1 Neu hatahorir hahae tao mue-anggik ena bali, kota Epesus naa lende fali leo biasa. Basa de Paulus nakabua nala hatahori kamaherek kara maruma naa, fo natetea dalen nara. Basa naa, boe ma ana nateꞌa fo ana laꞌo neni profensi Makedonia neu. 2 Numa naa, ana laꞌo ndule basa nggorok kara, fo natetea hatahori kamaherek kara dalen. Ana tao talo naa, losa ana maso neni nusa Yunani neu. 3 Ana leo numa naa losa bulak telu. Basa boe ma, ana nahehere fo nae saꞌe ofak neni profensi Siria neu, tehuu ana namanene nae, hatahori Yahudir rala harak, fo rae tao risan. Ana namanene nala naa, boe ma ana ta nau saꞌe ofak nakandoo neni profensi Siria neu. Dadi ana laꞌo fali nesik kada profensi Makedonia.

4 Hambu hatahori bubua anak esa tungga Paulus. Ndia Timotius; papa Pirus anan Sopater numa kota Berea mai; hatahori dua ruma kota Tesalonika mai, nade Aristarkus ma Sekundus; hatahori esa numa kota Derbe mai, nade Gayus; ma hatahori dua ruma profensi Asia mai, ndia Tikikus ma Trofimus.

5-6 Basa boe ma au (ndia Lukas fo mana surak susurak ia), atonggo ua seluk Paulus numa kota Felipi nai profensi Makedonia. Boe ma Paulus ana nunin nara laꞌo rakahuluk, fo ara reu rahani ai nai kota Troas, nai tasi serik. Neu hatahori Yahudi fai ina-huun Paska*Susurak Yunani surak nae, ‘fair malole Roti Ta Pake Laru Taꞌik’, sosoa-ndandaan nae, ‘fair ina-huuk sadia feta Paska’. nara seli ena, ai dua ngga saꞌe ofak meni kota Troas miu. Faik naa, ai faik lima numa ofa lai. Neu ai losa numa Troas, ai konda numa ofak mai. Boe ma ai matonggo seluk mia nonoo laen nara, de ai leo numa naa doon menggu esa.

7 Faik naa, laꞌe-ndaa fai Menggu. Paulus naketu ena nae, “Toranoo nggara ein. Beꞌe-mai au ae laꞌo akandoo.” De basa ai hatahori kamaherek lalaꞌen makabua fo mae miꞌa-minu sama-sama. Huu Paulus nae laꞌo ena, de ana kokolak no ai losa leꞌodae fai baꞌe dua. 8 Ai makabua numa uma esa tadak katelun lain. Leꞌodaen naa ara dede lambu noꞌun seli.

9 Faik naa, hambu taꞌe anak esa nade Yutikus,†Tungga susura dedeꞌa Yunani, ‘Eutikus’, ita lees tae, ‘Yutikus’. nanggatuuk numa dinela lain. Ana oo tungga nenene Paulus boe. Tehuu doo-doo boe ma matan namabera de ana sunggu seli. Nggengger neu ma ana tuda numa dinela naa mai. De maten tutik ka. 10 Basa boe ma Paulus konda, de holu nala taꞌe anak naa. Ana kokolak nae, “Boso mamataꞌu. Ana ta mate.” 11-12 Ai basa ngga mamahoko, nahuu taꞌe anak naa nasoda fali numa mamaten mai. Basa boe ma ara roo falik kana neni uman neu. De ai basa ngga hene fali meni uma tadak lain miu, boe ma manggatuuk miꞌa-minu sama-sama. Basa de Paulus tuti kokolan losa beꞌe-mai huhuan. Neu ledo tiik ka, boe ma ai mateꞌa fo mae laꞌo.

13 Basa boe ma ai mala harak fo ai mabaꞌe dalak losa ai matonggo seluk nai kota esa, nade Asos. Boe ma ai saꞌe ofak fo meni Asos miu. Tehuu Paulus kada laꞌo eik neni naa neu.

14 Neu ai matonggo mia Paulus numa Asos, boe ma ana hene ofak lain mai, de ai makandoo meni kota Metilene miu. 15 Numa Metilene mai, ai saꞌe ofak makandoo. Neu beꞌe-main, ai deka mia pulu esa, nade Kios. Neu bei-nesan, ai matalangga ofak neni pulu Samos neu. Neu esan, boe ma ai losa kota Miletus. 16 Tehuu Paulus hii nalan seli ena fo losa lai-lai nai Yerusalem, fo ana bisa tungga fai ina-huuk Pentakosta nai naa. Boe ma ana ta nau nggari heni ledo-fai fo ndaꞌe neni kota Epesus neu, nahuu ana ta naena fai lelak ena bali.

17 Dadi numa Miletus, Paulus helu harak neu lasi-lasi Karisten nara marai Epesus fo ara mai ratonggo roon. 18 Neu ara losa, boe ma Paulus nafada sara nae, “Basa toranoo nggara ein. Ei basa ngga bubuluk au leleo-lalaꞌon ena, mulai numa fai makasososan au tabu eing neu profensi Asia losa hatematak ia. 19 Ei oo bubuluk au tao ue-osa fafandek lima-eing nai ei taladam mara, tehuu au ta akadedemak ita au aong. Nai au ue-osang ia, au luu-oeng tuda noꞌuk ka, boe ma lemba-asaa ala susa-sonak ta baꞌu anak. Au oo hambu doidosok noꞌuk ka boe, numa hatahori Yahudir nanae manggaraun mai. 20 Neu au anori ei, au kalua heni basa hata fo au bubuluk neulauk, fo au fee sara reu ei. Au oo anori ei ta no bii-bambik boe. Au oo uni uma esa-esak uu fo fee nesenedak neu hatahorin nara laꞌe-neu Lamatuak hihii-nanaun boe. 21 Au oo afada neu hatahori Yahudir, ma hatahori ta Yahudir boe ae, ara muste hahae numa sira sala-singgon mai, fo fali tungga Manetualain. Ma ara oo muste ramahere neu Lamatuak Yesus, fo mana naena haak parenda ita boe.

