TIMOTHI
Suh Pool Ih Taklih Raang Arah Le
Ephangjatjih
Timothi suh Pool Liwang Leeraang adi ehan ah Timothi suh Pool ih heh no adoleh heh moot roongte ih thun ano heh ngiija tiit loong baattaan arah je ah. Hesot hemat ah enaan tiit. Timothi suh Jisu Kristo haaki ah ramram ih chap uh ih baattaan ha, eno Ehak Banlam nyia Ruurang Ese le ni raangha loong tiit ah nyootsoot suh heh ah nyootte nyia Rangte mootkaatte et re thukta, chamanaangte nyia heh miksukte loong pandi ah.
Timothi suh emoong tiitbaatte nyia lalangka jengkhaap di daanmuite re nawa haloh ih tong uh ih baatta, erah loong ah ese tah angka, erah nang ih bah, erah boichaatte ah echiike ba etthuk ah.
Erah loong damdi, Timothi suh arah leeraangte wah roidong nyia heh reeraang pakna loong ah enyootsok theng ih baat ha—heh hanpi tiit, heh toongtang tiit, heh minchan tiit, enaan tiit nyia phate joonnaam di chamnaang arah tiit loong ah.
Hemong Dowa Jatjih
Ephangjatjih (1:1-2)
Ephoongpha nyia eroorang (1:3—2:13)
Erenbaat nyia echoophaan tiit (2:14—4:5)
Pool heteewah ru arang tiit (4:6-18)
Hethoonhemat(4:19-22)
1
1 Ngah Pool, jiin nawa arah le ah, Jisu Kristo kaamwah Rangte thungpun jun ih danje hang ah, eno Jisu damdoh roop ih no heh ih kakhamta roidong tiit ah tumbaat suh daapkaat tahang—
2 Esm 16:1 Nga sah, Timothi suh:
Seng loong wah Rangte nyia Teesu Jisu Kristo ih an suh heh tenthet, minchan nyia semroongroong ah toom koho.
Lakookmi nyia chaankot tiit
3 Ngah ih Rangte suh lakookmi liihang, sengte sengwah ih soom rumta ah likhiik ngah ih uh thung atak esa nawa ih heh rang ah soomhang. Sen loong ah rangwuung rangphe nga rangsoom nawa ih jen samthun rumha eno heh suh lakookmi liihang. 4 Ngah ih sen mikse janhaat tan ah samthun hang, eno sen japtup suh rapne ih ramlang, eno ba ngah tenroon ang ang. 5 Esm 16:1 Ngah ih an wih Lois nyia an nuh Unis seklilih ih hanpi nyuuta a likhiik ih sen hanpi ah samthun hang. Ngah ih thunhang sen uh emamah heh ih hanpi lan. 6 Erah thoih ansuh baat hala nga lak ih taajoh taha adi an suh Rangte ih thaangmuh lakot kotaho ah ban maak ruh et uh. 7 Tumeah Rangte ih kotahe Chiiala rah ih seng ah choophoot ih hoon suh tah angka, erah nang ih bah, heh Chiiala ih seng suh chaan aphaan , minchan, nyia seng teeteewah jen soksam theng ah kotahe.
8 Erah thoih, Teesu haaki angsuh larakri theng; adoleh Kristo tungthoih ngah phaatak ni tonglang asuh uh larakri theng. Erah nang ih bah, Ruurang Ese raangtaan ih cham anaang jen hui suh, chaan kotaho jun ih cham anaang etheng. 9 Seng ah heh mina ih hoon suh piipang hali nyia poon hali ah langla, seng mootkaat thoi ih tah angka, erah nang ih bah ah heh mootkaat raang ih heh tenthet je thoih. Saapoot maang thok ra ngakhoni Jisu Kristo mendi ba seng suh erah tenthet ah kohali, 10 enoothong, amadi seng Pangte nyi seng Teesu, Jisu Kristo ra taha rah ih dongjat thuk hali. Heh ih etek chaan aphaan ah matsiit etta nyia ruurangese jun ih latek roidong ah dong thukta. 11 1Tim 2:7 Ruurang Ese ah tumbaat suh Rangte ih heh kaamwah nyia nyootte et danjoh tahang, 12 eno ngah ah erah loong ah thoih chamnaang lang. Ang abah uh, ngah tarakri kang, tumeah ngah o suh laalom lang erah ejat ehang, eno ngah ih kamkam jat hang heh ih heh Herangwuung maanglang lang ngah suh tumjih kotahang ah punpiipi ih thiin ah.*ngah suh tumjih baat tahang ah maang langlang ah;adoleh ngah ih heh suh tumjih baattang ah maang langlang ah. 13 Ngah ih nyoot hala amiisak tiit loong ah an ih dangdang et kap uno enyootsok etjih toom ang uh, eno Kristo Jisu damdoh roop uno heh suh hanpi lam ih nyia minchan nah ban tongruh eh uh. 14 Seng damdi roong tongte Esa Chiiala, chaan nawa ih sen suh eseejih loong kotahan ah bankap ruh et an.
15 An ih jat et hu, Esia juungkhuung nawa mirep ih ngah ah thiinhaat et rum tahang, erah damdi Phiijelus nyia Harmojinis ih nep roong thiinhaat nyu tahang. 16 Teesu tenthet ah Onisphorus jaatang asuh toom je ah, tumeah heh ih saapoot rookwih kaban chosok wang tahang. Ngah phaatak ni tong angdi uh tarakriita, 17 erah nang ih bah Room hadaang ni thok haano ngah maang japtup tup jamsok tahang. 18 Seng Teesu ih heh kaat Rangwuung chang adoh heh suh tenthet minchan ah toom koh ah! Eno an ih rapneene ih jat hu Ephisas ni heh nga raangtaan ih mathan ih reeta rah ah.