1 Basa faik hida, boe ma Yesus natudu aon seluk bali numa dano Tiberias tatain. Ndia tutuin talo ia: 2 Faik naa, Yesus ana nunin hatahori hitu rakabua. Sira raa, ndia:

3 Simon Petrus nafada ndia nonoon nara nae, “Au ae uu nggari puꞌak.”

Boe ma ara raselu rae, “Hou! Ai oo tungga boe.” Basa boe ma ara reni dano tatain reu. De ara saꞌe ofak fo reu sangga iꞌak. Tehuu leꞌodaen naa, ara ta puꞌa rala hata esa boe na.✡Lukas 5:5

4 Neu beꞌe-mai huhuan, boe ma Yesus nambariik neu dano tatain. Tehuu ana nunin nara ta bubuluk Ndia naa, Yesus. 5 Boe ma Ana nanggou nahere fo natane sara nae, “Kaꞌa sara ein, ee! Ta mala iꞌak, do?”

Ara raselu rae, “Rouk, Kaꞌa! Ai ta mala esa boe na.”

6 Boe ma Ana nafada sara nae, “Soba nggari puꞌak naa neu ofak boboan. Neu ko ei hambu.”

Boe ma ara tao tungga. De ara hambu iꞌak. Tehuu iꞌak kara raa noꞌun seli, losa ara ta bisa leꞌa puꞌak naa fali neni ofak dale neu.✡Lukas 5:6

7 Au oo numa naa boe. Au ia, ana nunik fo Yesus suek. Boe ma au afada Petrus ae, “Awii! Ndia naa, ita Lamatuan!”

Simon Petrus namanene au kokolang, boe ma ana olu falik ndia badun, de nakaboku neni dano dale neu fo nae nane mada lai neu. 8 Ofak naa nai rarain kada meter natun esa numa mada lai mai. Boe ma ndia nonoon nara sefe ofak fali neni mada lai neu, ma leꞌa reni puꞌak naa fo sofek no iꞌak numa ofak ikon mai.

9 Losa mada lai, boe ma mete-mita aꞌi kaak mana mbilak numa naa. Nai aꞌi lain, hambu iꞌak. Ma hambu roti boe. 10 Yesus nafada sara nae, “Meni iꞌak hida numa ei bei fo puꞌa malak bebeik kara naa mai.”

11 Basa boe ma Simon Petrus hene fali neni ofak lain neu, de ana leꞌa puꞌak naa neni mada lai neu. Puꞌak naa sofek no iꞌa moꞌok. Iꞌak dedesin 153. Leo mae iꞌak noꞌuk ka talo naa, tehuu puꞌak naa ta sida sana.

12 De Yesus noke sara nae, “Mai fo miꞌa dei!”

Ara bubuluk ena rae, Ndia naa, sira Lamatuan. Huu naa de ara ta rambarani ratane rae, “Kaꞌa ia, see?” 13 Boe ma Yesus haꞌi nala roti ma iꞌak, de fee sara.

14 Naa, ndia laꞌe katelun Yesus natudu aon neu Ndia ana nunin nara, neu Ana nasoda fali numa mamaten mai ena.

15 Neu ara raꞌa basa, Yesus natane Simon Petrus nae, “Wee, Simon, Yohanis anan. Talo bee? O sue Au lena heni o nonoom mara iar sue Au, do?”

Ana naselu nae, “Tebe! Lamatuak bubuluk au sue Lamatuak.”

Boe ma Yesus helun nae, “Mete ma talo naa, na, lolo matalolole Au bibi lombo anang nggara fo ara hambu raꞌa.”

16 Boe ma Yesus natane seluk kana nae, “Simon, Yohanis anan. Talo bee? O sue Au, do?”

Ana naselu nae, “Tebe! Lamatuak bubuluk ena au sue Lamatuak.”

Boe ma Yesus helun nae, “Mete ma talo naa, makaboi matalolole Au bibi lombong nggara.”

17 Basa boe ma Yesus natane seluk kana bali nae, “Simon, Yohanis anan. Talo bee? O sue Au, sama leo Au ia, o nonoom, do?”

