1 Dadi ei muste manori nenori malelak lenak bali, nahuu ei manori mala nenorik oka-huun nara laꞌe-neu Karistus dook ka ena. Huu naa de hatematak ia, hae manori laꞌi-laꞌik ka nenorik oka-huun laꞌe-neu hatahori muste laꞌo ela sira sala-singgon nara; nenorik laꞌe-neu hatahorir ramahere neu Manetualain; 2 nenorik laꞌe-neu sarani; nenorik laꞌe-neu ndae limak fo simbok Manetualain Dula-dale Malalaon; nenorik laꞌe-neu Manetualain neu ko tao nasoda falik hatahori mates; ma nenorik laꞌe-neu hatahorir neu ko rasare mbali Manetualain fo simbok neketu-neladin nae, see ndia bole nasoda nakandoo no Ndia, ma see ndia taa. 3 Mete ma Manetualain fee luas, na, mai ita hene kalas manai lain leo. Huu au nau fee nenorik laꞌe-neu hata fo lenak bali.

4-6 Naa te hambu hatahori ketuk fo ralela Karistus nenorin ena, ma rameda Manetualain babaꞌe-babatin ena, losa Ana fee Ndia Dula-dale Malalaon neu sara. Ara bubuluk Manetualain Dedeꞌa-kokolan ena, ma ara rameda Ndia koasan ena. Koasa naa, neu ko Ana paken, mete ma dae-bafok fai mateꞌen losa ena. Leo mae talo naa oo, tehuu ara nggari heni sira nemeheheren ena, ma rasadea laꞌo ela Karistus ena boe. Huu naa de, ta bisa dadi ara hambu dalak fo bisa fali roke ambon, boe ma leo-laꞌo malole ro Manetualain bali. Mete ma hatahorir ta nau sale dalen do tuke tein nara talo naa, na, sama leo sira mesa kasa paku rakanisa seluk Manetualain Anan neu ai ngganggek lain, basa de ara rakamamae-rakatitiik kana nai hatahori noꞌuk kara matan.

7 Hatahori matak leo naak, sama leo dae fee buna-boak ta neulauk. Naa te mete ma udan mai ena, na, dae neulauk bisa fee buna-boak ma neni nanalak soa-neu hatahori mana ue daek. Boe ma Manetualain nakonda babaꞌe-babatik fo tao nala dae naa, buna-boan boe namanoꞌu. 8 Tehuu hatahori mana masadea Karistus naa, sama leo dae mana fee kada dila-nggauk. Ma dila-nggauk kara raa, ta reni nanalak hata esa boe na. Ta dook ka boe ma Manetualain mai fo fee hukun neu dae naa. Basa de Ana hotu heni buna-boak fo ta mana neni nanalak hata esa boe na.✡Tutui Makasososak 3:17-18

9 Toranoo susue nggara ein! Leo mae au kokolak barakaik ka faa talo naa, tehuu au oo bubuluk boe ae, ei ta masadea Karistus. Huu ei mamahere neun ena, ma ei leo-laꞌom oo hambu buna-boan neulauk boe. 10 De masaneneda te Manetualain dalen ndoos. Ma Ana ta lilii ei mbuse titim. Ei maue-osa mahere ena fo tulu-fali Ndia hatahorin nara, ma sue-lai sara. Numa fai bakahulun mai, memak ei makalalaꞌok Ndia ue-osan ena. Ma ei bei tao talo naa. 11 Tehuu hatematak ia, au nau ei maue-osa mahere lenak bali fo tao tungga makandoo talo naa, losa basan. No dalak naa, neu ko ei simbo mala basa hata fo neulauk, fo ei mamahenan numa Manetualain mai. 12 Sadi ei boso dadi miu mbera-barek! Ei muste haꞌi netuduk numa hatahorir mai fo mana ramahere Manetualain dook ka ena. Huu ara ramahena rakandoo neun, losa ara simbo rala hata fo Ana helu-bartaan ena.

13-16 Haꞌi netuduk leo ita baꞌin Abraham. Lele uluk Manetualain ndara fangga hehelu-bartaak noon pake sumba-sook. Mete ma hatahori dae-bafok soꞌuk sumba-sook, ana nasiꞌe pake Manetualain naden fo Manetualain dadi neu ndia sakasiin, nahuu Manetualain naa lena heni ndia. Mete ma hambu dedeꞌak, basa hatahorir bubuluk rae, hatahori naa kokolan, tebe, nahuu ana sumba-soo pake Manetualain naden ena. Naa, memak hatahori dae-bafok dalan. Tehuu neu Manetualain sumba-soo no baꞌi Abraham, Ana pake Ndia nade heli-helin, nahuu ta hambu esa lena heni Ndia boe na. Ana helu-bartaa nae,

Manetualain helu-bartaa basa talo naa, boe ma baꞌi Abraham namahere ma namahena nakandoo neu Manetualain, leo mae dook ka, dei fo ana simbo hata fo Manetualain helu-bartaak ena. 17 No dalak naa, ita bubuluk ena, mete ma Manetualain tao hehelu-bartaak no Ndia hatahorin, Ana ndara fangga hehelu-bartaak naa pake sumba-sook fo dadi neu tanda nemeherek nae, hata fo Ana helu-bartaak naa, memak tetebes ma ta neni lali-lalik. 18 Hambu matak dua, ndia ta bisa lali-lali. Kaesan, ndia Manetualain hehelu-bartaan. Ma kaduan, ndia Ana pake sumba-sook dadi neu tanda nemeherek soa-neu hehelu-bartaak naa. Dadi mete ma Manetualain helu-bartaa nala matak esa, neu ko Ana tao natetun, nahuu Ana ta bisa kokolak pepekok. Huu naa de ita dalen hae babati no Ndia hehelu-bartaan.

Ita talaik teu sangga masoi-masodak nai Ndia ena, de hatematak ia ita tahani a fo tamahena takandoo neu kada Ndia. 19 No dalak naa, ita dalen nara lino-lendek ena, sama leo ofak esa kalua numa rii mai ena, de see nai mamana seseek. Huu ita tamahena neu Yesus Karistus, fo mana dadi neu ita malangga anggaman demak mateꞌen ena. Fai bakahulun, ndaa no hatahori Yahudir fai malolen, malangga anggama demak mateꞌen maso nesik tema ririndik mana babata Kama Malalaok Mateꞌen, fo nasare mbali Manetualain numa naa.✡Malangga Anggamar Hohoro-lalanen 16:2 20 Tehuu hatematak ia, Yesus maso nakahuluk ena fo nasosoi dalak fee ita. Huu Ndia oo malangga anggama demak mateꞌen fo mata-aok esa leo Malkisedek lele uluk naa boe. Tehuu Yesus ta neni babanggak lena heni malangga anggama mata-ao raak, nahuu Ana ta hahae nita nakalalaꞌok Ndia ue-osan.✡Sosoda Kokoa-kikiok kara 110:4