila toozi iyaryaaŋ itaghon Maaron ŋgar tooni. * 2Tim 4:2
14 Ve tighur taliŋazi pa sisiiŋ soroksorok to yes Yuda, tomania tutuuŋ to yes tau tighur murizi pa saveeŋ onoon to Maaron na muul sov. * 1Tim 1:4, 4:7
15 Yes tau ŋgar toozi ŋgalaaŋa na, ŋgar ma gabua eta to muuri irau igham zi tisaghat ila Maaron maata ne mako. * Ziiri tane, ŋgara tauvene: Yes Yuda lezi tutuuŋ naol tau tisavia ŋgar maata maata tau igham zi tisaghat ila Maaron maata. Yes tigham ŋgar tauvene: Isaav ighe tileep ila taan to yes tau Yuda mako na, ma tikis mateegha eta, ma tighan gabua siriv imin ŋgai, ma oriau ma vene, ene igham zi tisaghat ila Maaron maata. Eemon Paulus isaav ighe: Gabua tauvene, ene gabua to muuri mon. Irau igham ghiit tasaghat ila Maaron maata mako.
Eemon yes tau ŋgar toozi iŋgalaaŋ mako, ve tighur ila mako na, saa ŋgar tau ighe tighamu, ene irau iŋgalaaŋ ila Maaron maata mako. Pasaa, ŋgar toozi tomania lolozi, ene isaghat wa. Tauta yes irau tighilaal sosor toozi mako. * Mk 7:19; Mbaŋ 10:15; Ro 14:14, 20
16 Zeran tauvene tisavsaav sorok ila avozi uuli tighe yes tiwatagh Maaron. Eemon ŋgar tau tighamghamu na, ene ipaghazoŋai zi ighe yes tighur murizi pani wa. Yes irau tigham ŋgar poia eta mako, ve monmon tizorzoor Maaron aliiŋa. Tauta i loolo pazi rigta mako. * 2Tim 3:5; 1Yo 1:6, 2:4

*1:2: 2Tim 1:9

*1:3: Ro 1:5; Ga 1:1; 1Tim 1:11

*1:5: Mbaŋ 14:23; 2Tim 2:2

*1:7: 1Kor 4:1; Ep 5:18; 1Pe 5:2

*1:9: 2Tim 1:13; Tit 2:1

*1:11: 1Tim 6:5; 2Tim 3:6+; 1Pe 5:2

*1:13: 2Tim 4:2

*1:14: 1Tim 1:4, 4:7

*1:15: Ziiri tane, ŋgara tauvene: Yes Yuda lezi tutuuŋ naol tau tisavia ŋgar maata maata tau igham zi tisaghat ila Maaron maata. Yes tigham ŋgar tauvene: Isaav ighe tileep ila taan to yes tau Yuda mako na, ma tikis mateegha eta, ma tighan gabua siriv imin ŋgai, ma oriau ma vene, ene igham zi tisaghat ila Maaron maata. Eemon Paulus isaav ighe: Gabua tauvene, ene gabua to muuri mon. Irau igham ghiit tasaghat ila Maaron maata mako.

*1:15: Mk 7:19; Mbaŋ 10:15; Ro 14:14, 20

*1:16: 2Tim 3:5; 1Yo 1:6, 2:4