21
Yohanis mete-nita lalai no dae-ina beuk
1 Basa boe ma au mete-ita lalai beuk ma dae-ina beuk, te lalai raak ma dae-ina raak, mopo sara ena. Tasi oo ta sana ena boe.✡Yesaya 65:17; 66:22; 2 Petrus 3:13 2 Boe ma au mete-ita Manetualain kota malalaon, ndia Yerusalem Beuk, konda numa nusa tetuk do inggu temak mai. Kota naa naole nala ena, nok bali baroit inak, nau neu soru ndia saon.✡Yesaya 52:1; Dae-bafo Beuk 3:12; Yesaya 61:10 3 Basa de au amanene hara moꞌok esa numa kadera man-parenda naa mai nae,
“Mete matalolole!
Mulai numa hatematak ia mai, Manetualain Uman nai hatahori dae-bafok talada heon.
Mulai numa faik ia mai, Manetualain leo-laꞌo sama-sama no Ndia hatahorin nara.
Ana dadi neu sira Manetualain ena.
Ma ara dadi reu Ndia anan nara ena.
Neu ko Ana no sara taa-taa.
Ma Ana sama-sama no sara losa doon naa neu.✡Yeskiel 37:27; Malangga Anggamar Hohoro-lalanen 26:11; 12
4 Neu ko Ana hari namada basa luu-oen nara,
fo ara ta buꞌi rakarereu bali.
Huu nai naa ta hambu kamahedik bali.
Ma nai naa ta hambu mana matek bali.
Basa mana tao susa-sonak numa lele uluk mai, ta hambu sara ena bali.
Basa mana tao doidosok numa lele uluk mai, mopo sara ena.”✡Yesaya 25:8; 35:10; 65:19
5 Boe ma Ndia fo mana nanggatuuk nai kadera man-parenda naa kokolak nae, “Mete matalolole, te Au tao ala basan dadi beuk ena.” Basa de Ana kokolak seluk no au bali nae, “Surak leo! Basa hatahorir bisa ramahere Au Dedeꞌa-kokolang ia, huu basa iar, memak tebe ena!”
6 Boe ma Ana nafada au bali nae,
“Basa-basan fo Au helu-bartaak numa lele uluk mai naa, dadi ena.
Huu Au ia,
numa Alfa mai losa Omega.
Ma Au ia,
numa A mai losa Z.
Basa-basan numa Au mai,
mulai numa makasososan mai losa babasan.
Basa hatahorir fo mana dale madak kara,
neu ko Au fee sara rinu no mudak
numa oe matak mana neni masodak naa mai, mita fo hatahori nasoda no ndoos.✡Yesaya 55:1
7 Basa hatahorir fo mana rakatataka tungga Manetualain eno-dala ndoon,
neu ko ara simbo rala basa babaꞌe-babatik kara iar.
Huu neu ko Au dadi uu sira Manetualain,
ma sira dadi reu Au anang nggara.✡2 Semuel 7:14; Sosoda Kokoa-kikiok kara 89:26-27
8 Tehuu hambu hatahori ketuk oo, neu ko neni piru henik,
reni tasi aꞌi balerang fo mana mbila ta kala matek naa dale reu boe.
Ndia leo hatahori kamataꞌuk,
hatahori mana masadea Yesus,
hatahori manggenggeok,
hatahori fo mana laꞌok sala no hatahori ta sira soa toun do sira sao inan,
mana makanisa hatahori
mana songgo-tangguk,
mana teka-dokik,
ma mana pepeko-lelekok.
Neu ko basa sara neni piru henik kara reni tasi aꞌi dale reu,
fo hatahorir rae, ‘mamana mamates kaduan.’ ”
Yohanis mete-nita kota Yerusalem beuk
9 Basa boe ma au mete-ita esa numa ata kahituk kara raa maruma nusa tetuk do inggu temak mai, fo fai bakahulun ana toꞌu bokor neni isik no Manetualain nasa-odadedein. Ana mai natonggo no au, de kokolak nae, “Mai ia dei! Au ae atudu o baroit inak, fo mana nae sao nala Bibi Lombo Ana.”
10 Boe ma Manetualain Dula-dalen maso nai au dale, de ata esa numa nusa tetuk do inggu temak mai, nuni neni au uni lete mandema esa uu. Numa naa, ana natudu au kota Yerusalem, ndia Manetualain kota malalaon. Kota naa konda numa nusa tetuk do inggu temak mai.✡Yeskiel 40:2 11 Kota naa, lolen seli! Hambu saꞌa manggahadok kalua neu-mai numa Manetualain manula-manapun mai, sama leo batu intan manggahadok. Losa basa kota naa dadi manggaledok. 12 Hambu tembo moꞌo demak eko-feo kota naa, no lelesu moꞌok salahunu dua. Hambu ata salahunu dua ruma nusa tetuk do inggu temak mai oo, ranea lelesur raa boe. Nai lelesu kasalahunu duak kara raa neni surak leo Israꞌel kasalahunu duan nara naden.*Tungga hatahori mana malela laꞌe-neu Susura Malalaok, nomer salahunu dua naa, nomer mana matudu nomer mandaik laꞌe-neu hatahori dae-bafok. 13 Lelesu moꞌok telu rasare dulu. Telu rasare muri. Telu rasare kii. Ma telu bali rasare kona.✡Yeskiel 48:30-35 14 Tembok naa nambariik nai batu netehuu moꞌok salahunu dua. Nai batu esa-esak neni surak Bibi Lombo Ana nedenu kasalahunu duan nara naden. Sira ndia raono-lalau neu Ndia nai dae-bafok.
