1 Esaú cuatrocientos ʉmʉa meꞌrã aꞌticã ĩꞌagʉ̃, Jacob aꞌtiro weecʉ niwĩ. Lea, Raquel, pʉarã narẽ daꞌracoꞌterã numia meꞌrã nanʉcʉ̃ na põꞌrãrẽ dʉcawaacʉ niwĩ. 2 Narẽ daꞌracoꞌterã numiarẽ na põꞌrã meꞌrã na dʉporo nʉꞌcõcʉ niwĩ. Beꞌro Leare co põꞌrã meꞌrã nʉꞌcõcʉ niwĩ. Nitʉoropʉ Raquere co macʉ̃ José meꞌrã nʉꞌcõcʉ niwĩ. 3 Beꞌro Jacob na dʉporoacã ʉꞌmʉtãwãꞌcãcʉ niwĩ. Esaúre põtẽrĩgʉ̃ waꞌagʉ, sietetiri cʉ̃ diapoare nucũcãpʉ paamuꞌrĩqueꞌacʉ niwĩ. Téé cʉ̃ tiropʉ ejagʉ, tojo weeduꞌucʉ niwĩ. 4 Esaú peꞌe cʉ̃rẽ põtẽrĩgʉ̃, omawãꞌcãti, paabʉꞌa, miꞌmicʉ niwĩ. Na pʉarãpʉta aꞌmerĩ uticãrã niwã. 5 Tuꞌajanʉꞌcõ, Esaú na numiarẽ, wĩꞌmarãrẽ ĩꞌa, aꞌtiro ni sẽrĩtiñaꞌcʉ niwĩ:

—¿Ãꞌrã waro noanojõ niti? ni sẽrĩtiñaꞌcʉ niwĩ.

—Na, yʉꞌʉ põꞌrã Õꞌacʉ̃ yʉꞌʉre, mʉꞌʉ dutise doca nigʉ̃rẽ oꞌoꞌcãrã nima, nicʉ niwĩ Jacob.

6 Tojo nicã tʉꞌorã, cʉ̃rẽ daꞌracoꞌterã numia na põꞌrã meꞌrã, Esaú tiroacãpʉ waꞌa, cʉ̃rẽ wiopesase meꞌrã añudutirã, nucũcãpʉ paamuꞌrĩqueꞌacãrã niwã. 7 Beꞌro Lea cʉ̃ tiroacãpʉ aꞌti, co quẽꞌrã co põꞌrã meꞌrã mejãrõta weeco niwõ. Yapatigopʉa Raquel co macʉ̃ José meꞌrã, mejãrõta weeco niwõ.

8 Esaú Jacore sẽrĩtiñaꞌcʉ niwĩ:

—¿Deꞌro weegʉsari mʉꞌʉ, waꞌicʉrã sõꞌonícãrã yʉꞌʉre põtẽrĩwãꞌcãꞌcãrã pãjãrã meꞌrã?

Jacob cʉ̃rẽ yʉꞌticʉ niwĩ:

—Mʉꞌʉ yʉꞌʉre añurõ wãcũcã ʉagʉ, tojo weeasʉ.

9 —Niweꞌe, nijã. Yʉꞌʉ quẽꞌrã pãjãrã cʉoapʉ. Na mʉꞌʉ yarã meꞌrãta tojayá, nicʉ niwĩ Esaú.

10 Jacob cʉ̃ maꞌmirẽ ninemocʉ niwĩ:

—Yʉꞌʉre añurõ wãcũgʉ̃, yʉꞌʉ oꞌosere ñeꞌeña. Yʉꞌʉ mʉꞌʉrẽ ĩꞌagʉ̃, Õꞌacʉ̃rẽ ĩꞌagʉ̃ weronojõ ĩꞌaꞌa. Mʉꞌʉ yʉꞌʉre añurõ põtẽrĩ ñeꞌetojapʉ. 11 Yʉꞌʉ mʉꞌʉrẽ miiti oꞌosere ñeꞌeña. Õꞌacʉ̃ yʉꞌʉre peje apeyenojõ cʉocã weeami. Ne apeyenojõ dʉꞌsaweꞌe.

