THESOLONIITE
Suh Pool Ih Taklih Raang Arah Le
Ephangjatjih
Jisu Kristo ngaak raaha ih banthoothak rumta tiit tungthoih Thesoloni Chaas ni moongsaam thok ang ruh ih rumla. Thesoloniite suh Pol liwang leeraang adi Teesu eraak eha ih hanpi rumta rangwuung ah ejen thok ih taha ih raangha. Pool ih erah tiit ah hukbaat kotsuh thunha, Jisu maang ngaak raara ngakhoh nah, ethih nyia lalangka loong ah phang thok ha, neng phansiitte ah Kristo damdoh thichomuite warah heh men ah “Jootthih Wah” ih poonha.
Heh kaamwah ih arah wette loong asuh neng hanpi nah echam enaang lam ih ang abah uh rongtangtang toom ang rum ih hukbaat korumha, Pool nyia heh joonte loong mota ah likhiik, mootkaat ese ah motheng eah.
Hemong Dowa Jatjih
Ephangjatjih (1:1-2)
Rangphoong nyia Tiitse Baat kot(1:3-12)
Kristo Raaha Tiit Lamphan baat kot (2:1-17)
Kristaan Reeraang Tiit Baattaan(3:1-15)
Hethoonhemat (3:16-18)
1
1 Esm 17:1 Thesoloni Chaas nawa sen loong wah Rangte nyia Teesu Jisu Kristo mina loong suh—Pool, Silaas, nyia Timothi loong jiin nawa:
2 Sen loong Wah Rangte nyia Teesu Jisu Kristo ih sen suh semroongroong nyia minchan ah toom kohan.
Jisu raaha sa doh dande
3 Joon awaan loong, seng ih Rangte suh saapoot rookwet lakookmi ih sen loong thoi eli jih jaat angla. Eno erah epun eah, tumeah sen loong hanpi ah hak ela erah dam ih sen chamchi nah minchan mui ah ehan ih donghoonla. 4 Erah thoih seng ih sen tiit ah Rangte Chaas rookwih ni khuungpook baat hi. Sen hanpi ah sen chamnaang nyia phate joonnaam di nep latoohaat thang ih naan jahalan asuh seng khooroh eli.
5 Erah loong reetan ah sok adi Rangte ih epun dande eha, erah thoidoh sen loong ah heh Hasong nah wangsuh epun ang an. 6 Rangte ah epun jaatjaat ih re ah: heh ih sen cham thukte loong ah ewe cham thuk et ah, 7 eno sen echam etan loong ah takah cham thuk ran sen damdam seng loong asuh nep ah. Teesu Jisu ah rangmong nawa heh chaan aphaan pan rangsah loong damdoh dong raaha sa doh erah loong ah re ah, 8 eno o ih Rangte thaangju ha nyia Teesu Jisu, Ruurang Ese ah laboichaatte loong ah weeluung nah cham thuk suh raaha. 9 Isa 2:10Neng babah uh lathoon theng ethih adoh chamnaang rum ah, Teesu jiin nawa nyia heh chaan aphaan nawa pheehoom cho ang rum ah, 10 heh erah Sa doh heh mina loong jiin nawa chaan ah thaang raaha doh nyia heh suh hanpiite loong jiin nawa esoomtu theng ah thaang raaha doh, sen uh neng damdoh roong ang an, tumeah sen ih seng ih baatti jengkhaap loong ah ehanpi ehan.
11 Erah raangtaan ih seng ih sen suh saarookwih rangsoom ni tongli. Sen loong songtong suh Rangte ih poon halan adoh jen pun suh sen raang ih Rangte suh rangsoom hi. Sen tuungmaang lan mootkaat ah jen tom mootkaat suh nyia sen tenthun ese ah jen reeraang suh Rangte chaan nawa ih ju toom ang ah. 12 Emamah ih seng Teesu Jisu men ah sen nawa ih toom rangka ah, eno sen uh heh nawa ih rangka han, seng Rangte nyi Teesu Jisu Kristo minchan ah sen damdoh toom angha.