1 Jesú masãrẽ, tojo nicã cʉ̃ buꞌerãrẽ buꞌéca beꞌro apeye ninemocʉ niwĩ narẽ:

—Diacjʉ̃ mʉsãrẽ weregʉti. Niꞌcãrẽrã aꞌtopʉ nirã́ yʉꞌʉ tutuaro meꞌrã wiogʉ sãjãgʉ̃ aꞌticã ĩꞌatimirã, wẽrĩsome, nicʉ niwĩ.

2 Niꞌcã semana beꞌro Jesú ʉ̃rʉ̃gʉ̃ ʉꞌmʉacjʉpʉ mʉjãcʉ niwĩ. Tigʉpʉre waꞌagʉ, Pedro, Santiago, Juã na seꞌsarore miacʉ niwĩ. Topʉ na ĩꞌorõpʉ Jesú cʉ̃ bajusere dʉcayucʉ niwĩ. 3 Cʉ̃ suꞌti asistea waꞌacaro niwʉ̃. Pũrõ butise waꞌacaro niwʉ̃. Ne aꞌtopʉre te butise weronojõ masã suꞌti coetima. 4 Tojo waꞌari cura Elía, Moisé bajuanʉꞌcã, Jesú meꞌrã ucũcã ĩꞌacãrã niwã. 5-6 Tere ĩꞌarã, cʉ̃ buꞌerã ʉcʉayʉꞌrʉa waꞌacãrã niwã. Tojo weegʉ Pedro deꞌro nímasĩtigʉ, ucũquejocʉ niwĩ. Aꞌtiro nicʉ niwĩ:

—Wiogʉ, marĩ aꞌtopʉ nicã añuyʉꞌrʉaꞌa. Iꞌtia wiꞌiacã weerã. Niꞌcã wiꞌi mʉꞌʉ ya wiꞌi, ape wiꞌi Moisé ya wiꞌi, ape wiꞌi Elía ya wiꞌi weerã, nicʉ niwĩ Pedro.

7 Beꞌro niꞌcã curua oꞌmecurua dijati, narẽ tuubiꞌacãꞌcaro niwʉ̃. Ti curuapʉ niꞌcʉ̃ aꞌtiro ucũcã tʉꞌocãrã niwã:

—Ãꞌrĩ yʉꞌʉ macʉ̃ ʉpʉtʉ yʉꞌʉ maꞌigʉ̃ nimi. Cʉ̃ ucũsere tʉꞌo ẽjõpeoya, nicʉ niwĩ.

8 Beꞌro ĩꞌaquejocãrã nimiwã. Ne ãpẽrã marĩcãrã niwã. Jesú niꞌcʉ̃ta nuꞌcũcʉ niwĩ.

9 Na ʉ̃rʉ̃gʉ̃pʉ níꞌcãrã dijarã, na topʉ ĩꞌaꞌquere Jesú ne weredutiticʉ niwĩ.

—Beꞌro yʉꞌʉ Õꞌacʉ̃ macʉ̃ masʉ̃ weronojõ upʉtigʉ wẽrĩ masã́ca beꞌropʉ wereya, nicʉ niwĩ. 10 Tojo weerã na seꞌsaro tere tʉꞌoñaꞌcãrã niwã. Na basu aꞌmerĩ sẽrĩtiñaꞌcãrã niwã:

—¿Deꞌro nisĩꞌrĩrõ weesari cʉ̃ wẽ́rĩ́ca beꞌropʉ masãse? nicãrã niwã. 11 Beꞌro Jesure sẽrĩtiñaꞌcãrã niwã:

—¿Deꞌro weerã Moisé ojaꞌquere buꞌeri masã “Masãrẽ yʉꞌrʉoacjʉ aꞌtise dʉporo Elía aꞌtimʉꞌtãgʉ̃sami”, ni buꞌeti?