Boe ma Petrus dalen sona memak, nahuu Yesus natane laꞌe telu ena nae, “O sue Au, do?” De ana naselu nae, “Lamatuak ndia bubuluk basa dedeꞌak. Dadi Lamatuak bubuluk ena mae, au ia, Lamatuak nonoon.”

Boe ma Yesus helun nae, “Mete ma talo naa, na, lolo matalolole Au bibi lombong nggara fo ara hambu raꞌa. 18 O bisa malela Au kokolang bebeik kara iar ena, do? Au oo nau afada talo ia boe: fai bakahulun neu o bei taꞌe anak, na, o masiꞌe pake badu ma pake kalikeek, boe ma o laꞌok muni bee muu a mesan, tungga o hihiim. Tehuu mete ma o mambalasi ena, na, neu ko loo o limam fo hatahori laen paꞌa limam mara, nenik o kalikee heli-helim. Basa boe ma ara leꞌa reni o muni mamanak esa muu fo o ta nau muu.” 19 (Yesus kokolak talo naa, fo nafada Petrus laꞌe-neu hata fo neu ko ana dadi nai ndia aon. Neu ko Petrus mamaten naa natudu Manetualain ta neni babanggan.)*Nai rarain teuk ka-96 M, hambu malangga saranik esa, nade Klement numa kota Roma mai, ndia surak nae, hatahorir hala risa Petrus. Nai rarain teuk ka-212 M, hambu malangga sarani laen, nade Tertulian, ndia surak nae, ara paku londa Petrus nai ai ngganggek. Ma hambu nesiꞌek tungga nggarei tutuin numa lele uluk mai nae, neu ara rae paku londa Petrus neu ai ngganggek, nai rarain teuk ka-64 losa ka-65 M, Petrus noke fo ara londan no langgan nai dae. Naa dadi, nahuu ana nameda ndia ta nandaa mate no langgan nai lain, sama leo Yesus.

Basa boe ma Yesus nafada Petrus nae, “Mai fo dadi muu Au hatahoring leo!”

20 Faik naa, Petrus hekor nasafali de leuk dea. Boe ma mete-nita au tungga dua sara dean. Au ia, ndia ana nunik fo Yesus suek. Au oo ndia anggatuuk nai Yesus boboan, neu ai miꞌa feta Paska boe. Au ia, ndia atanen ae, “Lamatuak, ee! See ndia neu ko ana seꞌo heni Lamatuak?”✡Yohanis 13:25 21 Neu Petrus mete-nita au, boe ma ana natane Yesus nae, “Lamatuak, ee! Lamatuak kokolak laꞌe-neu au bebeik kara ia ena. Tehuu ndia ia talo bee?”

22 Yesus nafada Petrus nae, “Leo Au nau fo ana kada nahani nai ia, losa Au fali ma, na, o dedeꞌam ta naa. Nenenin lenak ndia, o muste masaneda hata fo Au heluk neu o bebeik kara naa, ndia: mai fo dadi muu Au hatahoring leo.”

23 Yesus ana nuni laen nara ramanene Yesus kokolak talo naa, huu naa de ara mulai rakokola aok rae, “Yohanis naa, ana ta mate.” Naa te Yesus ta kokolak talo naa. Ana kokolak naa, ndia: “Leo Au hihiing fo ana kada nahani nai ia, losa Au fali mai, na, o dedeꞌam ta naa.”

24 Ana nunik fo Yesus kokolak naa, ndia au, Yohanis. Au ndia tui basa dedeꞌak kara iar fee ei. Au ndia mete-ita no au mata heli-heling. Basa de au surak basa-basan. Ma ita bubuluk ena tae, hata fo au afadak neu ei naa, tetebes.

25 Ma bei hambu dedeꞌak laen noꞌuk ka fo Yesus taok. Mete ma hatahorir soba surak basa-basan, mulai numa Yesus nakalalaꞌok ue-osan losa basan, na, au duꞌa ae, dae-bafok esa katematuan oo ta bisa fua nala buku raa lalaꞌen boe.