1 ရှောက်ရှစ်ခတ်ဇာလေ ပီးဟှားဘီးန ပေါလုဟှာ တဗဲ့တော်လေဟှို ခေါ်ဘီး နှစ်သိမ့်ပေးဟှယ်။ အယ်ဘီးန သူးနို့ဟှို နှောက်ဆစ်ဘီးဟှာ မာကေဒေါနိပြည်ဟှို ထွပ်ဟှားလိုက်ဟှယ်။ 2 သူဟှာ နေရာတိုင်းဟှို သွားဘီးဟှာ ယောင်ကြည်သူလေဟှို နှစ်သိမ့်အားပေးဘီးန အခါယပြည်ဟှို သွားဟှယ်။ 3 သူဟှာ အယ်ပြည်မာ သောင်းလနေဟှယ်။ အယ်ဘီးန ရှုရိပြည်ဟှို သန်းဖောန သွားဟှို့ ဆင်သင့်ဖြစ်နေဟှူ ခီမာဘဲ့ ယုဒလူမျိုးလေဟှာ သူ့ဟှို သတ်ဟှို့တွပ် ကြံစည်နေဟှယ် ဆိုဇာဟှို ကြားရဟှယ်။ အယ်ကြောန့် သူဟှာ မာကေဒေါနိပြည်ဟှို ဖြတ်ဘီး ပ္လန်ဟှို့တွပ် စိဆောင်းဖြတ်လိုက်ဟှယ်။ 4 ပေါလုနတူးဒူ လိုက်ဟှားသူလေဟှ ဗေရိဗြို့သားဖြစ်ဟှူ ပုရုရဲ့သား သောပတရု၊ သက်သာလောနိတ်ဗြို့သားလေ ဖြစ်ဂေ့ဟှူ အာရိတ္တာခုန သေကန္ဒု၊ ဒေရဗေဗြို့သားဖြစ်ဟှူ ဂါယု၊ အာရှိပြည်သားလေ ဖြစ်ဂေ့ဟှူ တုခိတ်န တရောဖိမ်လေ၊ အယ်ဘီးဟှာ တိမောသေလေ ဖြစ်ဂေ့ဟှယ်။ 5 အယ်လူလေဟှာ ရင်ဦးဆောင်းသွားဂေ့ဘီးန ကျွန်တော့်လေဟှို တရောဗြို့မာ စောန့်နေဂေ့ဟှယ်။ 6 တဆေးမှေ့ဘဲဟှူ မုပွဲတော် ပီးဟှားဘီးန ကျွန်တော့်လေဟှ ဖိလိပ္ပိဗြို့ဟှနေဘီး သန်းဖောန လာဂေ့ဟှယ်။ ငါးရစ်ကြာဘီးန သူးနို့ရှိနေဟှူ တရောဗြို့ဟှို ရော့‑က်ဟှားဘီး အယ်ဗြို့မာ ခွန်နစ်ရစ်လော့‑က် နေဂေ့ဟှယ်။

7 ကျွန်တော့်လေဟှာ စနေနေ့ *၂၀.၇ စနေနေ့၊ အယ်မျိုးမှုနေဟှာ နန်းနွေနေ့။ နေဒန်ဇာမာ မိတ်သဟာယစာ စားဂေ့ဟှို့တွပ် စုဂေ့ဟှယ်။ ပေါလုဟှာ နော့‑က်တနေ့မာ အယ်ဗြို့ဟှနေ ထွပ်ဟှို့တွပ် ကြံစည်ဟှားကြောန့် ညဉ့်နတ်ခီထိ လူလေဟှို ဆစ်ဘီးဟှာ ဟောပြောနေဟှယ်။ 8 ကျွန်တော့်လေ စည်းဝေးဟှူ ထတ်ခန်းမာ မီးအီလေ ဘောင်ဂီးထွန်းဟှားဟှယ်။ 9 ဥတုခု နာမယ်ရှိဟှူ ကောန်သားတယော့‑က်ဟှာ လတ်တန်ဗော့‑က်ထတ်မာ ထိုင်နေဟှယ်။ ပေါလုဟှ ဆစ်ဘီးဟောနေဟှူ ခီမာ ဥတုခုဟှာ အိငိုက်လာဘီးန နော့‑က်ဆောင်းမာ အိမွိဟှားဟှူကြောန့် အီသောင်းထပ်ဟှနေဘီး မ္လေဂီးထတ်ဟှို က္လဟှားလေဟှယ်။ လူလေဟှာ သူ့ဟှို ခီလိုက်ဟှူ ခီမာ သေဟှားဘီ ဆိုဇာဟှို တွိဂေ့ဟှယ်။ 10 