1 Basa boe ma Yesus no ana nunin nara losa dano Galilea boboan seri numa mamanak esa nade Gerasa. 2-6 Numa mamanak naa, hambu touk esa nitu saꞌen de namulu. Ana leo nai rates sara. Hatu-leledon ana nadaba oek ndule basa mbumbukuk kara marai naa no hola-hola, ma ana kii-bolu nakandoo. Ana tutu nakahina ao-inan pake batu. Barakain sudi selik kana. Ta hambu hatahori esa boe na bisa futu-paꞌan, leo mae pake rante besi boe. Laꞌi-laꞌik ka hatahorir paꞌa lima-ein renik rante besi ena, tehuu ana tao ketu rante besi naa ma tao natepa heni besi numa ein mai. Ndia barakain sudi selik kana, de ta hambu hatahori esa boe na bisa nakatataka nalan.

Neu Yesus asa konda numa ofak mai, de heta ein reu mada lai boe ma hatahori kamuluk naa mete-nita sara numa dook ka mai. De ana kalua numa rates ara mai, boe ma nalaik neu sendek luu-langgan neu Yesus matan. 7-8 Yesus mete-nita hatahori naa talo naa, boe ma Ana kokolak nae, “Heeh, nitu! O kalua numa hatahori ia neu leo!”

Boe ma hatahori naa kii-bolu nahere nae, “Weeh! O mae tao hata neu au! Au bubuluk O ia, memak Yesus, Manetualain mana koasa mateꞌen Anan. Au hule fo O boso tuni-ndeni au!”

9 Boe ma Yesus natanen nae, “O nadem see?”

Hatahori naa naselu nae, “Au nadeng Legion, huu ai noꞌun seli, nok bali soldadur batalion noꞌuk ka.”

10 Basa de nitur pake hatahori naa fo noke Yesus boso nadenu sara kalua numa mamanak naa mai.

11 Hatahorir ranea bafi lalae esa deka-deka no mamanak naa. Bafir raa, basa sara fama te rifun dua. Ara sangga nanaꞌak rai letek tatain. 12 Boe ma nitur raa roke-hule Yesus rae, “Madenu ai maso mini bafir raa miu.”

13 Yesus namanene nala nonoken nara raa, boe ma nakaheik. De nitur raa kalua numa hatahori naa neu, boe ma ara maso reni bafir raa reu. Bafi rifun kaduak kara raa ralaik ralenggu-pikok, boe ma ara tuda tungga mbiak tatain reni dano dale reu, de basa sara mate rasamele reu naa.

14 Hatahori mana manea bafir raa mete-rita mandadik naa, boe ma basa sara ramataꞌu ralan seli. De ara ralaik reu rafada hatahori ndule nggorok kara marai naa. Boe ma hatahori noꞌuk ka kalua mai fo rae mete hata mandadik ena. 15 Ara mai ratonggo ro Yesus, boe ma ara mete-rita hatahori fo nitu saꞌek naa nanggatuuk numa naa. Duduꞌan namaneu ena, de ana pake bua-loꞌa ena. Hatahorir raa mete-rita naa, boe ma ramataꞌu, nahuu ara bubuluk rae, see ndia bisa husi kalua heni nitu noꞌuk kara numa hatahori naa neu, na, ndia memak hatahori ta hohoꞌak tebe-tebe. 16 Boe ma basa sara bengga ndule nggorok rae, sira mete-rita no sira mata deꞌe heli-helin hatahori kamuluk naa hai ena, ma bafir raa fo mate rasamele ena. 17 Boe ma hatahori nggorok marai naa, ara mai roke-hule Yesus fo laꞌo ela sira mamanan.

18 Neu Yesus nae hene ofak dale neu, boe ma hatahori fo bebeik kara nitu saꞌek naa mai noke-hule Yesus fo ndia oo nau tungga boe.

19 Tehuu Yesus ta nau. De nafadan nae, “Malole lenak o fali muu ngga fo mafada o nufanelum lalaꞌen, hata fo Manetualain taon fee o ena. Ma mafada mae, Manetualain sue nalan seli neu o.”

20 Basa boe ma hatahori naa fali neu ngga, de ana laꞌo ndule nusa kota salahunuk fo rasiꞌe roken rae, ‘Dekapolis’. Ana tui hata fo Yesus tao neu ndia ena. Basa hatahori mana ramanene tutuin naa, ara heran ralan seli, de rae, “Memak tetebes!”

