1 Ãpẽrã Jesure ẽjõpeorã Ananía wãmetigʉ, cʉ̃ nʉmo Safira Bernabé cʉ̃ weeꞌcaronojõ weeticãrã niwã. Na quẽꞌrã diꞌta duacãrã niwã ãpẽrãpʉre. 2 Na duaꞌque wapare Jesú besecṹúꞌcãrãrẽ oꞌocʉ niwĩ. Nipeꞌtise cʉ̃ niyeru ñeꞌeꞌquere oꞌopeꞌoticʉ niwĩ. Apeyere cʉ̃ basu nʉrõcãꞌcʉ niwĩ. Na tojo weeꞌquere na seꞌsaro pʉarãta cʉ̃ nʉmo meꞌrã masĩcãrã niwã. Pedrore niyerure oꞌogʉ, “Tocãꞌrõta wapayeama”, nisoocʉ niwĩ.

3-4 Te niyerure ñeꞌegʉ̃, Pedro cʉ̃rẽ nicʉ niwĩ:

—Te diꞌta mʉꞌʉ ye diꞌta niwʉ̃. Te mʉꞌʉ duaꞌque wapa mʉꞌʉ ye niyeruta niapã. Mʉꞌʉ noꞌo oꞌosĩꞌrĩrõ oꞌoboapã. Mʉꞌʉ ʉ̃sã diaꞌcʉ̃rẽ nisoogʉ weeweꞌe. Tocãꞌrõta niyeru wapayeama nígʉ̃, Espíritu Santure nisoogʉ weeꞌe. Mʉꞌʉ tojo nisoocã, wãtĩ mʉꞌʉrẽ sãjãyʉꞌrʉapĩ mʉꞌʉ wãcũsepʉre, nicʉ niwĩ Pedro.

5 Tojo nicãta, Ananía bʉrʉqueꞌa, wẽrĩa waꞌacʉ niwĩ. Ãpẽrã tojo waꞌacã tʉꞌorã, ʉpʉtʉ uicãrã niwã.

6 Beꞌro cʉ̃ wẽ́rĩ́ca beꞌro maꞌmapjia ti wiꞌipʉ sãjãa, cʉ̃rẽ yaarã waꞌarã, suꞌti caseri meꞌrã oma, miiwijaacãrã niwã.

7 Iꞌtia hora cʉ̃ wẽ́rĩ́ca beꞌro na nirĩ wiꞌipʉ Safira cʉ̃ nʉmo níꞌco sãjãtaco niwõ tja. Co marãpʉ wẽrĩꞌquere masĩtico niwõ.

8 Ti wiꞌipʉ sãjãtacã, Pedro core sẽrĩtiñaꞌcʉ niwĩ:

—¿Nirõta mʉsãrẽ tocãꞌrõta niyeru wapayeati mʉsã diꞌta duaꞌque wapare? nicʉ niwĩ.

Aꞌtiro ni yʉꞌtico niwõ:

—Tocãꞌrõta niyeru wapayeama, co marãpʉ nisooꞌcaronojõta nico niwõ.

9 Co tojo nicã, Pedro nicʉ niwĩ:

—Mʉsã Espíritu Santu ĩꞌorõ nisooapʉ. Õꞌacʉ̃ ĩꞌatisami ʉ̃sã tojo weecã, ¿ni wãcũmiati? Niꞌcãrõacã mʉꞌʉ marãpʉre yaarã ejaꞌcãrã tojatarã weema. Mʉꞌʉ quẽꞌrã mʉꞌʉ marãpʉ waꞌaꞌcaronojõta wẽrĩgõsaꞌa. Mʉꞌʉ quẽꞌrãrẽ yaarãsama mʉꞌʉ marãpʉre yaaꞌcaro weronojõta, nicʉ niwĩ Pedro.

10 Cʉ̃ tojo nicãta, co quẽꞌrã bʉrʉqueꞌa, wẽrĩa waꞌaco niwõ. Co marãpʉre yaarã ejaꞌcãrã tojatarã, co wẽrĩꞌcopʉre bocaejacãrã niwã. Náta tja core miaa, yaarã waꞌacãrã niwã co marãpʉ mijĩrẽ yaaꞌcaropʉta tja. Na nisooꞌque ye buꞌiri wẽrĩcãrã niwã.