15 Boe ma ata fo mana kokolak no au naa, ana toꞌu nala ai uꞌukuk esa numa lilo mbilas mai, fo nau uku kota naa no lelesu moꞌon ma tembon.✡Yeskiel 40:3 16 Ana uku nakahuluk kota naa tembon boboan haa sara. Narun, loan, ma deman, basa sara sama, ndia kilo meter 2.220.†Susura Malalaok dedeꞌa Yunani surak nae, stadia 12.000. 17 Basa de ana uku tembok naa katen, hambu meter 65, tungga hatahori dae-bafok uꞌukun.‡Susura Malalaok Dedeꞌa Yunani surak nai ia nae, “peihon 144”. Peihon esa naa, sama leo hasta esa. Dadi 12 x 12, ndia 144. De mete ma 12 sosoa-ndandaan nae, matetu-mandaik, na, 144 sosoa-ndandaan nae, matetu-mandaik mateꞌen. 18 Tembok naa, neni taok numa batu manggadilak mabelir mai, naden yaspis. Ma basa hata nai kota naa dale, neni taok numa lilo isik mai, fo saꞌan naꞌanda sama leo titiro.
19 Batu netehuuk kasalahunu duak kara raa, neni hetik no batu manggadilak mabelir mata-matak. Batu kaesan pake batu yaspis, saꞌan momodok. Nomer kaduan, pake batu nilam, saꞌan modo-afuk. Nomer katelun, pake batu mirah, saꞌan mbilas. Nomer kahaan, pake batu samrud, saꞌan momodok. 20 Nomer kaliman, pake batu unam, neni tadak no soklat mutik. Nomer kaneen, pake batu sardius, saꞌan mbilas. Nomer kahitun, pake batu ratna cempaka, saꞌan uni lilok. Nomer kafalun, pake batu beril, saꞌan momodo afu-afuk. Nomer kasion, pake batu krisolit, saꞌan sangga unik ka. Nomer kasalahunun, pake batu krisopras, saꞌan sangga momodok. Nomer kasalahunu esan, pake batu lasuardi, saꞌan momodo tasi oek. Nomer kasalahunu duan, pake batu kecubung, saꞌan mbila maranggeok. 21 Ma lelesu moꞌo kasalahunu duak kara raa, tao sara ruma poemata deꞌek salahunu dua mai. Lelesu esa taon numa poemata deꞌek esa mai. Ma kota naa okofoon, taon numa lilo mbilas isik manggadilak mai, sama leo titiro.✡Yesaya 54:11-12
22 Ma au leleuk, tehuu ta hambu Uma Huhule-haradoik nai kota naa. Huu Manetualain mana koasa mateꞌen ma Bibi Lombo Ana naa rai naa taa-taa. Huu naa de hatahorir reu rakaluku-rakatele memak neu Sara. 23 Kota naa oo ta parluu ledo no bulan fo tao manggaledon boe, nahuu Manetualain mandela-masaꞌan ndia tao manggaledok nai naa. Ma Bibi Lombo Ana naa, dadi sama leo lambu mana mbilak ena.✡Yesaya 60:19-20 24 Hatahorir ruma basa hatahori nusa-nusak kara marai dae-bafok, neu ko mai laꞌo-laꞌo nai manggaledok naa dale. Mane-manek kara marai dae-inak oo reni hata-heto ta hohoꞌan nara reni naa reu boe.✡Yesaya 60:3 25 Nai naa, ta hambu leꞌodaek ena. Huu naa de ara ta parluu kena lelesu mana maso kota neu. 26 Neu ko ara oo maso kota naa dale, reni basa hata fo neulauk ma basa hada-horomatak numa basa nusak kara marai dae-inak mai reu boe.✡Yesaya 60:11 27 Tehuu mana ta bole maso neni naa neu, ndia basa hata fo manggarauk, nok bali: basa mana songgo-tanggur, mana hohongge-lelena, ma mana pepeko-lelekok kara. Mana bole masok kara, ndia kada hatahorir fo naden nara neni surak kara rai Bibi Lombo Ana susuran fo neni surak nadek numa hatahori mana nasoda taa-taa no Manetualain.✡Yesaya 52:1; Yeskiel 44:9
✡21:1 Yesaya 65:17; 66:22; 2 Petrus 3:13
✡21:2 Yesaya 52:1; Dae-bafo Beuk 3:12; Yesaya 61:10
✡21:3 Yeskiel 37:27; Malangga Anggamar Hohoro-lalanen 26:11; 12
✡21:4 Yesaya 25:8; 35:10; 65:19
✡21:6 Yesaya 55:1
✡21:7 2 Semuel 7:14; Sosoda Kokoa-kikiok kara 89:26-27
✡21:10 Yeskiel 40:2
*21:12 Tungga hatahori mana malela laꞌe-neu Susura Malalaok, nomer salahunu dua naa, nomer mana matudu nomer mandaik laꞌe-neu hatahori dae-bafok.
✡21:13 Yeskiel 48:30-35
✡21:15 Yeskiel 40:3
†21:16 Susura Malalaok dedeꞌa Yunani surak nae, stadia 12.000.
‡21:17 Susura Malalaok Dedeꞌa Yunani surak nai ia nae, “peihon 144”. Peihon esa naa, sama leo hasta esa. Dadi 12 x 12, ndia 144. De mete ma 12 sosoa-ndandaan nae, matetu-mandaik, na, 144 sosoa-ndandaan nae, matetu-mandaik mateꞌen.
✡21:21 Yesaya 54:11-12
✡21:23 Yesaya 60:19-20
✡21:24 Yesaya 60:3
✡21:26 Yesaya 60:11
✡21:27 Yesaya 52:1; Yeskiel 44:9