12 Jesú narẽ yʉꞌticʉ niwĩ:

—Mʉsã nírõnojõta Elía aꞌtimʉꞌtãgʉ̃sami. Cʉ̃ nipeꞌtisere apomʉꞌtãgʉ̃sami. Õꞌacʉ̃ ye queti ojáca pũrĩpʉ yʉꞌʉ Õꞌacʉ̃ macʉ̃ masʉ̃ weronojõ upʉtigʉ ye cjasere aꞌtiro niꞌi. “Cʉ̃ piꞌetigʉsami. Ʉanoꞌtigʉsami”, niꞌi. 13 Yʉꞌʉ peꞌe mʉsãrẽ nigʉ̃ti. Elía aꞌtitojacʉ niwĩ. Cʉ̃rẽ Õꞌacʉ̃ ye queti ojáca pũrĩpʉ níꞌcaronojõta queoro waꞌacaro niwʉ̃. Masã cʉ̃rẽ noꞌo weesĩꞌrĩsere weecãrã niwã, nicʉ niwĩ.

14 Na ʉ̃rʉ̃gʉ̃pʉ níꞌcãrã ãpẽrã na meꞌrãcjãrã nirõpʉ dijatarã, pãjãrã masã nicã ĩꞌacãrã niwã. Ãpẽrã quẽꞌrã Moisé ojaꞌquere buꞌeri masã Jesú buꞌerã meꞌrã ʉpʉtʉ ucũcãrã niwã. 15 Beꞌro Jesú cʉ̃ wãcũña marĩrõ aꞌticã ĩꞌarã, nipeꞌtirã ĩꞌamarĩacãrã niwã. Cʉ̃ tiropʉ omawãꞌcã, añuduticãrã niwã. 16 Jesú cʉ̃ buꞌerãrẽ sẽrĩtiñaꞌcʉ niwĩ:

—¿Ñeꞌenojõrẽ tocãꞌrõ ũrũsãrã weeti na meꞌrã? nicʉ niwĩ.

17 Niꞌcʉ̃ na pãjãrã waꞌteropʉ nigʉ̃́ yʉꞌtiquejocʉ niwĩ:

—Ʉ̃sãrẽ buꞌegʉ, yʉꞌʉ macʉ̃ wãtĩ sãjãnoꞌcʉre miitiapʉ. Yʉꞌʉ macʉ̃rẽ ucũmasĩticã weemi. 18 Cʉ̃ noꞌo waꞌaro wãtĩ cʉ̃rẽ ñeꞌe paaquecũumʉjãmi. Cʉ̃ tojo weecã, ʉseropʉ soꞌpotuꞌu, cʉ̃ upicarire cũꞌrĩdiomʉjãmi. Tojo waꞌagʉ, bʉꞌamʉjãmi. Yʉꞌʉ mʉꞌʉ buꞌerãrẽ “Wãtĩrẽ cõꞌawĩrõña”, nitojamiapʉ. Na põtẽotiama, nicʉ niwĩ.

19 Jesú narẽ nicʉ niwĩ:

—Mʉsã ne ẽjõpeose moobutiaꞌa. Yʉꞌʉ mʉsãrẽ yoacã buꞌemicã, ne tʉꞌomasĩweꞌe yujupʉ. ¿Noꞌocãꞌrõ yoacã mʉsã yʉꞌʉre ẽjõpeoticã wãcũtutuagʉsari? Cʉ̃ wĩꞌmagʉ̃rẽ yʉꞌʉ tiro miitia, nicʉ niwĩ.

20 Cʉ̃ tiropʉ miiejacã, wãtĩ Jesure ĩꞌagʉ̃, wãcũña marĩrõ wĩꞌmagʉ̃rẽ wẽrĩacã weecʉ niwĩ. Cʉ̃ doquequeꞌa, tũrũmaacusia, ʉseropʉ soꞌpotuꞌuacʉ niwĩ. 21 Tojo waꞌacã ĩꞌagʉ̃, Jesú wĩꞌmagʉ̃ pacʉre sẽrĩtiñaꞌcʉ niwĩ:

—¿Noꞌocátero yoati aꞌte cʉ̃rẽ tojo waꞌaro? nicʉ niwĩ.