21 Basa boe ma Yesus asa saꞌe ofak fali reni dano tatain seri reu. Neu ara konda numa ofak lain mai, te hatahori noꞌun seli mai rakarumbu ralan. 22 Numa naa oo hambu hatahori esa boe nade Yairus. Ndia naa, malanggan uma huhule-haradoik nai kota naa. Neu ana mete-nita Yesus, boe ma ana sendek luu-langgan neu Yesus matan, 23 de ana kokoen nae, “Papa, ee! Au ana feꞌong bei fo teuk salahunu dua, ana namahedi ela kada faa maten. Papa tulun mai fo tao mahain dei.”*Susura Malalaok dedeꞌa Yunani surak nae, “Papa tulun mai fo ndae limam neun, mita fo ana hai fali, ma nasoda.” Nai naa, “roke ndae limak” sosoa-ndandaan nae, “Tulu-fali tao mahain.” Ana fetok naa teun, dedeꞌa Yunani surak nai lalane ka-42.

24 Boe ma Yesus tungga Yairus neni uman neu.

Neu ara mulai laꞌok, boe ma hatahori noꞌuk ka tunggan de raseseti numa boboa kii-konan mai.

25 Nai hatahori noꞌuk kara raa taladan, hambu inak esa hambu bulak ta tungga doon teuk salahunu dua ena. 26 Ana nabasa tali-doin ma hata-heton nara fo bae neu doter asa. Tehuu ta hambu esa bisa tao nahain boe na. Hedin naa, kada mai-maik nakandoo. 27-29 Inak naa namanene noꞌuk ka laꞌe-neu Yesus ena. De ana naseseti nai hatahori noꞌuk kara raa taladan fo nau deka-deka neu Yesus numa dean mai. Ana duduꞌa nai dalen dale nae, “Sadi au bisa afaroe laꞌe kada Yesus badun, neu ko au hai!”

Neu ana nafaroe laꞌe Yesus badun, medak neu te ndia daa mana mboꞌak naa hahae tutik kana. Ana nameda ana hai tebe-tebe ena.

30 Hatematak naa oo Yesus nameda hambu barakaik kalua numa ao-inan mai. Boe ma Ana mbali dea, de mete neu hatahori noꞌuk kara raa. De Ana natane nae, “Ei see ndia nafaroe laꞌe Au badung, ee?”

31 Ana nunin nara raselu rae, “Papa mesa kana mete leo. Hatahori noꞌuk kara iar esa naseseti no esa na. Naa te Papa natane nae, ‘See ndia nafaroe laꞌe Au badung?’ ”

32 Tehuu Yesus leleuk ndule basan, fo sangga bubuluk bebeik kara ia see ndia nafaroe Ndia. 33 Inak naa namanene nala Yesus natane talo naa, boe ma namataꞌu nalan seli. De ana sendek luu-langgan neu Yesus matan fo ana mboꞌa nae, “Papa! Au ndia afaroe laꞌe Papa badun.”

34 Boe ma Yesus naselu neun nae, “Huu mama namahere tebe-tebe neu Au, de mama hai ena. Hatematak ia mama fali uma muu no dale lino-lendek leo, huu mama susa-sonan basan ena.”

35 Yesus bei kola-kola talo naa, boe ma hatahori esa numa Yairus uman mai, de nafada nae, “Kasian ee, ana feꞌok maten ena. Dadi boso makasosotak Papa Meser bali. Ana hae neu bali.”

36 Tehuu Yesus ta tao matak hatahori naa kokolan. De Ana nafada Yairus nae, “O hae mamataꞌu, ee! Mamahere neu kada Manetualain.” 37 Boe ma Yesus laꞌo ela ana nunin laen nara. Tehuu Ana nuni no Petrus, Yakobis ma fadin Yohanis, de ara laꞌo rakandoo. 38 Neu ara losa Yairus uman, ara mete-rita hatahori noꞌuk ka ramue-anggik, ma ramanene ara buꞌi rakarereu. 39 Yesus maso uma dale neu, de natane sara nae, “Tao hata de ei mamue-anggik ma buꞌi makarereu talo ia? Kakanak ia ta mate. Ana kada sunggu a.”

40 Ara ramanene Yesus kokolak talo naa, boe ma basa sara hika rakatitiik kana.

Boe ma Ana nadenu basa sara dea reu. Ana noke nala kakanak naa aman no inan ma Ndia ana nunin telu sara, de basa sara maso reni kakanak naa kaman dale reu. 41 Boe ma Yesus toꞌu nala kakanak naa liman, de Ana kokolak neu kakanak naa pake sira dedeꞌa Aram nae, “Talita kum!” (Sosoa-ndandaan nae, “Ana feꞌok! Mambadeik leo!”)

42-43 Medak neu ma, ana fetok naa nambadeik, de ana mulai laꞌok. Boe ma Yesus nadenu inan nae, “Fee kakanak ia naꞌa leo!”

Basa hatahorir fo mana mete-rita hata fo mandadik naa, heran bali-bali. Tehuu Yesus kaꞌi nahere sara nae, “Ei boso mafada esa boe na mae, Au asoda falik kana numa mamaten mai ena!”