1 Au afada dedeꞌak bebeik kara iar neu ei ena, mita fo ei ta makaheok numa Au mai. 2 Neu ko hatahori Yahudir husi heni ei numa sira uma huhule-haradoin mai. Ta talo kada naa, te neu ko hambu tembo-lelek esa boe, mete ma hatahorir tao risa ei, ara duꞌa rae ara tao tatao neulauk soa-neu Manetualain. 3 Ara tao talo naa soa-neu ei, nahuu ara ta ralela Au no tetebes. Ara oo ta ralela Au Amang boe. 4 Tehuu Au afada dedeꞌak bebeik kara iar neu ei ena, fo mete ma dedeꞌak bebeik kara iar dadi ena, na, neu ko ei bisa masaneda mae, Au afada akahuluk memak ei ena. Au bei ta afada ndia fai bakahulun, nahuu Au bei sama-sama ua ei.”

5 Yesus fee nenorik tamba nae, “Hatematak ia Au fali uni Ndia fo mana nadenu Au uni dae-bafok ia mai. Tehuu ta hambu numa ei mai matane Au mae, ‘Lamatuak nae bee neu?’ 6 Ei dalem mara rameda hedis, nahuu Au afada dedeꞌak ia neu ei ena. 7 Tehuu hata fo Au afadak neu ei naa, tetebes. Mete ma Au uu, na, naa lolen lenak soa-neu ei. Mete ma Au ta uu, na, Mana Makalalaꞌok naa ta mai natudu dalak soa-neu ei. Tehuu mete ma Au uu, na, Au akondan mai soa-neu ei.

8 Mete ma Ana mai ena, na, neu ko Ana natudu hatahorir marai dae-bafok ia nae, sira dalen ma tatao-nonoꞌin nara raa, sala. Ana fufudi sara fo tungga eno-dala masodak tetebes. Ma Ana oo fee nesenedak neu sara boe nae, neu ko Manetualain nae naketu-naladi sira dedeꞌan nae, sira raa, ndaa, do sala. 9 Mana Makalalaꞌok naa natudu salan nara, nahuu ara ta ramahere neu Au. 10 Ana oo natudu eno-dala masodak tetebes boe. Neu ko ei ta mete-mita Au bali, nahuu Au fali uni Au Amang uu. Huu naa de Mana Makalalaꞌok naa mai fo nggati Au. 11 Ana oo natudu boe nae, Manetualain nae naketu-naladi hatahori dedeꞌan no tetuk, nahuu Manetualain naketu-naladi dedeꞌak soa-neu nitur malanggan ena, fo mana parenda nai dae-bafok ia.

12 Bei hambu dedeꞌak noꞌuk ka fo Au bei nau afada ei, tehuu ei bei ta bisa malela hatematak ia. 13 Tehuu mete ma Dula-dalek mana natudu hata fo ndoos mai ena, na, Ana nakalalaꞌok mita fo ei bisa malela basa hata fo ndoos. Ana ta kokolak numa kada Ndia ao heli-helin mesa kana mai, tehuu Ana nafada hata fo Ana namanenen numa Au Amang mai. Ana oo nau nafada ei boe, hata fo doo-doo te neu ko ana dadi. 14 Ana nau nakadedemak Au, nahuu Ana nae buka basa hata fo ndoos laꞌe-neu Au, ma natudun neu ei. 15 Basa hata fo mana dadi neu Au Amang enan oo dadi neu Au enang boe. Huu naa de Au kokolak bebeik kara ia ae, Manetualain Dula-dalen neu ko nae buka basa hata fo ndoos laꞌe-neu Au, ma natudun neu ei.”

16 Yesus nafada tamba nae, “Ta dook ka bali te ei ta mete-mita Au ena. Tehuu ta dook ka boe te ei mete-mita falik Au bali.”

17 Basa naa, Ndia ana nunin nara ketuk rakokola aok rae, “Tao hata de Lamatuak kokolak nae, ‘Ta dook ka bali ei ta mete-mita Au ena. Tehuu ta dook ka boe te ei mete-mita falik Au bali.’ Ma tao hata de Ana kokolak nae, ‘Au ae uni Au Amang uu’?” 18 Boe ma ratatane aok rae, “Tao hata de Ana kokolak nae, ‘Ta dook ka bali’? Ita ta talela.”

19 Yesus bubuluk ena ara rae ratane dedeꞌak esa neu Ndia. Boe ma Ana kokolak nae, “Bebeik kara Au kokolak ae, ‘Ta dook ka bali, ei ta mete-mita Au. Tehuu ta dook ka boe te ei mete-mita falik Au bali.’ Ei matatanek mae leo naa, hetu?