Cʉ̃ pacʉ yʉꞌticʉ niwĩ:

—Wĩꞌmagʉ̃pʉ tojo dʉꞌpocã́tiwĩ. 22 Pejetiri wãtĩ cʉ̃rẽ wẽjẽsĩꞌrĩgʉ̃, pecameꞌepʉ doquequeꞌa, diapʉ doqueñojãcã weemʉjãmi. Mʉꞌʉrẽ basiocã, ʉ̃sãrẽ pajañaꞌgʉ̃ weetamuña, nicʉ niwĩ.

23 Jesú cʉ̃rẽ nicʉ niwĩ:

—Mʉꞌʉ ẽjõpeocãma, basiocãꞌa. Noꞌo ẽjõpeorãma nipeꞌtise weeta basioꞌo, ni yʉꞌticʉ niwĩ.

24 Tojo nicã tʉꞌogʉ, wĩꞌmagʉ̃ pacʉ caricũquejocʉ niwĩ:

—Ẽjõpeoꞌo. Nemorõ ẽjõpeonemocã weeya, nicʉ niwĩ.

25 Jesú masã pãjãrã na tiropʉ omawãꞌcãticã ĩꞌagʉ̃, wãtĩrẽ cõꞌawĩrõgʉ̃, aꞌtiro nicʉ niwĩ:

—Wãtĩ ucũticã, tʉꞌoticã weegʉ́, mʉꞌʉrẽ wijaadutiꞌi. Ãꞌrĩ wĩꞌmagʉ̃pʉre nigʉ̃́, waꞌaya. Ne apaturi sãjãanemoticãꞌña, nicʉ niwĩ.

26 Cʉ̃ tojo nicã, wãtĩ caricũwijaagʉ, wĩꞌmagʉ̃rẽ apaturi wẽrĩacã weecʉ niwĩ. Cʉ̃ wijaagʉ, cʉ̃rẽ wẽrĩꞌcʉ weronojõ tojacã weecʉ niwĩ. Tojo weerã cʉ̃rẽ ãpẽrã “Wẽrĩa waꞌami”, nicãrã nimiwã. 27 Jesú peꞌe cʉ̃rẽ omocãpʉ ñeꞌe wejewãꞌcõcʉ niwĩ. Tojo weecã, cʉ̃ wãꞌcãnʉꞌcãcʉ niwĩ.

28 Beꞌro Jesú wiꞌipʉ sãjãcã, cʉ̃ buꞌerã ãpẽrã tʉꞌotiropʉ cʉ̃rẽ sẽrĩtiñaꞌcãrã niwã:

—¿Deꞌro weerã ʉ̃sã wãtĩrẽ cõꞌawĩrõmasĩtiapari? nicãrã niwã.

29 Cʉ̃ narẽ nicʉ niwĩ:

—Cʉ̃ wãtĩ tojo sãjãgʉ̃nojõrẽ Õꞌacʉ̃rẽ sẽrĩ, beꞌtise meꞌrã diaꞌcʉ̃ cõꞌawĩrõta basioꞌo, nicʉ niwĩ.

30 Na Cesarea Filipopʉ níꞌcãrã Galilea diꞌtapʉ yʉꞌrʉacãrã niwã tja. Na waꞌasere Jesú ne ãpẽrãrẽ masĩcã ʉaticʉ niwĩ. 31 Cʉ̃ wẽrĩatjere, ãpẽrã cʉ̃rẽ wiorãpʉre oꞌoatjere cʉ̃ buꞌerãrẽ buꞌégʉ, tojo weecʉ niwĩ. Aꞌtiro buꞌecʉ niwĩ:

—Yʉꞌʉ Õꞌacʉ̃ macʉ̃ masʉ̃ weronojõ upʉtigʉre wiorãpʉre oꞌorãsama. Beꞌro yʉꞌʉre wẽjẽrãsama. Na tojo weemicã, iꞌtia nʉmʉ beꞌro masãgʉ̃saꞌa tja, nicʉ niwĩ. 32 Na cʉ̃ tojo nisere tʉꞌomasĩticãrã niwã. Tʉꞌomasĩtimirã, uirã, sẽrĩtiñaꞌmasĩticãrã niwã.

