1 Basa naa Yesus fee nenorik nae, “Manetualain totoꞌu parendan naa, sama leo lololek ia: hambu tenu osik esa kalua bei liꞌu nee huhua anan, neu sangga hatahorir fo raue nai ndia osi anggor. 2 Ana hambu hatahori mana maue-osar, boe ma rala harak fo raue-osa faik esa, babaen doi lilo fulak esa, tungga belin fo rateme ralak.*Susura Malalaok dedeꞌa Yunani nai ia surak nae, “doi dinari esa”. Dinari esa belin, ndia hatahori mana maue-osa esa nggadin fai katemak esa. Raketu basa, boe ma ana nadenu sara reu raue nai ndia osin. 3 Liꞌu sio huhuan, boe ma ana kalua bali neni pasar neu. Numa naa, ana mete-nita hatahori ketuk ranggatuuk nado nggoa-nggoak ka. 4 Boe ma ana nafada sara nae, ‘Wee, kaꞌa nggara ein, ee! Ei nau tao ues nai au osing, do? Neu ko au bae ei no mandaak.’ Ara ramanene talo naa, boe ma rakahuꞌu a, de reu raue-osa. 5 Liꞌu salahunu dua ledo tetun, ma liꞌu telu ledo bobon, tenu osik kalua numa uman mai, fo neu sangga hatahori mana maue-osa bali. 6 Ledo bobok ena, fama te liꞌu lima, boe ma tenu osik naa kalua bali. Ana mete neu-mai te bei hambu hatahori kada rambarii hiek. Boe ma natane sara nae, ‘Tao hata de ei kada mambariik ta tao hata esa boe na numa huhuak ka losa ledo bobok ia?’

7 Hatahorir raa raselu rae, ‘Papa, ee! Ta hambu hatahori fee ai ues.’

Boe ma tenu osik naa nae, ‘Mete ma talo naa, na, ei miu tao ues nai au osing leo!’

8 Losa liꞌu fo hahae tao ues, boe ma tenu osik naa nanggou nala ndia mandor, de nae, ‘Manggou hatahori mana maue-osar raa fo bae sira esa-esak doi ue-osan. Mulai numa hatahori mana maso bakahitok losa hatahori mana maso makasososak naa.’✡Malangga Anggamar Hohoro-lalanen 19:13; Tui Seluk laꞌe-neu Dala Masodak 24:15

9 Boe ma mandor naa nanggou hatahorir raa mulai numa mana tao ues liꞌu lima ledo bobon. Ana fee sara esa-esak simbo doi lilo fulak esa. 10 Basa de mandor naa nanggou hatahori mana maue-osa laen nara, losa mana maue-osa ndia liꞌu nee huhua anan. Mana tao ues numa huhuan mai duꞌa rae, neu ko sira simbo noꞌun lena heni hatahori fo mana tao ues numa liꞌu lima ledo bobon mai. Naa te sira oo, simbo doi lilo fulak esa boe. 11 Ara simbo rala talo naa, boe ma unggu-remu neu tenu osik naa rae, 12 ‘Aweꞌ! Ta bisa talo ia, papa! Sira mana maik bakadean seli, tao ues kada liꞌu esak ka. Tehuu ai mana maik numa huhua anan mai, maue-osa fafandek lima-ein losa ai mbusen nara faa! Tehuu talo bee de papa bae ai sama leo sira raa?’

13 Boe ma tenu osik naselu neu sira esa nae, ‘Kaꞌa, ee! Au ta panake kaꞌa, nahuu kaꞌa mesa kana ndia nakaheik tao ues faik esa, na, babaen doi lilo fulak esa. Tebe, hetu? Dadi au bae tungga ita nekeketun, hetu? 14 Malole lenak kaꞌa simbo nala kaꞌa doin fo fali muu ngga leo. Mete ma au ae fee hatahori fo mana tao ues bakahitok numa kaꞌa mai, noꞌun sama no au feek neu kaꞌa, na, au haak naa. 15 Au ae pake au doing talo bee a mesan tungga kada au hihiing. Talo bee de kaꞌa nasakele nahuu au dale maloleng?’

16 Leo naak oo, neu Manetualain dadi neu manek soa-neu hatahorir boe, Ana bala hatahorin nara tungga Ndia hihiin. Dadi hatahori mana mai bakahitok, neu ko ana simbo babaꞌen sama leo hatahori mana mai makasososak. Ma hatahori mana mai makasososak, neu ko ana simbo ndia babaꞌen sama leo hatahori mana mai bakahitok.”✡Mateos 19:30; Markus 10:31; Lukas 13:30

17 Basa boe ma Yesus asa laꞌo reni Yerusalem reu. Neu ara bei laꞌok numa dalak, Ana nanggou nala ana nunin nara fo rakabua mesa kasa roon. Boe ma Ana nafada seluk bali nae, 18 “Ei nenene, ee! Hatematak ia ita tae teni Yerusalem teu. Tehuu nai naa ara seꞌo heni Au, Hatahori Dae-bafo Isi-isik ia uni malangga anggama Yahudi malanggan nara, ma meser anggamar uu. Boe ma ara raketu hukun mates neu Au. 19 De ara loo lima Au uni hatahori feꞌek ta mana nalela Manetualain uu. Boe ma ara kokolak rakamamaek Au. Ma ara poko-femba rakalulutu Au ao-mbaang. Basa dei fo ara tao risa Au nai ai ngganggek lain. Memak Au mate tetebes. Tehuu neu bei-nesan, Au asoda fali numa mamates mai.”