11 Beꞌro Ananía, Safirare tojo waꞌaꞌquere tʉꞌorã, nipeꞌtirã Jesure ẽjõpeorã, ãpẽrã quẽꞌrã ʉpʉtʉ uicãrã niwã.

12-15 Jesure ẽjõpeorã naꞌirõ Salomó wãmetiri tucũpʉ nerẽnuꞌcũcãꞌcãrã niwã. Ãpẽrã Jesure ẽjõpeotirã na meꞌrã baꞌpátiui nicãrã niwã. Narẽ baꞌpátiuimirã, Jesure ẽjõpeorãrẽ añurõ wãcũseticãrã niwã. Ãpẽrã ʉmʉa, numia pãjãrã Jesure ẽjõpeonemocãrã niwã.

Jesú besecṹúꞌcãrã masã waꞌteropʉre peje añuse weeĩꞌocãrã niwã. Dutitirãrẽ yʉꞌrʉo, peje apeyenojõ weenemocãrã niwã. Na tojo weecã ĩꞌarã, pãjãrã dutitirãrẽ na tiro na nerẽrĩ tucũpʉ miacãrã niwã. Masã ti tucũrẽ muꞌmuamʉjãcãrã niwã. Ãpẽrãrẽ tojo weerã maꞌa tiropʉ na cũñase meꞌrã cũucãrã niwã. Pedro na tiro yʉꞌrʉagʉ, narẽ ñapeocã ʉacãrã niwã. Ãpẽrã cʉ̃ ñapeotimicã, “Cʉ̃ wãtĩquecũurõ meꞌrã yʉꞌrʉrãsaꞌa”, ni wãcũcãrã niwã. 16 Apeye macãrĩ Jerusalẽ́ sumuto nise macãrĩcjãrã quẽꞌrã yʉꞌrʉodutirã dutitirãrẽ Jerusalẽ́pʉ miacãrã niwã. Wãtĩa sãjãnoꞌcãrã quẽꞌrãrẽ miacãrã niwã. Jesú besecṹúꞌcãrã nipeꞌtirã masãrẽ yʉꞌrʉocãrã niwã.

17 Na tojo weecã tʉꞌorã, paꞌia wiogʉ, cʉ̃ meꞌrãcjãrã saduceo masã Jesú besecṹúꞌcãrãrẽ ʉorã, pũrõ uacãrã niwã. 18 Tojo weerã Jesú besecṹúꞌcãrãrẽ ñeꞌe, buꞌiri daꞌreri wiꞌipʉ miaa, sõrõcãrã niwã. 19 Wiorã narẽ tojo weemicã, ti ñamita Õꞌacʉ̃rẽ werecoꞌtegʉ ʉꞌmʉsecjʉ̃ na nirĩ tucũpʉ bajuacʉ niwĩ. Bajua, na wiorã biꞌáca sopere pão, aꞌtiro nicʉ niwĩ:

—Wijaaya. 20 Õꞌacʉ̃ wiꞌipʉ masãrẽ wererã waꞌaya. “Mʉsã Jesure ẽjõpeorã, cʉ̃ meꞌrã catinuꞌcũrãsaꞌa”, ni wereya narẽ, nicʉ niwĩ Õꞌacʉ̃rẽ werecoꞌtegʉ.

21 Cʉ̃ tojo níca beꞌro na buꞌiri daꞌreri wiꞌipʉ níꞌcãrã wijaa waꞌacãrã niwã. Ape nʉmʉ boꞌreacã Õꞌacʉ̃rẽ werecoꞌtegʉ níꞌcaronojõta Õꞌacʉ̃ wiꞌipʉ wererã waꞌacãrã niwã. Na topʉ wereri cura paꞌia wiogʉ, tojo nicã cʉ̃ meꞌrãcjãrã nipeꞌtirã judío masã wiorãrẽ nerẽduticãrã niwã. Na nerẽpeꞌtica beꞌro surarare “Narẽ pijirã waꞌaya marĩ ñamicaꞌa biꞌadʉpoꞌcãrãrẽ”, níoꞌocãrã niwã. Na wijaaꞌquere masĩticãrã niwã.

22 Na tojo nicã tʉꞌorã, surara narẽ pijirã waꞌacãrã niwã na biꞌadʉpoca wiꞌipʉ. Ti wiꞌipʉ sãjãa, na níca tucũrẽ pão, ĩꞌacãrã nimiwã. Ne marĩcãrã niwã. Na marĩcã ĩꞌa, narẽ bocati, wiorãpʉre wererã waꞌacãrã niwã. 23 Wiorã tiro eja, “Ne marĩama. Añurõ biꞌáca tucũ nimiapʉ. Ti sope coꞌterã quẽꞌrã añurõ coꞌtemiama. Na tojo weemicã, ʉ̃sã ti sopere pão ĩꞌacã, ne niꞌcʉ̃ marĩami”, ni werecãrã niwã surara wiorãpʉre.

