1 Beꞌro ti diꞌtare etipeꞌotoja, Josué Rubén ya curuacjãrãrẽ, Gad ya curuacjãrãrẽ, tojo nicã Manasés ya curuacjãrã deco meꞌrã nirãrẽ piji, narẽ 2 nicʉ niwĩ: “Mʉsã nipeꞌtise Moisé, Õꞌacʉ̃ dutisere daꞌracoꞌtegʉ cʉ̃ dutiꞌquere queoro weeapʉ. Tojo nicã nipeꞌtise yʉꞌʉ mʉsãrẽ weedutiꞌquere weeapʉ. 3 Ne niꞌcãti mʉsã acawererã Israe curuacjãrãrẽ cõꞌawãꞌcã weetiapʉ. Narẽ weetamunuꞌcũcãꞌpʉ. Niꞌcãrõacã quẽꞌrãrẽ na meꞌrã ninuꞌcũꞌu yujupʉ. Tojo nicã nipeꞌtise Õꞌacʉ̃, mʉsã wiogʉ cʉ̃ dutisere añurõ weepeꞌoapʉ. 4 Niꞌcãrõacãma Õꞌacʉ̃ cʉ̃ ‘Tojo weegʉti’ níꞌquere queoro weeami. Tojo weegʉ mʉsã acawererãrẽ soocã weeami. Tojo weerã mʉsã ye diꞌta Moisé, Õꞌacʉ̃ dutisere daꞌracoꞌtegʉ, mʉsãrẽ oꞌoꞌque diꞌta, Jordã́ ape pãꞌrẽpʉ nisepʉ dajatojaaya majã. 5 Aꞌte diaꞌcʉ̃ mʉsã weecã ʉasaꞌa. Moisé cʉ̃ dutiꞌquere queoro weeya. Õꞌacʉ̃ marĩ wiogʉre maꞌi nisetiya. Cʉ̃rẽ sirutu, cʉ̃ dutisere queoro weeya. Nipeꞌtise mʉsã ẽjõpeose meꞌrã, mʉsã wãcũse meꞌrã cʉ̃ ʉaro weenuꞌcũcãꞌña”, nicʉ niwĩ Josué.

6 Narẽ werepeꞌotoja, “Õꞌacʉ̃ mʉsãrẽ añurõ weeato” ni, “Mʉsã ye wiꞌseripʉ dajatojaaya”, nicʉ niwĩ.

9 Cʉ̃ tojo níca beꞌro Rubén ya curuacjãrã, Gad ya curuacjãrã, Manasés ya curuacjãrã deco meꞌrã nirã́ ãpẽrã Israe curuacjãrã Silopʉ nirã́, Canaá diꞌtapʉre aꞌmerĩ duꞌu, dʉcawati, na ya diꞌta Galaad, dia Jordã́ apese pãꞌrẽpʉ pẽꞌapeꞌtia waꞌacãrã niwã. Dʉporopʉ te diꞌta Õꞌacʉ̃ Moisé meꞌrã “Mʉsãrẽ oꞌogʉti” níꞌque diꞌta nicaro niwʉ̃.