22 Au ae afada talo ia: hatematak ia au ae uni Yerusalem uu, nahuu Manetualain Dula-dalen nuni neni au fo uni naa uu. Au tungga a mesan, leo mae au ta bubuluk hata dadi neu au nai naa. 23 Tehuu numa kota esa mai neni kota esa neu, Manetualain Dula-dale Malalaon nafada nakahuluk au ena nae, neu ko au maso bui ma lemba-asaa ala doidosok noꞌun seli nai naa. 24 Au bubuluk tebe talo naa ena, nahuu Lamatuak Yesus ndia fua-ndae ue-osa ia neu au arung lain, fo au uu tui-bengga Hara Lii Malole ae, Manetualain sue-lai ita, ma Ana oo natudu Ndia dale susuen naa neu ita boe. Mete ma au ta tungga Ndia hihii-nanaun fo tao abasa Ndia ue-osan ia, na, au ameda au masodang ia ta naena sosoak hata-hata.✡2 Timotius 4:7

25 Hatematak ia au bubuluk ae, ei ta mete-mita au ena bali. Eir ia ndia au fee nenorik doon seli ena laꞌe-neu dalan talo bee fo maso dadi miu Lamatuak nufanelun nara. 26-28 Huu naa de nenene matalolole. Au tao akababasak au ue-osang soa-neu ei ena. De hatematak ia ei mesa ngga ndia muste tao ue-osa ia nakandoo. Mete ma hambu hatahori numa ei mai, fo ta maso dadi neu Lamatuak nufanelun, na, ei ndia maselu-mataa! Au salang ta naa. Masaneda matalolole, ee! Au afada memak basa Lamatuak hihii-nanaun nara neu ei ena. Ta hambu hata esa boe na fo au afunin neu ei. Dadi ei muste manea matalolole ei mesa ngga leleo-lalaꞌom, ma lopo-linu matalolole basa hatahorir fo Manetualain Dula-dale Malalaon nadenu ei manea. Boso lilii-ndondou te Lamatuak Yesus maten ena fo bae ketu hatahorir raa nenik Ndia daa heli-helin. Ana oo henggenee nala ei boe, fo ei loti-mete sara sama leo mana lolo lopo-linu ndia bibi lombon nara.

29 Dadi hatematak ia au laꞌo ela ei. Tehuu masanedak, ee! Neu ko hambu hatahori mai fo ranori sadi ndaa nai ei taladam mara. Ara mai sama leo busa kakikik kara, fo maso reni bibi lombo lalaen neu. 30 Hambu hatahori mana masapepekok leo naak numa dea mai. Tehuu masanedak, te hambu ketuk oo toda numa ei taladam mara mai boe. Ara fee nenori pepeko-lelekok neu ei. Ara nau fo hatahori tungga kada sira. Huu naa de ara soba-soba leꞌa hatahorir fo boso tungga Yesus bali. 31 Dadi ei muste manea matalolole ei aom. Boso lilii-ndondou, te au leo sama-sama ua ei doon teuk telu ena. Au oo fee nenori-nefadak soa-neu ei hatu-leledon, ma ta ameda au mamanggung boe. Au luu-oeng tuda noꞌuk ka ena, nahuu ei.

32 Hatematak ia ita tae tabinggak ena. Dadi au loo lima ei basa ngga meni Manetualain neu, fo Ana lopo-linu ei. Ma ei muste toꞌu mahere tebe-tebe basa hata fo au afada neu ei ena numa makasososan mai laꞌe-neu Manetualain dale susuen. Manetualain naena koasa fo fee bebeꞌi-barakaik neu ei. Ndia oo helu-bartaa ena fo fee babaꞌe-babatik neu Ndia hatahorin nara boe. Dadi mete ma ei tungga makandoo neu Ndia no dale lolo-laok, na, ei oo hambu Ndia babaꞌe-babatin boe.

33 Neu au tao ue-osang numa ei taladam mara, au ta dale hedi haꞌi ei hata-hetom esa boe na. Au ta soba oke ei bua lilo mbilam, do lilo fulak, do bualoꞌa-papakek, do sudi hata a mesan. 34 Ei oo bubuluk boe, neu au leo ua ei, au tao ues fafandek lima-eing mita fo au bisa asoda. Ta soa-neu kada au mesa ngga, tehuu au oo tao ue-osa fo fee neu sira mana tungga au, soda-ladan nara boe. 35 Dadi no basa dalak kara iar, au atudu dalak ena fo ei oo tungga tulu-fali neu hatahori kasian fo ta mana hambu daik kara boe. Masaneda matalolole Lamatuak Yesus kokolan nae, ‘Malole lenak ita fee lena heni ita simbo.’ ”

36 Paulus kokolak basa talo naa, boe ma ana sendek luu-langgan, de hule-haradoi sama-sama no sara, ma noke-hule fo Lamatuak nanea sira basa sara. 37-38 Boe ma basa sara dalen nara sona, nahuu Paulus kokolak ena nae, neu ko ara ta ratonggo ro ndia ena bali. Dadi neu ara rae rabinggak ena, boe ma ara holu rala Paulus de ara idun, ma ara buꞌi rasakekedun. Basa boe ma ara rafuli ai‡“Ai” nai ia naa, ndia Lukas, mana surak susurak ia, Paulus ma sira nonoon. meni ofak miu.