24 Na tojo ni werecã tʉꞌorã, paꞌia wiorã, Õꞌacʉ̃ wiꞌi coꞌterã surara wiogʉ pũrõ wãcũqueꞌticãrã niwã.

—¿Deꞌro waꞌapariba narẽ? nicãrã niwã.

25 Na wijaaꞌquere wãcũrĩ cura niꞌcʉ̃ Õꞌacʉ̃ wiꞌipʉ níꞌcʉ paꞌia wiorã tiropʉ etagʉ, narẽ werecʉ niwĩ:

—Sõꞌonícãrã buꞌiri daꞌreri wiꞌipʉ níꞌcãrã Õꞌacʉ̃ wiꞌipʉ masãrẽ buꞌerã weeama, ni werecʉ niwĩ.

26 Cʉ̃ werecã tʉꞌorã, surara wiogʉ ãpẽrã surara meꞌrã Jesú besecṹúꞌcãrãrẽ ñeꞌerã waꞌacãrã niwã. Narẽ ñeꞌerã, masã ʉ̃sãrẽ ʉ̃tãperi meꞌrã narẽ maꞌírã doqueri nírã, ne mejẽcã weeticãrã niwã. 27 Beꞌro narẽ wiorã decopʉ miaa, topʉ sãjãejacã, paꞌia wiogʉ narẽ nicʉ niwĩ:

28 —Ʉ̃sã mʉsãrẽ Jesú ye quetire buꞌedutitimiapʉ. Tere “Buꞌerã waꞌaya”, ne nitiapʉ. Ʉ̃sã mʉsãrẽ tojo dutítimicã, nipeꞌtiropʉ Jerusalẽ́pʉre mʉsã buꞌese seꞌsa waꞌaꞌa. Mʉsã masãrẽ tojo ni buꞌecã, “Jesú na ye buꞌirita wẽrĩpĩ”, ni wãcũrãsama ʉ̃sãrẽ. Na tojo ni wãcũcã ʉarã weesaꞌa, nicʉ niwĩ paꞌia wiogʉ narẽ.

29 Tojo nicãta, Pedro, ãpẽrã cʉ̃ meꞌrãcjãrã cʉ̃rẽ yʉꞌticãrã niwã:

—Wiorã dutise yʉꞌrʉoro Õꞌacʉ̃ ye peꞌere nemorõ weeroʉaꞌa. Ʉ̃sã mʉsã dutiro wéérã, Õꞌacʉ̃ dutiro peꞌere weetibosaꞌa.

30 »Õꞌacʉ̃ marĩ ñecʉ̃sʉmʉa wiogʉ Jesú wẽrĩꞌcʉpʉre, mʉsã curusapʉ paabiꞌpe wẽjẽdutiꞌcʉre masõcʉ niwĩ. 31 Masõtoja, ʉꞌmʉsepʉ cʉ̃ tiro wiogʉ dujiri cũmurõpʉ miimʉjãcʉ niwĩ. Cʉ̃rẽ topʉ miimʉjãgʉ̃, marĩrẽ yʉꞌrʉoꞌcʉre marĩ wiogʉ niato ni, sõrõcʉ niwĩ. Tojo weegʉ marĩ judío masãrẽ marĩ ñaꞌarõ weesetiꞌquere bʉjaweticã, marĩrẽ acobojogʉsami. 32 Ʉ̃sã Õꞌacʉ̃ tojo weeꞌquere werecusiari masã niꞌi. Ʉ̃sã Espíritu Santure cʉoyurã, cʉ̃ meꞌrã Õꞌacʉ̃ tutuasere weeĩꞌoapʉ masãrẽ. Nipeꞌtirã Õꞌacʉ̃ dutiro weerãrẽ Espíritu Santure oꞌógʉsami, ni werecãrã niwã Pedro quẽꞌrã.

33 Cʉ̃ tojo nicã tʉꞌorã, wiorã peꞌe ʉpʉtʉ waro uacãrã niwã.

—Ma. Ãꞌrãrẽ wẽjẽrã marĩ, nicãrã niwã.