20 Malole boe, mete ma ei nau sangga bubuluk talo naa. Au oo ae afada neu ei talo ia boe: neu ko ei buꞌi ma dalem mara sona, tehuu hatahori laen nara marai dae-bafok ia ramahoko. Leo mae ei dalem mara sona talo naa, tehuu neu ko ei dalem mara dadi ramahoko rasafali. 21 Naa, sama leo inak esa nameda hedis nae bonggi. Dalen nameda hedis dei, nahuu ndia susa-sonan mai ena. Tehuu mete ma ana bonggi basa kakanak naa ena, ndia susa-sonan mopon tutik kana. Te ndia dalen dadi namahoko, nahuu hambu hatahori beuk bonggin nai dae-bafok ia ena. 22 Ei oo leo naak boe. Hatematak ia ei buꞌi ma dalem mara sona. Tehuu doo-doo boe ma Au mai tiro seluk ei, basa de ei dalem mara dadi namahoko nasafali. Mete ma dedeꞌak naa dadi ena, na, ta hambu hatahori esa boe na, bisa nakatataak nala ei dalem nemehokon.

23 Mete ma Au mai seluk bali, na, ei ta matatane hata esa boe na neu Au ena. Tebe! Au afada seluk bali neu ei ae, mete ma ei moke hata a mesan numa Au Amang mai menik Au nadeng, na, neu ko Ana taon talo naa fee ei.*Hule-haradoi “menik Au nadeng” hambu sosoa-ndandaan nae, ita hule-haradoi tungga Yesus hihii-nanaun. Ita taena haak fo “teni Yesus naden” mete ma ita dadi teu Ndia hatahorin, mete ma ita leo-laꞌo takaesa takandoo to Ndia, mete ma ita nenene neu Ndia, ma mete ma ita tamahere tae, Ana mate fo koka heni ita sala-singgon nara. Dadi “teni Yesus naden” naa, ta sama no kada “seseik Yesus naden” leo. 24 Losa hatematak ia, ei bei ta moke hata-hata menik Au nadeng. Dadi moke leo, fo ei simbon. No dalak naa, ei dalem mara bisa ramahoko tetebes.”

25 Yesus kokolak tamba nae, “Losa hatematak ia, Au asiꞌe anori ei pake lololek kara. Tehuu neu ko hambu faik, fo Au fee nenorik ta pake lololek bali. Huu Au nau kokolak ledo-ledo laꞌe-neu Au Amang. 26 Mete ma faik naa mai ena, na, ei mesa ngga ndia hule-haradoi fo moke aom neu Au amang menik Au nadeng. Au hae hule-haradoi bali soa-neu ei. 27 Au Amang sue-lai ei, nahuu ei sue-lai Au. Ma ei oo mamahere tebe-tebe boe mae, Manetualain ndia nadenu Au. 28 Fai bakahulun Au laꞌo ela Au Amang, fo leo taak nai dae-bafok ia. Tehuu hatematak ia Au ae laꞌo ela dae-bafok ia, fo uu leo falik ua Ndia.”

29 Yesus ana nunin nara ramanene rala naa, boe ma rafada rae, “Lamatuak hatematak ia kokolak ledo-ledo ena, ma ta fee nenorik pake lololek kara bali! 30 Ai mamahere tebe-tebe ena, Lamatuak bubuluk basa dedeꞌak kara. Hatahorir ta parluu ratane hata-hata bali neu Lamatuak, nahuu Lamatuak bubuluk nakahuluk hata fo ara rae ratanek, ma neselun leo beek. Naa, natudu ai nae, Lamatuak memak numa Manetualain mai.”

31 Boe ma Yesus natane sara nae, “Tebe, do? Hatematak ia ei mamahere neu Au, do? 32 Talo ia. Baꞌu anak bali, ndia doo faa ia, ei basa ngga malai matanggela. Hatahori esa-esak nalai laꞌo ela Au, fo neu keke nai ndia mamana heli-helin. Leo mae talo naa, tehuu Au ta mesa ngga, nahuu Au Amang sama-sama no Au. 33 Au afada dedeꞌak bebeik kara iar ena neu ei, mita fo ei dalem mara bisa linok, nahuu ei makaesa mia Au. Hatahorir marai dae-bafok ia, neu ko rakasususak ma tao doidoso ei. Tehuu matetea ei dalem mara, te Au tao asenggi basa koasar ena marai dae-bafok ia!”