8
Jisu ah seng Romwah phokhothoon
1 Rsb 110:1 Seng ih roop liihi ah langla timthan ese ah romwah Phokhothoon ah, heh ah Rangte Esa nyia luuwang loong tongtheng dakchah ko ni rangmong ni tongla. 2 Heh ah romwah phokhothoon ang ano thoontang nang ih Esa Taang Thoon adi reela, erah ah Rangte ih hoon arah amiimi nyutaap adi reela, mina loong lak ih hoon arah tah angka.
3 Timthan romwah phokhothoon dan jeeta erah loong ah asithiik kot suh nyia huiawak dook ano Rangte suh khojoop hoon suh dan jeeta, eno erah raangtaan ih seng Romwah Phokhothoon eh uh khojoop jooptheng timjih uh eje angtheng. 4 Heh ah hatoh nah angta bah, heh ah romwah tah jaatjaat ang thengta, mamah liidih Jehudi Hootthe ih jamha ranglakkot ah kot suh romwah wahoh loong eje ang rumta. 5 Hpkt 25:40 Romwah likhiik re rumla rah amiimiisak marah rangmong ni angla erah likhiik jaatjaat ih re rumla. Arah loong ah Moses damdi mamah angta erah likhiik angla. Esa nyutaap ehoon nanah di Rangte ih baatta, “Marah kong ni noisok taho erah likhiikkhiik hoon suh nak beehaat uh, an ten nah khomthun uh.” 6 Enoothong belam bah, romwah mootkaat marah elongthoon angta ah Jisu jiinni, timnge liidih Rangte nyia heh mina laktung ni kakham eseethoon tiit ah khamta, mamah liidih kakham tiit adi nyaang baat ha.
7 Jengthaak asuh jaakhoh dowa kakham tiit adoh lah thita bah, liwang kakham tiit ah tajam thengta. 8 Jer 31:31-34 Enoothong Rangte jengta adi heh mina loong thet re ah choh jota,
“Saakaan loong ah ethok ehala, Teesu ih liiha,
Ngah ih ena kakham Ijirel mina loong nyia Juda mina loong damdoh thin ang doh.
9 Erah kakham abah nengte nengwah loong suh hoontang ah likhiik tah angka ang ah,
neng lak ni jorum angno Ijip nawa doksiit rumtang likhiik ah.
Marah ngah ih neng damdi nuumiijeng hoontang adi neng tuungmaang ah tajeeta,
erah raangtaan ih ngaathung ngaatak neng suh tah kotang.
10 Belam, saathoi doh arah nuumiijeng Ijirel
mina loong suh hoonhang, teesu ih liiha:
Neng thung nah nga hotthe loong ah thun thuk rum ang
nyia neng ten nah raang rum ang.
Ngah neng Rangte ang ang,
eno neng ah nga mina ang rum ah.
11 Ngo ih uh neng phoh ano laktung nah nyoot theng tah angka
adoleh nengkhuung nengtok nah baat mui theng tah angka.
‘Teesu ah jat uh ngeh ah.’
Timnge liidih neng ih ngah ejat eh rumte ang halang,
mihak nodek thoontang ih jat rumte ang rum halang.
12 Neng rangdah loong ah biin anaan erum ang
eno neng thet re ah takah dokthun rum kang.”
13 Nuumiijeng ena tiit ah baat ang bah, Rangte ih phangkhoh ah ehak ih hoon thukla; eno tim ang abah uh ehak ih hoonta no nyia thiita no seek ih thih ah.