34 Niꞌcʉ̃ fariseo masʉ̃ Gamalie wãmetigʉ wiorã meꞌrã na nerẽrõpʉta nicʉ niwĩ. Moisé ojaꞌquere masãrẽ buꞌegʉ nicʉ niwĩ. Masã cʉ̃rẽ “Añugʉ̃ nimi”, ni wãcũcãrã niwã. Wiorã Jesú besecṹúꞌcãrãrẽ na “Wẽjẽrã” nicã tʉꞌogʉ, Gamalie wãꞌcãnʉꞌcã, “Ãꞌrãrẽ pijiwijaaniña yujupʉ”, nicʉ niwĩ. Ãpẽrã wiorãrẽ na tʉꞌotiro apeyenojõ weregʉti nígʉ̃, tojo nicʉ niwĩ. 35 Na wijááca beꞌro topʉ nirã́ wiorãrẽ aꞌtiro nicʉ niwĩ:

—Añurõ wãcũña mʉsã narẽ weesĩꞌrĩsere. 36 Ti nʉmʉpʉre niꞌcʉ̃ Teuda wãmetigʉ “Yʉꞌʉ wiogʉ niꞌi”, ni wãcũcʉ nimiwĩ. Cuatrocientos masã cʉ̃ buꞌesere sirutucãrã niwã. Beꞌro cʉ̃rẽ ãpẽrã wẽjẽcõꞌacãꞌcãrã niwã. Cʉ̃rẽ wẽjẽ́ca beꞌro cʉ̃ meꞌrã nimiꞌcãrã noꞌo ʉaro waꞌastepeꞌtia waꞌacãrã niwã. Tojo wééca beꞌro cʉ̃ buꞌemiꞌque peꞌtia waꞌacaro niwʉ̃. 37 Beꞌro wiogʉ masãrẽ baꞌpaqueori cura apĩ Juda wãmetigʉ Galileacjʉ̃ nicʉ niwĩ. Cʉ̃ quẽꞌrãrẽ pãjãrã masã cʉ̃ buꞌesere sirutucãrã nimiwã. Beꞌro cʉ̃rẽ tja ãpẽrã wẽjẽcõꞌacãrã niwã. Cʉ̃rẽ wẽjẽ́ca beꞌro cʉ̃ yarã nimiꞌcãrã waꞌastepeꞌtia waꞌacãrã niwã mejãrõta tja. 38 Yʉꞌʉ tojo weegʉ mʉsãrẽ tojo waꞌaꞌquere wereꞌe. Sõjã pũrĩcãrẽ ñaꞌarõ weeticãꞌña. Narẽ duꞌucãꞌña. Na buꞌese na wãcũse meꞌrã buꞌecã, peꞌtia waꞌarosaꞌa Teuda, Judare waꞌaꞌcaronojõta. 39 Õꞌacʉ̃ dutiro meꞌrã na buꞌecã pũrĩcãrẽ, mʉsã ne põtẽosome. Tojo weerã mʉsã narẽ wẽjẽrã, Õꞌacʉ̃rẽ yʉꞌrʉnʉꞌcãrã weebosaꞌa. Tojo weerã duꞌuya narẽ, ni werecʉ niwĩ Gamalie wiorãrẽ.

40 Cʉ̃ tojo nisere tʉꞌorã, “Jaʉ. Ãꞌrĩ marĩrẽ diacjʉ̃ta ucũmi”, ni wãcũcãrã niwã. Beꞌro Pedro quẽꞌrãrẽ pijiocãrã niwã tja. Na topʉ sãjãejacã ĩꞌarã, wiorã surarare tãrãduticãrã niwã. Tãrãtoja, “Jesú ye quetire ne apaturi werenemoticãꞌña”, nicãrã niwã. Nitoja, narẽ duꞌuwĩrõcãꞌcãrã niwã.

41 Na wiorã tiropʉ níꞌcãrã wijaa, aꞌmerĩ ucũcãrã niwã:

—Õꞌacʉ̃ marĩrẽ “Jesú ye quetire wereya” nicã, añu niꞌi. Tojo weerã wiorã na tãrãmicã, marĩ añurõ eꞌcatise meꞌrã niꞌi, nicãrã niwã.

42 Wiorã narẽ buꞌedutitimicã, Õꞌacʉ̃ wiꞌipʉ, wiꞌseripʉ Jesú nipeꞌtirãrẽ yʉꞌrʉogʉ nimi nisere buꞌenuꞌcũcãꞌcãrã niwã.