33 Beꞌro Capernau wãmetiri macãpʉ etacãrã niwã. Topʉre na wiꞌipʉ sãjãejáca beꞌro Jesú cʉ̃ buꞌerãrẽ sẽrĩtiñaꞌcʉ niwĩ:

—¿Mʉsã maꞌa aꞌtirã, ñeꞌenojõ ucũ aꞌmetuꞌtiwãꞌcãtirã weeati?

34 Na peꞌe maꞌapʉre aꞌtiro ucũwãꞌcãticãrã niwã. ¿Noa marĩ waꞌteropʉre ãpẽrã yʉꞌrʉoro niyʉꞌrʉnʉꞌcãgʉ̃sari? nisere ucũcãrã niwã. Tojo ucũꞌcãrã nitjĩarã, ne yʉꞌtitiyʉꞌrʉocãꞌcãrã niwã. 35 Jesú ejanujã, cʉ̃ buꞌerã docere pijio, nicʉ niwĩ:

—Mʉsã ãpẽrã yʉꞌrʉoro niꞌi nisĩꞌrĩrã, aꞌtiro nirõʉaꞌa: “Nipeꞌtirã beꞌrocjʉ̃pʉ nisaꞌa”, nirõʉaꞌa. Apeye, nipeꞌtirãrẽ weetamurõʉaꞌa, nicʉ niwĩ.

36 Beꞌro niꞌcʉ̃ wĩꞌmagʉ̃rẽ pijio, na waꞌteropʉ nʉꞌcõcʉ niwĩ. Cʉ̃rẽ wʉamorõ, nicʉ niwĩ:

37 —Yʉꞌʉre maigʉ̃nojõ niꞌcʉ̃ ãꞌrĩ wĩꞌmagʉ̃rẽ ñeꞌegʉ̃ weronojõ weemi. Cʉ̃rẽ ñeꞌegʉ̃, yʉꞌʉreta ñeꞌegʉ̃ weemi. Yʉꞌʉre ñeꞌegʉ̃ quẽꞌrã yʉꞌʉ diaꞌcʉ̃rẽ ñeꞌegʉ̃ weetimi. Yʉꞌʉre oꞌóꞌcʉ Õꞌacʉ̃ quẽꞌrãrẽ mejãrõta ñeꞌegʉ̃ weemi, nicʉ niwĩ.

38 Beꞌro Juã Jesure aꞌtiro nicʉ niwĩ:

—Ʉ̃sãrẽ buꞌegʉ, niꞌcʉ̃ mʉꞌʉ wãmerẽ pisutjĩagʉ̃ wãtĩarẽ cõꞌawĩrõcã ĩꞌapʉ. Cʉ̃ marĩ meꞌrãcjʉ̃ nitiami. Tojo weerã cʉ̃rẽ cãꞌmotaꞌapʉ.

39 Cʉ̃ tojo nicã tʉꞌogʉ, Jesú aꞌtiro nicʉ niwĩ:

—Tojo weegʉre cãꞌmotaꞌaticãꞌrõʉaꞌa. Ne niꞌcʉ̃ yʉꞌʉ wãmerẽ pisutjĩagʉ̃ añurõ weeĩꞌoꞌcʉ, beꞌro yʉꞌʉre ñaꞌarõ ucũmasĩtisami. 40 Aꞌtiro niꞌi. Marĩrẽ ĩꞌatuꞌtitigʉ marĩ meꞌrãcjʉ̃ nimi. 41 Mʉsãrẽ yʉꞌʉ buꞌerã niyucã, ãpẽrã weetamurãsama. Tojo weegʉ diacjʉ̃ mʉsãrẽ weregʉti. Noꞌo mʉsãrẽ niꞌcʉ̃ cãꞌrõacã aco tĩagʉ̃nojõrẽ diacjʉ̃ta Õꞌacʉ̃ añuse oꞌogʉsami.