20 Basa boe ma Sabadeus saon neni Yesus neu, sama-sama no anan Yakobis ma Yohanis. Boe ma ana sendek luu-langgan ma fee hada-horomatak fo kokoe nakandoo Yesus.

21 De Yesus natanen nae, “Mama parluu hata?”

Boe ma inak naa nafada nae, “Talo ia, Papa! Au hule mete ma Papa nanggatuuk toꞌu parenda ena, na, Papa soꞌuk nala au anang dua ia, fo ara oo tungga toꞌu parenda sama-sama ro Papa boe. Au hule fo Papa nanggatutuuk esa neu Papa boboa konan, ma esa neu Papa boboa kiin.”

22 Yesus namanene nala inak naa nonoken, boe ma Ana kokolak no Yakobis ma Yohanis nae, “Ei ta bubuluk hata fo ei mokek. Neu ko Au hambu doidosok noꞌuk ka. Dadi talo bee? Ei duꞌa mae, ei oo mabeꞌi lemba-masaa doidosok naa sama-sama mia Au boe, do?”

Dua sara raselu leli-belak kana rae, “Bisa malan seli Papa, ee!”

23 Boe ma Yesus naselu bali nae, “Memak, neu ko ei oo lemba-masaa doidosok naa, sama leo Au boe. Tehuu neu ko see ndia nanggatuuk nai Au boboa konan do boboa kiin, naa Au ta ndia aketu. Manetualain ndia naena haak fo naketun. Ana naketu memak kana ena, see ndia nanggatuuk nai mamanak naa.”

24 Neu ana nuni laen kasalahunuk kara ramanene rala dua sara nonoken talo naa, boe ma ara rasakele. 25 Tehuu Yesus nanggou nala basa sara, boe ma Ana nae, “Talo ia! Ei bubuluk ena, hetu? Hatahori moꞌo-inahuuk kara mana toꞌu parenda rasiꞌe tuni-ndeni sira rau-inggun, losa ara ta bisa rakaundak. Ma malangga nusak kara fo ta mana malela Manetualain, ara fee parenda lena-lenak, losa sira rau-inggun nara ta bisa botik rala langgan nara. 26 Tehuu ei ta bole tao talo naa! See numa ei mai nau dadi neu hatahori moꞌo-inahuuk, ana muste dadi neu ata-dato fo naono-lalau hatahori laen.✡Lukas 22:25-26 27 Ma see ndia nau dadi neu malanggan, ana muste tao aon sama leo ata-dato.✡Mateos 23:11; Markus 9:35; Lukas 22:26 28 Nenene, ee! Au oo leo naak boe. Au, Hatahori Dae-bafo Isi-isik ia, mai fo aono-lalau hatahori. Au ta mai fo hatahori naono-lalau Au. Tehuu Au mai fo fee Au sodang katematuan, fo tefa-soi hatahori noꞌuk ka numa sira sala-singgon nara mai.”

29 Basa naa, Yesus asa laꞌok rakandoo. Neu ara kalua numa kota Yeriko mai, hambu hatahori noꞌuk ka laꞌok tungga sara. 30 Numa naa, hambu hatahori pokek dua ranggatuuk numa dalak tatain. Neu dua sara ramanene rae, mana laꞌok nesik naa, ndia Yesus numa Nasaret mai, boe ma ara bolu rahere rae, “Lamatuak! Dauk tititi-nonosin, ee! Ai mahani a doon seli ia neu Lamatuak ena! Kasian neu ai dei!”

31 Hatahorir ramanene rala dua sara bolu talo naa, boe ma ara kaꞌi sara rae, “Weeh! Ei dua ngga boso mamue!”

Tehuu dua sara kii-bolu rahere bali rae, “Lamatuak, ee! Dauk tititi-nonosin, ee! Kasian neu ai dei!”

32 Neu Ana namanene talo naa, boe ma Ana nambarii taak, de natane sara nae, “Ei nau Au tao hata fee ei?”

33 Ara raselu rae, “Lamatuak, ee! Tulun fo ai bisa mete-mita dei!”

34 Yesus namanene nala kokolan nara talo naa, boe ma dalen tuda kasian neu sara. De Ana nafaroe matan nara, boe ma ara mete-rita tutik kana. Basa boe ma ara laꞌok tungga Yesus.