အယ်ခီမာ ပေါလုဟှာ အော့‑က်ဟှို ဆင်းဘီးဟှာ အယ်လူထတ်မာ သူ့ကိုယ်ဟှို မှောက်ခ္လဘီးန ဖတ်ဟှားလိုက်ဟှယ်။ လူလေဟှို “စိုးရိမ်ဂေ့န။ သူဟှာ သတ်ရှင်နေသေးဟှယ်” ဆိုဘီး ပြောဟှယ်။ 11 ပေါလုဟှာ အီထတ်ဟှို ပ္လန်တတ်ဘီး တဗဲ့တော်လေနတူးဒူ မုဟှိုဖဲ့ဘီး စားဂေ့ဟှယ်။ မိုးလန်းဟှူခီထိ ကြာဂီးစကားပြောဘီးန ပေါလုဟှာ ထွပ်ဟှားလေဟှယ်။ 12 တဗဲ့တော်လေဟှာ သတ်ရှင်နေသေးဟှူ ကောန်သားဟှို သူ့အီဟှို ခေါ်ဟှားဘီးမှ ရရာတိုင်း သတ်သာရာ ရဂေ့ဟှယ်။

13 ကျွန်တော့်လေဟှာ သန်းဖောနားဟှို ရင်ဦးဆောင်းသွားဘီးန အဿုဗြို့ဟှို သွားဂေ့ဟှယ်။ အဿုဗြို့ဟှိုရော့‑က်မှ ပေါလုဟှို သန်းဖောစီးခိုင်းဟှို့တွပ် ဖြစ်ဟှယ်။ ပေါလုဟှာ အယ်ဗြို့ဟှို ကူးလမ်းဟှနေ သွားမယ် ဆိုဘီး ပြောဟှားကြောန့် ဖြစ်ဟှယ်။ 14 သူ့ဟှာ ကျွန်တော့်လေဟှို အဿုဗြို့မာ တွိဟှူကြောန့် သူ့ဟှို သန်းဖောထတ်ဟှို ခေါ်ဘီးဟှာ မိတုလင်ဗြို့ဟှို သွားဂေ့ဟှယ်။ 15 ကျွန်တော်ဟှားလေဟှာ အယ်နေရာဟှနေ ဝှပ်လွပ်ဘီး နော့‑က်တနေ့မာ ခိအုကျွန်းနားဟှို ရော့‑က်ဟှားဂေ့ဟှယ်။ တရစ်ကြာဘီးန သာမုကျွန်းဟှို ရော့‑က်ဟှားဘီး နော့‑က်တရစ်မှ မိလက်ဗြို့ဟှို ရော့‑က်ဟှားဂေ့ဟှယ်။ 16 ပေါလုဟှာ အာရှိပြည်မာ ခီကူရှင်ဘဲကြောန့် ဧဖက်ဗြို့ဟှို ဖြတ်ဘီး သန်းဖောန သွားဟှို့တွပ် စိဆောင်းဖြတ်ဟှားဟှယ်။ ဖြစ်နိုင်မယ် ဆိုဟှာ ပင်တေကုတ္တေ ပွဲတော်မီအောန် ယေရုရှလင်ဗြို့ဟှို ရော့‑က်ဟှို့တွပ် သူဟှာ ဗြန်းဗြန်ဟှား သွားနေဟှယ်။

17 အယ်ခီမာ ပေါလုဟှာ ဧဖက်ဗြို့ဟှ သင်းတော်လူဂီးလေဟှို သူ့ဟှို လာတွိဟှို့တွပ် မိလက်ဗြို့ဟှနေ လူလွှတ်ဘီး ကြောန်းကြားလိုက်ဟှယ်။ 18 အယ်လူလေဟှ ရော့‑က်လာဂေ့ဟှူ ခီမာ ပေါလုဟှ “ငါဟှာ အာရှိပြည်ဟှို ရော့‑က်ဟှူနေ့ဟှစဘီး နန်းနို့နတူးဒူ ရှိနေဟှူ ခီတိုင်းဟှာ ဖယ်မျိုးသတ်ရှင်ဟှယ် ဆိုဇာဟှို နန်းနို့လေ သိဂေ့ဟှယ်။ 19 ယုဒလူမျိုးလေရဲ့ ကြံစည်လေကြောန့် ခတ်ခဲဟှူခီလေဟှို ကြောင်တွိနေရဘေမဲ့လည်း ငါဟှာ မျစ်ရယ်က္လဘီး၊ စိနှလောင်းနှိခ္လဘီး သခင်ဘုရားဟှို