14 José pãrãmerã nituriarã Manasés ya curuacjãrã, tojo nicã Efraĩ́ ya curuacjãrã Josuére aꞌtiro nicãrã niwã:

—¿Deꞌro weegʉ ʉ̃sãrẽ ʉ̃sã ye niatjere niꞌcã diꞌtacãta oꞌoati? Ʉ̃sãrẽ ejatuatʉꞌsaweꞌe. Õꞌacʉ̃ ʉ̃sãrẽ añurõ wéégʉ, pãjãrã masãputicã weeami, nicãrã niwã.

15 Na tojo nicã tʉꞌogʉ, Josué narẽ yʉꞌticʉ niwĩ:

—Mʉsã pãjãrã niꞌi nírã, mʉsãrẽ oꞌóca diꞌta Efraĩ́, buꞌpapijaro nirṍ ejatuaticã, ferezeo masã, tojo nicã refaíta masã ya diꞌta yucʉpagʉ pejepagʉ nirõpʉ waꞌaya. Waꞌa, tere paa, ote, topʉ nisetiya, nicʉ niwĩ. 16 Na cʉ̃rẽ yʉꞌticãrã niwã:

—Diacjʉ̃ta niꞌi. Aꞌte buꞌpapijaro nirṍ ʉ̃sãrẽ ejatuatisaꞌa. Mejõ cananeo masã opa paꞌtiro nirõpʉ nirã́ peꞌe pejepawʉ cabayua wejesepawʉ cõme meꞌrã weeꞌquepawʉre cʉoma. Bet-seã́pʉ nirã́, to sumuto nise nirã́, tojo nicã Jezreel opa paꞌtiro nirã́ quẽꞌrã mejãrõta cʉoma, nicãrã niwã.

17 Na tojo nicã tʉꞌogʉ, Josué José pãrãmerã nituriarã Efraĩ́, Manasés ya curuacjãrãrẽ nicʉ niwĩ:

—Diacjʉ̃ta mʉsã pãjãrã, tutuarã niꞌi. Tojo weerã niꞌcã diꞌta diaꞌcʉ̃ cʉomasĩtisaꞌa. 18 Opa buꞌpapijaro, yucʉpagʉ peje nirṍ quẽꞌrã mʉsã ye nirõsaꞌa. Mʉsã tepagʉre paacõꞌa, noꞌocãꞌrõ mʉsã paacõꞌarõ põtẽorõ te mʉsã ye diꞌta nirõsaꞌa. Sõjã cananeo masã, cõme meꞌrã weeꞌquepawʉre cʉomicã, na tutuamicã, narẽ nʉrʉ̃stewĩrõmasĩrãsaꞌa, nicʉ niwĩ Josué.