Jacob cʉ̃ pejetiri tojo nicã tʉꞌogʉ, Esaú “Jaʉ”, nicʉ niwĩ. 12 Beꞌro Esaú nicʉ niwĩ:

—Teꞌa. Yʉꞌʉ mʉꞌʉ dʉporo ʉꞌmʉtãgʉ̃ti, nicʉ niwĩ.

13 Jacob peꞌe cʉ̃rẽ yʉꞌticʉ niwĩ:

—Maꞌmi, yʉꞌʉ maꞌigʉ̃, mʉꞌʉ masĩsaꞌa. Wĩꞌmarã marĩ weronojõ tutuatima. Oveja, wecʉa, na põꞌrãrẽ yʉꞌʉ wãcũsaꞌa. Na niꞌcã nʉmʉta ñujũyʉꞌrʉrã, wẽrĩpeꞌtia waꞌabosama.

14 Mʉꞌʉ peꞌe mʉꞌʉ dutise doca nigʉ̃́ dʉporo ʉꞌmʉtãwãꞌcãña. Mʉꞌʉ tojo weecã, añurõsaꞌa. Yʉꞌʉ peꞌe waꞌicʉrã, yʉꞌʉ dʉporo waꞌarã na sijaro ejatuaro sajatiro waꞌagʉti. Tojo nicã wĩꞌmarã na sijaro ejatuaro waꞌagʉti. Téé Seipʉ aꞌmerĩ ĩꞌarã, nicʉ niwĩ Jacob.

15 Esaú, “Jaʉ, tojota weerã́. Yʉꞌʉ meꞌrã aꞌtiꞌcãrã ʉmʉarẽ mʉꞌʉrẽ baꞌpaticã, pejetirã cũugʉ̃ti”, nicʉ niwĩ.

Jacob peꞌe cʉ̃rẽ yʉꞌticʉ niwĩ:

—Añurõsaꞌa. Cũuticãꞌña. Mʉꞌʉrẽ caribosĩꞌrĩtisaꞌa, nicʉ niwĩ.

16 Na tojo ni ucṹca nʉmʉrẽta Esaú Seipʉ dajatojaacʉ niwĩ. 17 Jacob peꞌe Sucot wãmetiropʉ waꞌacʉ niwĩ. Topʉ cʉ̃ niatji wiꞌire weecʉ niwĩ. Tojo nicã waꞌicʉrã ye wiꞌseriacãrẽ paapeocʉ niwĩ. Tojo weegʉ tore Sucot wãmeyecʉ niwĩ.

18 Jacob cʉ̃ Padan-arãpʉ níꞌcʉ, cʉ̃ dajatojaticã, ne mejẽcã waꞌaticaro niwʉ̃. Canaápʉre añurõ dajacʉ niwĩ. Topʉre Siquem wãmetiri macã põtẽorõ tojaqueꞌacʉ niwĩ. 19 Cien cujiri niyeru cujiri meꞌrã niꞌcã diꞌta duucʉ niwĩ. Ti diꞌtare Hamor põꞌrã duacãrã niwã. Cʉ̃ Siquem wãmetigʉ pacʉ nicʉ niwĩ. Topʉ Jacob cʉ̃ ya wiꞌi, suꞌti caseri meꞌrã sẽeopeocʉ niwĩ. 20 Tuꞌajanʉꞌcõ, Õꞌacʉ̃rẽ ẽjõpeogʉ waꞌicʉrãrẽ ʉ̃jʉ̃amorõpeorore niꞌcã mesã ʉ̃tã meꞌrã seeneocũucʉ niwĩ. Tore El-Elohe-Israe*33.20 El-Elohe-Israe nírõ “Õꞌacʉ̃, Israe curuacjãrã ẽjõpeogʉ, Õꞌacʉ̃ta nimi” nisĩꞌrĩrõ weeꞌe. wãme õꞌocʉ niwĩ.