2
Yiisu li munkala bihi-a-be
1 Baana ba me, me nsono be mandagha ma mu kuulu be linyaã osa masumu. Lo kala ti mbwuru bwi mu masumu, bihi-a-be lili a munkala ŋa nkulu a Taara, me Yiisu-Kriste wu li wu a nsumu. 2 Nde ágwi bumweẽ bu nde mukaba mu okala nzili a kolokolo a masumu ma bihi-a-be. Ya ka oli yini a mu nkooro a masumu ma bihi-a-be o, lo ya mu mama baara ba nsie nsyini.
Mukyene wu a dzyi
3 Kala ti bihi-a-be liikakebe mikyene mi Nzaami, obo me bu liigyahaba ti bihi-a be lisoolo nde. 4 Nswe munde wu aakalyele ti: «Me nsoolo Nzaami», ya aakakuono onama mikyene mi Nzaami, nde li nga-a-mpya ya engaŋma ka eli mu nde o. 5 Lo nswe munde wu aakanama ndagha a Nzaami, dzyi li Nzaami lili nkara a mukughu mu nde. Obo me bu liikasoolo bihi ti, bihi lili bumõ ya Nzaami. 6 Nswe munde wu aakalyele ti nde li emõ ya Nzaami, nde ndeme faana okadzyara ti anga bu óokadzyara Yiisu.
7 Bandughu ba me baba mukolo, mukyene wu ndi me mu osono be wu, ka li wu munyaghara o, lo mukyene wu mukulu, wu lígyagha be obaana ku ebaana. Mukyene wu mukulu munde, me ndagha yi liigyughu be.
8 Lo mu embihi ki emõ, munde mukyene wu munyaghara me ndi mu osono kundaa be,
Ndagha oyo yili yi a ngaŋma kundaa nde ya kundaa be,
Mu kuulu mpyibi yili mu okaluru,
Ya otsyeme kuu ngaŋma ayi oli mu okasehene.
9 Nswe munde wu aakalyele ti nde li kunsa otsyeme,
Ya aakabele ndughu mu kana,
Nde li nkini kunsa mpyibi.
10 Nswe munde wu aakadzyi ndughu mu kana,
Li kunsa otsyeme,
Ya ka oli a elogho si emõ mu nde o ki ekughu osa ti nde abwa mu masumu.
11 Lo nswe munde wu aakabele ndughu mu kana,
Li kunsa mpyibi,
Nde aakadzyara kunsa mpyibi,
Ya nde ka aakasoolo ku ali mu okagye o,
Mu kuulu mpyibi yiidzwi nde mihi.
12 Baana ba me, me ndi mu osono be mukaana wu, mu kuulu:
«Nzaami aasi masumu ma be kolokolo mu nkooro a nkwumu a Yiisu».
13 Bataara, me nsono be mukaana wu mu kuulu:
«Be lisoolo munde wu li obaana ku ebaana.»
Minkuru-mbala, me nsono be mukaana wu mu kuulu:
«Be liilughulu ŋa nkulu a Wu Mubi.»
14 Baana ba me, me aansono be mukaana wu mu kuulu:
«Be lisoolo Taara.»
Bataara, me aansono be mukaana wu mu kuulu:
«Be lisoolo munde wu li obaana ku ebaana.»
Minkuru-mbala, me aansono be mukaana wu mu kuulu:
«Be lili a mpini, ya ndagha a Nzaami yili mu be, ya be liilughulu ŋa nkulu a Wu Mubi.»
15 Ka lidzyi nsie o, ngu okala bilogho bi bili mu yo,
Kala ti mbwuru dzyi nsie,
Dzyi li Taara ka lili mu nde o.
16 Mu kuulu, byehene bi bili mu nsie,
Bisee bi nyuru,
Ntono a mihi,
Ya mubili a nyuru mu nkooro a kana mu busini,
Byehene bibye ka biikafa kundaa Taara o,
Lo bye biikafa mu nsie.
17 Ankoho nsie yili mu oluru, yo ya bilogho bi ookasughu baara mukolo.
Lo munde wu aakasa gwaa li Nzaami sa alaama mu mibvu ya mibvu.
Mutaara a Kriste
18 Baana ba me,
Ma me matala mama masini.
Be liigyughu bakalyele ti Mutaara a Kriste li mu ogya,
Ya mu matala ma, mitaara mi Kriste milagha miimoŋono.
Me obo bihi lisoolo ti ma me matala mama masini.
19 Baara babo bápala ŋa kara li bihi-a-be,
Lo bo ka báli baba ndaa bihi-a-be o.
Mu kuulu, kala ti bo báli baba ndaa bihi-a-be,
Kini li bákaakala ya bihi-a-be.
Obo oli mu osuo ti si mumõ mu bo ka li wu a ndaa bihi-a-be o.
20 Lo be, be liigyagha Mufulu a Ngili wu ookagwa Kriste,
Ya be bwohono ligyahaba engaŋma.
21 Me bu aansono be, ka mu kuulu ti be ka lisoolo engaŋma o,
Lo mu kuulu be lisoolo kye,
Ya mu kuulu ka oli a si mpya mu engaŋma o.
22 Nande li nga-a-mpya?
Munde wu aakabihi ti Yiisu me Kriste,
Munde me mutaara a Kriste,
Mu kuulu nde aakabihi Taara ya Mwana.
23 Nswe mbwuru wu aabihi Mwana, ka li ya Taara si o.
Munde wu kihi Mwana, nde li ya Taara si.
24 Mu mi mitala be, nyaã mandagha mwohono ma lígyughu be obaana ku ebaana makala mu be.
Kala ti mandagha mamo ma lígyughu be obaana ku ebaana makala mu be,
Behe si sa likala mu Mwana ya mu Taara. 25 Misiini mi ógwi bihi-a-be Kriste,
Me laama lili mibvu ya mibvu.
26 Me aansono be mandagha mamo,
Mu nkooro a baara ba bali mu okapfiri be.
27 Lo be, Mufulu a ngili wu lígyagha be kundaa Kriste li mu be.
Ya be ka lili a nzala a kuulu ti bafiriluo be o,
Mu kuulu Mufulu a Ngili aakaluo be mu mandagha mwohono,
Ya mo mali mama ngaŋma,
Ka mali mama mpya o.
Mu obo, be likala emõ ya Kriste,
Ti bwunu a bu óluo be Mufulu a Ngili.
Baana ba Nzaami
28 Be baana ba me, likala emo ya kriste mu matala ma,
Mpaala matala ka nswe matala ma akala aamoŋono nde, bihi-a-be likala a kana,
Ya linyaã okala la ya nde mu nkooro a budzwa.
29 Kala be lisoolo ti nde li bunsumu,
Lisoolo si ti, nswe munde wu aakasalala bunsumu, li mwana a Nzaami.