Beꞌro wiogʉ niꞌcʉ̃ cʉ̃ meꞌrã daꞌragʉ, Amán wãmetigʉ meꞌrã eꞌcatiyʉꞌrʉacʉ niwĩ. Cʉ̃ Hamedata macʉ̃, Agag pãrãmi nituriagʉpʉ nicʉ niwĩ. Tojo weegʉ cʉ̃rẽ ãpẽrã daꞌrarã buꞌipʉ daꞌrase cũucʉ niwĩ. Tojo nicã, wiogʉ nipeꞌtirãrẽ Amárẽ ẽjõpeose ĩꞌorã, paamuꞌrĩqueꞌaduticʉ niwĩ. Te dutisere nipeꞌtirã wiorã cʉ̃ ya wiꞌipʉ nirã́ queoro weecãrã niwã.

Mardoqueo diaꞌcʉ̃ cʉ̃rẽ ĩꞌagʉ̃, paamuꞌrĩqueꞌaticʉ niwĩ. Amán cʉ̃rẽ wiopesase meꞌrã paamuꞌrĩqueꞌaticã ĩꞌagʉ̃, uayʉꞌrʉacʉ niwĩ. Cʉ̃ Mardoqueore “Ti curuacjʉ̃ nimi” ni, tʉꞌotojacʉ niwĩ. Tojo weegʉ “Cʉ̃ seꞌsarore buꞌiri daꞌresome”, nicʉ niwĩ. Tojo weeronojõ oꞌogʉ, “¿Deꞌro wee nipeꞌtirã judío masã Asuero cʉ̃ dutise diꞌtapʉ nirãrẽ peꞌoroʉamitito?”, ni wãcũcʉ niwĩ.

Tojo weegʉ judío masãrẽ wẽjẽatji nʉmʉrẽ beseduticʉ niwĩ. Na tojo weebocáca nʉmʉ nitʉori mujĩpũ trece nicã nicaro niwʉ̃.

Beꞌro Amán wiogʉ tiropʉ ĩꞌagʉ̃ waꞌacʉ niwĩ. Cʉ̃rẽ aꞌtiro nicʉ niwĩ:

—Nipeꞌtise mʉꞌʉ dutise diꞌtapʉre niꞌcã curuacjãrã ãpẽrã waꞌteropʉre mejẽcã weesetirã, mʉꞌʉ dutisere weetima. Tojo weegʉ narẽ wẽjẽcõꞌarõʉaꞌa, nicʉ niwĩ Amán.

Cʉ̃ tojo nicã tʉꞌogʉ, wiogʉ cʉ̃rẽ yʉꞌticʉ niwĩ:

—Mʉꞌʉ deꞌro weesĩꞌrĩrõ weeya. Niꞌcã dutiro “Narẽ tojo wee wẽjẽrãti” nisere ojaya, nicʉ niwĩ. Beꞌro Amán, judío masãrẽ ĩꞌatuꞌtiri masʉ̃rẽ cʉ̃ wiogʉ omopica tuusãarĩ beꞌtore te dutise ojaꞌquere ñacũudutigʉ oꞌocʉ niwĩ.

Tojo weegʉ Amán, wiogʉ Asuero cʉ̃ dutise macãrĩcjãrãrẽ nipeꞌtisepʉre papera ojaõꞌoduticʉ niwĩ. Ti pũrĩpʉre nipeꞌtirãpʉre “Niꞌcã nʉmʉta judío masãrẽ wẽjẽpeꞌocãꞌña. Nipeꞌtirã wĩꞌmarã, maꞌmapjia, bʉcʉrã, numiarẽ wẽjẽpeꞌocãꞌña. Na ye níꞌquere miiwapaya”, ni ojanoꞌcaro niwʉ̃. Narẽ wẽjẽatji nʉmʉ peꞌe nitʉori mujĩpũ trece nicã nicaro niwʉ̃.