1 Di, napus vongoro tesa tei xa mea ra tas. Vatin be lu e he sav (7) e hon xil be he xalu (10) xa vatluvoluv te lelaxatien xil di e hon he xalu (10) xil vus. E vatin xil vus langgur xat his tellep xil xa latekan ni ra Hi tengan mei vahe nae. ✡Dan 7:3; Rev 17:3,7-12 2 Vongoro tesa nen ak, napus tenben nggoni tenbe lepard, len xil nggoni le bear, e vulongen nggoni vulonge laeon. Mi vongoro tesa ak, Dragon misa xeihen, von xeihen nan, e maen ni tengan valaxat holesok holu. ✡Dan 7:4-6 3 Vongoro ak, neta tei nggul vatin tei xa lapusi xos imat ven. E melele xa mei meul bos rilomun, moletin xil te rute xil vus e ut etan latemanin ni e langgusil xati. ✡Rev 17:8 4 Ngan xil vus ak, lamot mi Dragon vengan xa xi misa xeihen nan xa nggeih pupu mi vongoro tesa ak. E lamot mi vongoro tesa mun labit, “?Visi iaxa nggur xeihen nggoni? ?Visi iaxa mikila vavae vatela? !Moletin tovuol!”

5 Hi maen vongoro tesa ak tengan vasep koai vahiteni xa xeihen nan pipin ni xeihen na Hi. Hi maen ni mun tengan vahur xeihen tengan valaxat rute xil vus e ut etan aveti hanutap lu e lu mun (42).*Aveti 42 be huram 3 1/2. ✡Dan 7:8,20,25; 11:36; Rev 11:2; 12:6 6 Xi misepsisil Hi, misepin misa ba xat hisen e rute xa da en, e misep purun ngan xil mun xa ladi e ut nesao. 7 E Hi maen ni mun tengan ivae itel moletin nan xil iha vuma … ihas tan ni xil. Reitin, Hi maen vongoro tesa ak tengan vahur xeihen vali vatimol savsav xil vus, vali hisit moletin savsav xil vus, vali sepinien savsav xil vus, e vali kantri savsav xil vus. ✡Dan 7:7,21; Rev 11:7; 12:17 8 Moletin xil vus te ut etan limot mini. E ngan xil kestang xa ladis hisexil de Vanuvei te Meulien na ngan xa temat texoni sulut sipsip tei te sanien eo, xil linamot ti mini. Hisexil, latetisi teti e Vanuvei te Meulien tetiamu nousav, e melele xa Hi tenapeas ni ut etan ti mu. ✡Eks 32:32,33; Sam 69:28; Dan 12:1; Plp 4:3; Rev 3:5; 17:8; 20:12,15; 21:27; Aes 53:7; Sion 1:29,36; Rev 5:6,12

9 !Xosxa vurangemim di, muteong kuhi! 10 Xosxa Hi miling xati tengan lital xat moletin tei, litela iha e lital xati vari. E xosxa Hi miling xati tengan litil vin moletin tei ni tiei te vaeen, ma litil vini vari. Misak ni, Hi di misis moletin nan xil tengan lixulehi lisoh ixeih e neketen nae. ✡Ser 15:2; 43:11

11 Di, napus vongoro tesa teimun xa mea ra tan. Hon lu nggoni ho sipsip, e sepinien nan nggeih nggoni Dragon. 12 Vongoro tesa ak milaxat holesok xil e rin na ngan xa diamu. E nggeih xat moletin xil xa ladi e ut etan tengan limot mi vongoro tesa xa diamu, ngan xa neta tei texula e temeul tehos rilomun. 13 Vongoro xa bemei dutou, xi pol ni merekel xil xa latellep nggoni misak ni upang nggo ut nesao bemei etan tengan moletin xil vus lakila lapusi. ✡Mat 24:24; 2Tes 2:9; 1King 18:24-39 14 Hi maen vongoro ak xa bemei dutou tengan ha ti iluvos moletin xil vus te ut etan ni merekel xil xa pol ni e rin na vongoro xa diamu. E vongoro ak miluvos moletin xil e misak ni xil lapol ni nanao xa lapusi nggoni vongoro xa latesal vini ni tiei te vaeen e temeul rilomun. Di, misis xil tengan lamerere ni. ✡Mat 24:24; 2Tes 2:9-10; Rev 19:20; Dut 13:2-4 15 Hi maen vongoro tesa xa dutou tengan vasak ni nanao na vongoro xa diamu tengan vasehseh e vameul. Misak ni, nanao ak mikila vasepin e vasa lepisien te maten mi ngan xil xa latamot ti mini. ✡Dan 3:5-6 16 Vongoro xa dutou nggeih xat moletin xil vus tengan lihur simeleleen tei iti e hexil metu mu e valnaoxil: ngan xil xa latellep ba duxoh movotei xil tang, ngan xil xa holesok nae holu ba duxoh hoeo xil, ngan xil xa vexil mase ba duxoh slev xil. 17 Moletin xa tahur ti simeleleen ak, xi misakras vaxal mu vapos ni neta. E simeleleen ak be his vongoro tesa xa diamu e be pupuluen te hisen. ✡Rev 14:9,11; 16:2; 19:20; 20:4 18 Ngan xil xa iexil bei lave metisou linem kil koute te simeleleen ak, vengan ngan xil xa lakilakil kuhi likila lipol rat koute te pupuluen teni xa be vole usil moletin tei. Pupuluen te hisen be tei e he sav, tei e he sav, tei e he sav (666).