စေခံဟှယ်။ 20 လူအောက်ဂီးရှေ့မာရော၊ နန်းနို့ အီလေမာရော ငါဟှာ ဟောပြောဘီး သွန်သန်ဟှူ ခီမာ နန်းနို့တွပ် ကျိုးရှိဟှူ စကားလေဟှို ဖယ်ခါလည်း ဝှပ်ဘီးထားဟှ။ 21 ဘုရားသခင်ရှေ့မာ နောန်ဒရရှင်း၊ နို့လေရဲ့ သခင်ယေရှုဟှို ယောင်ကြည်ရှင်း ကြောန်းလေဟှို ယုဒလူမျိုးလေဟှိုရော၊ ဟေလသလူမျိုးလေဟှိုရော လေးလေးနတ်နတ်ဟှား ဒိပေးဟှယ်။ 22 ခု ငါဟှာ ဝိညာဉ်တော်ရဲ့ မိန့်တော်ဟှို နာခံဘီး ယေရုရှလင်ဗြို့ဟှို သွားရမယ်။ အယ်ဗြို့မာ ဖယ်မျိုးဖြစ်မယ် ဆိုဇာဟှို ငါသိဟှ။ 23 သန့်ရှင်းဟှူဝိညာဉ်တော်ဟှ ‘နန်ဟှာ တောက်နှောန်ရှင်းန ဒေါက်ခလေဟှို ခံရလေ့မယ်’ ဆိုဘီး ဗြို့တိုင်းမာ ငါ့ဟှို ဒိပေးဟှားဟှယ် ဆိုဇာဟှို ငါသိဟှယ်။ 24 ၂၀.၂၄ ၂ တိ ၄.၇အယ်ဘေမဲ့ ငါ့တွပ်သတ်မှတ်ဟှားဟှူ လောက်တာဝန်န သခင်ယေရှုပေးဟှားဟှူ မှုတော်ဟှို ပီးအောန်လောက်ဆောန်ဟှို့ ဓိကဖြစ်ဟှူကြောန့် ငါဟှာ ကိုယ့်သတ်ဟှို ကိုယ်ဗြောဟှ။ ကိုယ်တော်ပေးဟှားဟှူ မှုတော်ဟှာ ဘုရားသခင်ရဲ့ ကျေးဇူးတော်ကြောန်းဖြစ်ဟှူ ဒန်းကောန်းဟှို ကြေညာဟှို့တွပ် ဖြစ်ဟှယ်။”

25 “ငါဟှာ ဘုရားသခင်ရဲ့ နိုင်ငံတော်ကြောန်းဟှို နန်းနို့နားဟှို လာဘီး ဟောပြောဟှယ်။ အယ်ဘေမဲ့ နန်းနို့ဟှလွဲဘီး ဖယ်သူဟှလည်း ငါ့မျစ်နှာဟှို နော့‑က်တခါ ဗြင်ရဟှို့မှုဘီ ဆိုဇာဟှို ငါသိနေဟှယ်။ 26 အယ်ကြောန့် နန်းနို့ထဲဟှ ယော့‑က်ယော့‑က်ဟှာ သတ်ဝိညာဉ်ဆောင်းရှောင်းမယ် ဆိုဟှာ လူလေရဲ့သွီးန ငါကင်းလွတ်ဟှယ် ဆိုဇာဟှို အယ်နေ့ဘဲ့ နန်းနို့ဟှို ငါဟှာ လေးလေးနတ်နတ်ဟှား သတ်သေခံဟှယ်။ 27 ဖြားဖြစ်ကြောန့်နူးဆိုဟှာ ငါဟှာ ဘုရားသခင်ရဲ့ လိုတော်ဟှို နန်းနို့လေဟှို ဂူလောင်း ပြောပြဟှားပီးဘီ။ 28 အယ်ကြောန့် နန်းနို့လေဟှာ ကိုယ့်ကိုယ်ကိုယ်ရော၊ နန်းနို့လတ်ထဲဟှို သန့်ရှင်းဟှူဝိညာဉ်တော်ဟှ ပေးဟှားဟှူ သိုးစုလေဟှိုရော စောန့်ရှော့‑က်ဘီး ကေ့ရှုဂေ့ပါ။ ဘုရားသခင်†၂၀.၂၈ ဘုရားသခင်၊ တချို့ မူရင်းလတ်ရေးမူလေမာ သခင်ဘုရား၊ ဆိုဘီး ပါရှိဟှယ်။ ရဲ့ သင်းတော်ဟှို သိုးထီးမျိုး ကေ့ရှုဂေ့ပါ။ ဘုရားသခင်ဟှာ သူ့သားတော်ရဲ့ သွီးတော်အားဖြင့်‡၂၀.