8
Manetualain pake Karistus fo ndara fangga hehelu-bartaa beuk, lolen lena heni hehelu-bartaa raak
1 De au kokolang nenenin lenak talo ia: hatematak ia ita taena malangga anggama demak mateꞌen ena fo ta neni babanggak lena heni bakahuluk kara raa. Hatahori naa, ndia Yesus. Ana nanggatuuk toꞌu parenda nai nusa tetuk do inggu temak, nai Manetualain mana Demak Mateꞌen boboa konan.✡Sosoda Kokoa-kikiok kara 110:1 2 Ma Ana nakalalaꞌok Ndia uen nai mamana hule-haradoi huuk ta neni babanggak. Mamanak naa, Manetualain mesa kana ndia adun, ta hatahori dae-bafok ndia taon.
3 Malangga anggama demak mateꞌen nasiꞌe neni fefeek ma tunu-hotuk soa-neu Manetualain. Huu naa de Yesus oo muste neni tunu-hotuk boe. 4 Tehuu Yesus ta nakalalaꞌok Ndia uen nai dae-inak. Huu nai dae-inak, hambu malangga anggama mana neni fefeek ma tunu-hotuk soa-neu Manetualain ena, tungga baꞌi Musa hohoro-lalanen. 5 Ara rakalalaꞌok sira uen numa Laak Huhule-haradoik, rupan sama leo mamana huhule-haradoi huuk manai nusa tetuk do inggu temak. Neu baꞌi Musa nae tao Laak naa, Manetualain fee nesenedak neun nae, “Masaneda matalolole! O muste tao tebe-tebe tungga mata-aok sama leo mamana huhule-haradoi huuk fo neu faik Au atudun neu o numa letek naa lain ena!”✡Kalua numa Masir mai 25:40 6 Tehuu Yesus uen ta neni babanggak lena heni malangga anggama raak kara. Huu hatematak ia, Manetualain ndara fangga hehelu-bartaak lolen lenak ena. Hehelu-bartaak fo lolen lenak naa, ndia Ana pake Yesus dadi lelete fo hatahori dae-bafok bisa mole-dame ro Manetualain.
7 Lele uluk Ana ndara fangga hehelu-bartaak no baꞌi Musa, neu Ana nakonda hohoro-lalanek kara raa. Leo mae talo naa oo, tehuu hatahori dae-bafok ta bisa leo-laꞌo lolo-laok tebe-tebe tungga hohoro-lalanek kara raa boe. Huu naa de ara ta bisa malole ro Manetualain. De hatematak ia parluu hambu hehelu-bartaak fo lolen lenak bali. 8 Fai bakahulun Manetualain kaꞌi-ore Ndia hatahorin nara, nahuu ara lena-langga laꞌi-laꞌik ka neu Ndia hohoro-lalane raan. Neu Ana ta nakataka nala ena bali, boe ma namanasa, de Ana nafada nae,
“Nenene matalolole, Au ia, Lamatuak, fo naena haak parenda basa-basan!
Neu ko Au ndara fangga hehelu-bartaa beuk
ua hatahori nusa Israꞌel,
ma leo Yahuda.
9 Neu ko hehelu-bartaak fo Au ae ndara fangga ua sara raa,
ta sama no hehelu-bartaa raak fo fai bakahulun Au ndara fangga
ua sira bei-baꞌin nara ena.
Fai bakahulun Au toꞌu liman nara,
fo nuni sara kalua numa dae Masir mai.
Tehuu ara ta tao tungga
hata fo ara helu-bartaa basak ro Au ena.
Huu naa de Au ta nau tao matak neu sara ena bali.
10 Hehelu-bartaak fo Au ae ndara fangga ua hatahori nusa Israꞌel naa,
isin talo ia:
Neu ko Au tao Au hohoro-lalaneng neu sira duduꞌan dale.
Neu ko Au surak Au parendang neu sira dalen dale.
Boe ma Au dadi uu sira Lamatuan
ma ara dadi reu Au hatahoring.
11 Neu ko ara ta parluu ranori sira nonoon nara bali,
ma sira toranoon nara rae,
‘Ei muste malela Lamatuak!’
Huu basa sara ralela Au no malole,
mulai numa kadiꞌi anan seli losa moꞌok mateꞌen mai.
12 No Au ae atudu Au dale kasian neu sara,
huu naa de Au lilii heni
basa sira sala-singgon lalaꞌen.”✡Yermia 31:31-34
13 Neu Manetualain kokolak nae, Ana nau ndara fangga hehelu-bartaa beuk no sara, sosoa-ndandaan nae, hehelu-bartaa raak, ta neni pakek ena. Ta dook ka bali te mopo henin ena.