10
Noh no Yafet tititi-nonosin nara
1 Basa faa moꞌok, boe ma Noh anan nara hambu tititi-nonosik. Ndia tititi-nonosik numa Sem, Yafet, ma Ham mai.
2-5 Yafet tititi-nonosin nara, ndia Gomer, Magog, Madai, Yawan, Tubal, Mesek, ma Tiras. Esa-esak no sira dedeꞌan, sira leon, ma sira dae oe heli-helin.
Gomer tititi-nonosin nara, ndia Askenas, Rifat ma Togarma.
Yawan tititi-nonosin nara, ndia Elisa, Tarsis, Kitim hatahorin nara, ma Dodanim,*Hambu susura lasik ketuk rae ‘Rodanim’. fo mana leo numa tasi tatain nara.
Ham tititi-nonosin nara
6 Ham tititi-nonosin nara, sira Kus, Misraim, Put, ma Kanaꞌan.†Kus naa, ndia ‘Etiopia’, Misraim ndia ‘Masir’.
7 Kus tititi-nonosin nara, sira Seba, Hawila, Sabta, Raema ma Sabteka.
Raema tititi-nonosin nara, sira Syeba ma Dedan.
8 Kus ana toun, ndia Nimrod. Ndia naa, malangga musu ta hohoꞌak makasososan. 9 Ndia ta hohoꞌan hambun numa MANETUALAIN mai, losa ana oo dadi neu mana sombu ta hohoꞌak mateꞌen boe. Huu naa de hatahorir rasiꞌe kokolak rae, “Naa fo o dadi muu mana sombu ta hohoꞌak sama leo Nimrod, fo ana hambu ndia ta hohoꞌan numa MANETUALAIN mai.” 10 Makasososan Nimrod toꞌu koasa mulai numa Babel, Erek Akad, ma Kalne mai. Basa naar rai Sinear.‡Sinear naa, Babel naden laen. Hatematak ia, mamanak naa nai Iran ma Irak. 11 Numa naa mai, ana koasa tamba no Asyur. Basa boe ma ana nambaririik kota Niniwe, Rehobot-Ir, Kala, 12 ma Resen manai Niniwe no Kala taladan. Basa naar, kota moꞌok kara.
13 Misraim tititi-nonosin nara, sira hatahori Ludim, Anamim, Lehabim, Naftuhim, 14 Patrusim, Kasluhim ma Kaftorim. Hatahori Kasluhim naa, ndia hatahori Filistin nara bei-baꞌin.
15 Kanaꞌan ana ulun, ndia Sidon. Kanaꞌan oo dadi neu hatahori Het, 16 Yebusi, Amori, Girgasi, 17 Hiwi, Arki, Sini, 18 Arwadi, Semari ma Hamati, bei-baꞌin nara.
Kanaꞌan tititi-nonosin nara ratanggela losa dook ka 19 losa sira daen too-lanen nara mulai numa Sidon seku neni Gerar neu losa Gasa. Numa naa mai, neni Sodom, Gomora, Adma, Seboim losa Lasa neu.
20 Sira basa naar, Ham tititi-nonosin. Esa-esak no sira dedeꞌan, sira leon, ma sira dae oe heli-helin.
Sem tititi-nonosin nara
21 Yafet kaꞌan Sem, dadi hatahori Eber bei-baꞌin nara.§Hambu hatahori malelak ketuk rae Eber naa, ndia ‘Ibrani’.
22 Sem tititi-nonosin nara, sira Elam, Asyur, Arpakhsad, Lud ma Aram.
23 Aram tititi-nonosin nara, sira hatahori Us, Hul, Geter ma hatahori Mas.*Mas naden laen, ndia ‘Mesek’.
24 Arpakhsad anan, Sela. Sela anan, Eber.
25 Eber hambu ana touk dua. Uluk, hambu nadek Pelek, (fo sosoa-ndandaan ‘bingga-baꞌek’), nahuu lelek naa, hatahorir rabingga-baꞌek nai dae-bafok. Fadin nade Yoktan.
26 Yoktan tititi-nonosin nara, sira Almodad, Selef, Hasar-Mawet, Yerah, 27 Hadoram, Usal, Dikla, 28 Obal, Abimael, Syeba, 29 Ofir, Hawila ma Yobab. Sira basa sara iar, Yoktan tititi-nonosin nara.
30 Sira mamana leleon nara raa, mulai numa Mesa mai, seku neu losa Sefar, ndia mamana mbuku letek nai boboak dulu.
31 Sira basa sara raa, Sem tititi-nonosin nara. Esa-esak no sira dedean, sira leon, ma sira dae oe heli-helin.
32 Basa naar, Noh tititi-nonosin nara, esa-esak no sira leo heli-helin. Neu faa moꞌok hahae, sira iar ndia sasarak tao rasofe dae-bafok.