၂၈ သူ့သားတော်ရဲ့ သွီးတော်အားဖြင့်၊ အယ်မျိုးမှုဘဲနေဟှာ သူ့သားတော်ရဲ့ သေခံဇာအားဖြင့်၊ အယ်မျိုးမှုဘဲနေဟှာ သူ့ရဲ့ သွီးတော်အားဖြင့်။ သင်းတော်ဟှို ဝယ်ဟှားဟှယ်။ 29 ငါမှေ့ဘဲဟှူ နော့‑က်မာ လူတချို့ဟှာ နန်းနို့နားဟှို လာဘီးဟှာ ရစ်ဆစ်ကြမ်းထန်းဟှူ ဝံပုလွေလေမျိုး သိုးစုဟှို ညှာတာဘဲန လောက်ဂေ့မယ် ဆိုဇာဟှို ငါသိနေဟှယ်။ 30 နန်းနို့ထဲမာ တချို့လူလေဟှာ လီညာပြောဆိုဘီး ယောင်ကြည်သူလေဟှို သူ့နော့‑က်ဟှို ခေါ်ဟှားဟှူခီ ရော့‑က်လာလေ့မယ်။ 31 အယ်ကြောန့် ဒိနနေဂေ့ပါ။ ငါဟှာ နန်းနို့ ဂူလောင်းဟှို သောင်းနှစ်လောင်းလောင်း နေ့ရောညဉ့်ရော မျစ်ရယ်က္လဘီး ဆောင်းမသွန်သန်ဇာဟှို ဒိရဂေ့ပါ။

32 “ခု နန်းနို့လေဟှို ဘုရားသခင်ရဲ့ လတ်ထဲဟှိုရော၊ ကျေးဇူးတော်တရားရဲ့ လတ်ထဲဟှိုရော ငါအပ်လိုက်ဟှယ်။ အယ်ကျေးဇူးတော်တရားဟှာ နန်းနို့လေဟှို တည်ဆော့‑က်ဟှို့တွပ် ကိုယ်တော်ရဲ့ သန့်ရှင်းသူလေတွပ် ထားဟှားဟှူ ကောန်းဂျီးမင်္ဂလာလေဟှို နန်းနို့ ခံစားရလေ့မယ်။ 33 ငါဟှာ တခြားသူလေရဲ့ ရွှေလေ၊ ငွေလေန ဝတ်စားလေဟှို တတ်မတ်ဇာ မှေ့ဟှ။ 34 ငါဟှာ အယ်လတ်လေန လောက်လောက်ဘီး ငါ့ပေါန်းသင်းလေရဲ့ လိုအပ်ဇာလေဟှို ဖ္လဲ့ပေးနေဟှယ် ဆိုဇာဟှို နန်းနို့လေဟှ သိဂေ့ဟှယ်။ 35 အယ်မျိုးဘဲ့ နန်းနို့လေလည်း လောက်ဟှို ကြိုးစားဘီး ဆင်းရဲဟှူ လူလေဟှို ကူညီဂေ့ဟှို့တွပ် ငါပြရစ်ဟှယ်။ သခင်ယေရှု ကိုယ်တိုင်ဟှ ‘ပေးဟှူဇာဟှ ရယူဇာထတ် ပိုဘီး မင်္ဂလာရှိဟှယ်’ ဆိုဘီး မိန့်တော်မူဟှားဟှူ စကားဟှို ဒိရဂေ့ပါ” ဆိုဘီး ပြောဟှယ်။

36 အယ်မျိုးပြောဘီးန ပေါလုဟှာ ဒူးထော့‑က်ဘီး အယ်လူလေနတူးဒူ ဆုတောန်းလေဟှယ်။ 37 သူးနို့လေ ဂူလောင်းဟှာ ရရာတိုင်း ငိုဂေ့ဘီးန ပေါလုဟှို ဖတ်ဘီး နှောက်ဆစ်ဂေ့ဟှယ်။ 38 ပေါလုဟှာ သူ့မျစ်နှာဟှို နော့‑က်တခါ ဗြင်ရဟှို့မှုဘီ ဆိုဘီး ပြောဟှူကြောန့် သူးနို့လေဟှာ ပိုဘီး ဟှာ ဝန်းနဲဂေ့ဟှယ်။ အယ်ဘီးန သူးနို့ဟှာ ပေါလုဟှို သန်းဖောနားဟှို လိုက်ပို့ဂေ့ဟှယ်။