1 Mu obo, me aangwolo munkaana wu ogwene ofiriyamono be ŋaala oli a nkini minyoõ. 2 Mu kuulu, kala ti me meme ndi mu okasohobo be mu minyoõ, lo nande aagwa me esee, kala ti ka oli munde wu áansohobo me mu minyoõ o? 3 Me aansono be mandagha ma mpaala ŋa akala aangya me kundaa babo ba bakaagwa me esee, me nyaã okala a minyoõ. Me ndi a kana ti: Esee e me eli kii ndaa be, be bwohono. 4 Me aansono be kunsa kimini li lilagha, me ándi ya nyiĩ mu mukolo ya mansaŋa ma malagha. Ka mu ogwa be minyoõ o, lo mu kuulu be lisoolo dzyi li lilagha li ndi a me mu be.

5 Kala ti mbwuru ŋa kara li be aagwi bana minyoõ, ka oli me nde aagwi minyoõ o, lo be bwohono nde aagwi minyoõ. Mu ogwene osa mawala, me nkughu olyele ti ka kundaa be bwohono o, lo yini a kundaa ndaama a baara mu be nde aagwi minyoõ. 6 Masyeme ma oogwi nde baara balagha, maakughu. 7 Mu bu, lifaana osa nde kolokolo ya ogwa nde bukyini, mfangolo nde mono mpara mu minyoõ mi milagha. 8 Mu obo, me ngwi be mpama mu osuo nde ti be lidzyi nde. 9 Mu kuulu me aansono behe si mu osoolo mu bigyeele kala ti be lili a bintamana mu mandagha mwohono. 10 Lo mbwuru wu liisa be kolokolo, mehe si sa nsa nde kolokolo. Kala ti me aansi mbwuru kolokolo mu ndagha nga mõ, me mu nkooro a be me aansi kolokolo ŋa nkulu a Kriste, 11 mpaala Satana anyaã opfiri bihi, mu kuulu bihi ka liidzimini bitsimi bi nde.

12 Mu matala ma áyinto me mu bvulu lili Torowase mu otsala Nsia yi Mbwe yi a Kriste, ngu okala ti Mfumu ágwi me nzili, 13 mufulu a me ka áli mu edzuunu o, mu kuulu me ka ámono Tite ndughu a me mu kana o. Me mu obo me ábulunsihi bo ya ángyene ku Masedwane.

14 Me ndi mu okabvurulu matuono kundaa Nzaami, mu kuulu matala mwohono nde aakabiri bihi mu olughulu o nde mu Kriste, ya wuulu mu bihi aakatsala mpihi a ligyahaba li nde mu bibini byehene. 15 Mu kuulu bihi lili kundaa Nzaami mananaase ma Kriste mama mpihi yimbwe ŋa kara li baara ba baabvwughu, ti anga ŋa kara li baara ba bali mu okagye ku opfighili o bo. 16 Kundaa bana, mpihi a lipfu yi aakabiri ku lipfu, kundaa babake, mpihi a laama yi aakabiri ku laama. Ya nande kughu osa esala kii obo? 17 Mu kuulu bihi ka lili ti anga baara babake ba baakabuluta nkaala mu ndagha a Nzaami o. Lo bihi liikabulubili mu bunsumu mu nkwumu a Nzaami, ŋa busu bu Nzaami ya mu Kriste.