MUKAANA A POOLE WU A MYELE KUNDAA BASI
TESALONIKE
OSOMO
Wu me mukaana wu a buolo wu ósono Poole kundaa banga-a-kana ba bali ku bvulu lili Tesalonike. Munsa mukaana wu, Poole li mu ofirikalyele bo mandagha ma matala obvughuru o Kriste ya bu ookala masini ma baara ba baakasa kana mu nde. Mu kuulu, baara bana munsa bvulu li Tesalonike bákalyele ti Kriste áyi amaayabvughuru. Baara babake bákalyele ti nde nkini ka áyabvughuru o, lo etsughu ki aayabvughuru nde eebehene.
Babo ba bákalyele ti etsughu ki ooyabvughuru Kriste eebehene bákabihi osala. Bo bákalyele ti kala bo basala, esala e bo sa ekala kii bwunu. Lo bo bákayidza kundaa babo ba bákasala. Me mu obo Poole ásono bo mukaana mu osuo bo ti nswe mbwuru faana ota tsughuru mu obagha bi-odza.
Nde ályele bo si ti mu matala ma baamono bo mpara bo bafaana ogwama ya osa mukama mu okasa bubwe.
Bu me bu baakakaba mukaana wu:
- Mboro (1.1-2)
- Oyabvughuru o Yiisu ŋa nsie sa otwulu bilogho byehene mu bunsumu (1.3-12)
- Mfumu Yiisu nkini aayabvughuru o (2.1-12)
- Ogwama mu kana (2.13-17)
- Lisamana ya esala (3.1-15)
- Mboro yi masini (3.16-18).
1
Mamboro
1 Me Poole, emõ ya Silibvĩ ya Timote, lisono mukaana wu kundaa libwunu li Nzaami li lili mu bvulu lili Tesalonike, libwunu li Nzaami Taara a bihi ya lili Mfumu Yiisu-Kriste: 2 Nyaã bwehe ya edzuunu bi bifi kundaa Nzaami Taara a bihi ya kundaa Mfumu Yiisu-Kriste bikala ya be!
Mumfwunu wu aakala mu etsughu ki oogya Kriste
3 Bandughu ba me mu kana, mu nswe matala, bihi lifaana okabvurulu matuono kundaa Nzaami mu be. Oli bubwe kundaa bihi mu okasa obo, mu kuulu kana li be lili mu okakulu ku olagha, ya dzyi li lili a be bwohono bana ya babamo lili mu okapfini. 4 Me mu obo bihi lili a mutwunu mu okabili mu be mu mabwunu ma Nzaami, mu nkooro a mukama ya kana li be ŋa nkulu a bigyeele byehene ya kimini bi liikabwana a be. 5 Ekye me elyimi kii mumfwunu a Nzaami wu bunsumu, mpaala be likala baara baba mukughu mu Emfumu e Nzaami kiili, be lili mu okamono mpara mu kye. 6 Mu kuulu kala oli ngaŋma ti Nzaami li bunsumu, nde sa abvurulu mpara kundaa babo ba baakamwehẽ be mpara. 7 Mu matala ma oomoŋono Mfumu Yiisu, ŋa akala aafa nde ku yulu ya bangye-yulu ba nde baba lileene, Nzaami sa agwa be ogwumu, emõ ya bihi, be ba lili kunsa mpara. 8 Yiisu sa agya munsa mile mi mbaa, mu osyeme ba bagwene osoolo Nzaami ya ba bagwene a bintamana mu Nsia yi Mbwe yi a Mfumu a bihi Yiisu. 9 Masyeme ma ofaana obagha baara babo me obyihi kuu mibvu ya mibvu. Bo sa bakala la ya Mfumu ya nsia a mpini a nde. 10 Mandagha mamo sa makeele mu etsughu ki oogya Mfumu. Mu obo, bwohono ba bali baba ndaa nde sa bagwa nde nsia, bwohono ba baakasa kana sa bagwa nde masyighi. Behe si sa likala emõ ya bo, mu kuulu be liisi kana mu bumpughulu bu liisuo bihi be.
11 Me mu obo bihi liikasamana matala mwohono mu be, mu kuulu Nzaami a bihi aamono ti be lili baba mukughu mu mbili yi áti nde be, ya nde akuhu mu lileene li nde, bitsimi byehene bi bibwe ya bigyighili byehene bibi kana, 12 mpaala nkwumu a Mfumu a bihi Yiisu yikala a nsia mu be, ya be likala mu nde, ti bwunu a bu oli bwehe bu Nzaami a bihi ya Mfumu Yiisu-Kriste.