1-2 Sadi kada ei bubuluk, fai maneuk kara fo ai laꞌo ela ei naa, ta tungga ai hihiin. Ai dalen hii nalan seli neti tiro-dangga ei, tehuu ta bisa. Ai ta makatataka mala dook ka ena, huu naa de ai maketu mala fo madenu Timotius neti. Tehuu au ma Silas mahani nai kada kota Atena. Timotius naa, ai toranoon. Ma ndia ai nonoon tao ue-osa fo sama-sama makalalaꞌok Yesus Karistus Hara Lii Malolen. Ai madenun neti fo ana nanori ei ma natetea ei dalem, mita fo ei nemeheherem tamba natea neu Manetualain.✡Nedenuk kara Tutuin 17:15 3 No dalak naa, mete ma hambu susa-sonak, ei ta matanggenggo. Toꞌu mahere ei nemeheherem. Huu ei bubuluk mae, hatahorir fo mana ramahere neu Karistus, neu ko hambu susa-sonak talo naa. 4 Fai bakahulun, neu ai bei sama-sama mia ei, ai fee nesenedak ena mae, hatahori fo mana namahere neu Lamatuak Yesus, neu ko hambu susa-sonak mata-matak kara. Hatematak ia, basan dadi leo naak ena, hetu!

5 No au susa ae mate soa-neu ei nenggetuu-nemberiim mara, huu naa de au adenu Timotius neni Tesalonika neti, mita fo ai bisa bubuluk ei bei mamahere makandoo neu Lamatuak, do taa. Huu au atanggengge, boso losak nitur malangga ina-huun neti fo soba-dou ei ena, fo masadea laꞌo ela Lamatuak. Mete ma dadi talo naa, na, ai ue-osan fai bakahulun hie-hie a mesan!

6 Hatematak ia Timotius fali numa Tesalonika mai ena, ma neni hara liik fo tao nala ai mamahoko. Ana tui nae, ei mamahere taa-taa neu Karistus, ma esa sue esa nakandoo. Boe ma ana nafada nae, ei oo dalem hii nalan seli neu ai boe, sama leo ai oo dalen hii nalan seli neu ei boe.✡Nedenuk kara Tutuin 18:5

7-8 Toranoo nggara ein! Leo mae ai nai ia mameda berak, nahuu hambu susa-sonak sudi numa bee mai ta baꞌu anak, tehuu Timotius tutuin tao nala ai mamahoko malan seli. Huu hatematak ia, ai bubuluk ena mae, ei nemeheherem matea makandoo neu Lamatuak.

9 De ai moke makasi noꞌun seli neu Manetualain no dale nemehokok, nahuu ei tungga maherek kana. 10 Hatu-leledon ai hule-haradoi taa-taa, fo mete ma bisa, na, ai bei bisa matonggo mia ei bali. Ai nau fee nenorik fo tao matetu do makadaik ei laꞌe-neu Manetualain eno-dala masodan.

11 Ai mamahena neu Manetualain, ita Aman, ma Yesus Karistus, ita Lamatuan, fo soi dalak losa ai bisa neti matonggo mia ei bali. 12 Ai moke-hule fo Lamatuak tao ei tamba masue-laik lena-lenak bali. Ma ei oo sue neu basa hatahorir, sama leo ai sue ei boe. 13 No dalak naa, Lamatuak natetea ei dalem, fo leo-laꞌo ndoos ma lolo-laok, losa faik fo Lamatuak Yesus fali mai no hatahorin nara, na, ei mambariik nai ita Aman Manetualain matan, ta lemba-masaa sala-singgok hata-hata.