42 »Noꞌo yʉꞌʉre ẽjõpeogʉ wĩꞌmagʉ̃rẽ ñaꞌarõ weecã weegʉ́ ʉpʉtʉ buꞌiri daꞌrenoꞌgʉ̃sami. Cʉ̃rẽ ʉ̃tãgã pajicja wãmʉtapʉ dʉꞌteyoo, dia pajiri maapʉ doqueñocã, nemorõ añubosaꞌa. Tojo weecã, cʉ̃ maata wẽrĩa waꞌa, dojorẽnemotibosami. Cʉ̃ dojorẽboꞌque peꞌtia waꞌabosaꞌa. 43 Mʉsã ya omocã meꞌrã ñaꞌarõ weesĩꞌrĩrã, dʉtecõꞌaboꞌcaro weronojõ ñaꞌasere weeduꞌucãꞌña. Mʉsã niꞌcã omocã meꞌrã Õꞌacʉ̃ tiropʉ ejacã, nemorõ añuꞌu. Pecameꞌepʉ pʉa omocã meꞌrã waꞌacã peꞌema, ñaꞌayʉꞌrʉaꞌa. Mʉsã ñaꞌarõ weesĩꞌrĩsere weeticã, nemorõ añubosaꞌa. Mʉsã ñaꞌarõ weesĩꞌrĩsere wéérã pecameꞌepʉ waꞌacã, ñaꞌa niꞌi. Topʉre pecameꞌe ne yatitisaꞌa. 44 Becoa ne boatisama. Pecameꞌe quẽꞌrã ʉ̃jʉ̃nuꞌcũcãꞌsaꞌa. 45-48 Tojo nicã mʉsã ya dʉꞌpocã meꞌrã ñaꞌarõ wéérã, dʉtecõꞌaboꞌcaro weronojõ mejãrõta weeya tja. Mʉsã pecameꞌepʉ pʉa dʉꞌpocã meꞌrã waꞌacã, ñaꞌayʉꞌrʉaꞌa. Opa cõꞌñerõ ʉꞌmʉsepʉ sãjãcã peꞌema, nemorõ añuꞌu. Capea meꞌrã quẽꞌrã ñaꞌarõ weesĩꞌrĩrã, mejãrõta weeya. Mʉsã capea orewee cõꞌaboꞌcaro weronojõ ñaꞌasere ĩꞌaduꞌucãꞌña. Mʉsã pecameꞌepʉ pʉa capea meꞌrã waꞌacã, ñaꞌa niꞌi. Tojo nicã ʉꞌmʉsepʉ niꞌcã capea meꞌrã waꞌacã, nemorõ añuꞌu. Mʉsã ñaꞌarõ weesĩꞌrĩsere weeticã, nemorõ añu niꞌi. Mʉsã ñaꞌarõ weesĩꞌrĩsere wéérã pecameꞌepʉ waꞌacã, ñaꞌa niꞌi. Topʉre becoa ne boatisama. Pecameꞌe quẽꞌrã ne yatitisaꞌa.

49 »Nipeꞌtise baꞌasere pecameꞌe meꞌrã doꞌanoꞌo. Aꞌte weronojõ aꞌti diꞌtapʉre nipeꞌtirã yʉꞌʉre ẽjõpeorã piꞌetise meꞌrã nemorõ wãcũtutuanemorãsama. 50 Moa ocaro baꞌacã, añu niꞌi. Ocase peꞌtíca beꞌro apaturi ocacã weeta basioweꞌe. Mʉsã pũrĩcã moa ocaro weronojõ niña. Aꞌmequẽse marĩrõ añurõ nisetibʉroya, nicʉ niwĩ.