1 Basa boe ma Bibi Lombo Ana naa buka segel nomer kahitun. Medak neu ma, basa nusa tetuk do inggu temak isin nara, benggenee. Ta hambu esa boe na nahara do nanggariti, fama te losa liꞌu seserik esa. 2 Boe ma au mete-ita ata hitu ruma nusa tetuk do inggu temak mai. Ara rambariik rakandoo nai Manetualain matan, rahani a fo raono-lalaun. Sira esa-esak simbo rala toꞌin.

3 Basa boe ma au mete-ita ata laen esa bali numa nusa tetuk do inggu temak mai. Ata naa nambariik neu mei naa matan fo ara pake hotu ai daa kaboo menik. Ana toꞌu manggo lilo mbilas esa, ndia ara rasiꞌe paken fo tao ai daa kaboo menik neun. De ara feen ai daa kaboo menik noꞌun seli, fo ana babalik kana no Manetualain hatahorin nara huhule-haradoin. Basa boe ma ana neni manggo lilo mbilas naa sama leo tunu-hotu kaboo menik, fo taon neu mei lilo mbilas naa lain manai kadera man-parenda naa matan.✡Amos 9:1; Kalua numa Masir mai 30:1; 3 4 Boe ma ana hotu ai daa kaboo menik naa. De boo menin lume losa Manetualain matan sama-sama no basa huhule-haradoik ruma Manetualain hatahorin nara mai. 5 Basa naa, ata naa haꞌi nala aꞌi numa mei naa mai, fo tao nasofe manggo lilo mbilas naa. Basa boe ma ana mbia heni manggo naa neni dae-inak mai. Medak neu ma, au mete-ita ndelas nanggahadok ratuti-ranatok kii-konak kana nai dae-inak. Ma lalai nasapaparak ratuti-ranatok, ma dae nanggenggo moꞌon seli.✡Malangga Anggamar Hohoro-lalanen 16:12; Yeskiel 10:2; Kalua numa Masir mai 19:16; Dae-bafo Beuk 11:19; 16:18

6 De ata kahituk kara raa ruma nusa tetuk do inggu temak mai rahani a fo nau fuu sira toꞌin.

7 Neu ata nomer kaesan fuu ndia toꞌin, boe ma uda eis ma aꞌi mana babalik no daak, mboꞌa neni dae-inak mai. Basa naꞌu momodok rai bee a mesan aꞌi naꞌa heni sara. Mete ma ita baꞌe dae-inak neu babaꞌek telu, na, kada babaꞌek esa ndia aꞌi naꞌa henin. Mete ma ita baꞌe basa ai huuk kara marai dae-inak ia neu babaꞌek telu, na, kada babaꞌek esa ndia aꞌi naꞌa henin.✡Kalua numa Masir mai 9:23-25; Yeskiel 38:22

8 Neu ata nomer kaduan fuu ndia toꞌin, boe ma hambu buas esa nok bali lete moꞌok mana mbilak, mbesi neni tasi dale neu, losa tasi babaꞌek esa numa babaꞌen telu mai dadi neu daak. 9 Boe ma babaꞌek esa numa babaꞌek telu mai numa basa bandar marai tasi dale mai, mate basa sara. Ma babaꞌek esa numa babaꞌek telu mai numa basa ofak kara marai tasi dale oo rakalutu boe.

10-11 Neu ata nomer katelun fuu ndia toꞌin, hambu nduu moꞌok esa tuda numa lalai mai, sama leo aꞌi mbele moꞌo mana mbilak esa. Nduuk naa naden, ‘Malik’. Neu ana tuda, boe ma oe mana nai leer ma oe matak kara, dadi malik. De hatahori mana rinu oe naa, noꞌuk ka mate. Mete ma ita baꞌe basa leer ma oe matak kara rai dae-inak ia neu babaꞌek telu, na, kada babaꞌek esa ndia malik.✡Yesaya 14:12; Yermia 9:15

12 Basa boe ma ata nomer kahaan naa fuu ndia toꞌin. Medak neu ma ledo, bulan, ma nduuk kara dadi neu makiuk, huu hambu fefembak. Dadi ndaa fai leledon, babaꞌek esa numa babaꞌek telu neu fai leledok mai, dadi neu makiuk, nahuu ledo ta nasaꞌa neulauk ena bali. Ma ndaa fai leꞌodaen, babaꞌek esa numa babaꞌek telu neu fai leꞌodaek mai, dadi neu makiu-makahatuk, nahuu bulan ma nduuk kara ta rasaꞌa neulauk ena bali.✡Yesaya 13:10; Yeskiel 32:7; Yoel 2:10, 31; 3:15

13 Boe ma au botik matang, de mete-ita mbui marambua moꞌok esa lambu seku nai lalai. Ana kii nae, “Besa-besa, ee! Neu ko sosoe moꞌok daka nala basa hatahorir fo mana leo-laꞌo nai dae-inak. Huu bei ela ata laen telu ruma nusa tetuk do inggu temak mai, bei ta fuu sira toꞌin.”