Mukaana wu a myele kundaa
Timote
OSOMO
Wu mukaana a Poole wu a myele wu ásono nde kundaa Timote. Nde ásono mukaana wu mu matala ma áli nde mu boloko ku Rome. Bandughu ba nde bwohono bábara ya bábulusihi nde. Yini a Luke, ngaa-libughu wuulu ka asihi nde o.
Poole amono ti matala ma nde ayi maafi, yini a lipfu liisyili. Mu obo nde ágwolo mukakana mu osono mukaana wu kundaa Timote mu ogwa nde maluo, mu kuulu nde ágwolo nde ti anga nkara mwana a nde. Mukaana wu li wu masini wu ósono Poole.
Poole ályele kundaa Timote munsa mukaana wu mu okwara kana ti anga nde. Nde áluomo nde mu osa mukama mu okatsala Nsia yi Mbwe yi a Yiisu, ngu okala ti bákamwehẽ nde kimini. Ya mu osa mayele ya mandagha maala ka mali embe-embe ya Nsia yi Mbwe o.
Poole bwehe ti ndeme si ádzwana mvulu yi mbwe, ya edzi-dzighi nde sa ayibvuŋunu ya Mfumu Yiisu. Nde ályele ti nswe mukriste faana osa ti anga nde.
Bu me bu baakakaba mukaana wu:
- Mamboro (1.1-2).
- Poole gwi Timote luo (1.3-18).
- Okala mbumbulu a Kriste wu mubwe (2.1-26).
- Bu okala baara mu bitsughu bibi masini (3.1-9).
- Okwara kana mu mpini (3.10–4.8).
- Mansia ya mamboro mama masini (4.9-22).
1
Mamboro
1 Me Poole, ntumu a Yiisu-Kriste mu waa li Nzaami, bwunu a bu oli misiini mi bumweẽ bu buli mu Yiisu-Kriste, 2 nsono mukaana wu kundaa Timote, mwana a me wu mukolo. Nyaã ti bwehe, nyiĩ ya edzuunu bi bifi kundaa Nzaami Taara ya kundaa Mfumu a bihi Yiisu-Kriste bikala ya we!
Poole bvurulu matuono kundaa Nzaami
3 Me aakamvurulu matuono malagha kundaa Nzaami, wu aakansalala me mu bitsimi bibi tse-tse ti anga bu ósalala bankagha ba me. Matala mwohono, me aakansamana mu we mpyibi ya mwiĩ. 4 Me aakandibili mweẽ mu mansaŋa ma we, ya me ndi a nzala a omono we kuu olagha mpaala me ndwulu mu esee. 5 Me aakandibili si mweẽ mu kana li we lili ngaŋma, bwunu a bu óli kana li nkagha a we Loyidze ya lili ngughu a we Enise. Me ngyighili osoolo ti kana lilo lili si mu we.
Omono mpara ya Poole mu nkooro a Nsia yi Mbwe
6 Mu obo, me ndibili we mweẽ mu ofirifulu mbaa a ekaba ki ógwi we Nzaami mu matala ma ánaŋa me we myaã ŋa yulu a mutswi. 7 Mu kuulu, Nzaami ka ágwi bihi-a-be mufulu wu a nzalamweẽ o, lo mufulu wu a mpini, wu a dzyi ya wu okakuru nyuru. 8 Ka kala a budzwa mu osuo bumpughulu bu Mfumu a bihi o, ka kala a budzwa mu me wu ndi mu boloko mu nkooro a nde o. Lo mono mpara ya me mu nkooro a Nsia yi Mbwe mu lileene li Nzaami.
9 Nde wu aabvwuhu bihi
ya wu aati bihi mbili mu okala a bumweẽ bubu ngili,
ka mu nkooro a bigyighili bi bihi bi bibwe o,
lo bwunu a bu oli bitsimi bi ákuru nde, bwunu a bu oli bwehe
bu bágwi bihi mu Yiisu-Kriste
nsomo nde agyighili bilogho byehene.
10 Mu matala ma, bwehe bubo buumoŋono ŋa omoŋono Mfumu a bihi Yiisu-Kriste,
wu aamana lileene li lipfu,
ya wu aasuo ŋa tse-tse laama lili mibvu ya mibvu mu nzili a Nsia yi Mbwe.
11 Me mu nkooro a Nsia yi Mbwe oyo Nzaami aasuolo me mu okala wu aakata mukwughu, ntumu ya muluo. 12 Me mu nkooro a ndagha oyo me ndi mu okamono mpara yi. Lo me ka ndi a budzwa mu ndagha oyo o, mu kuulu me ngyahaba mu nande me aansi kana. Ya me ndi a emiini ti nde li a lileene mu okebe ma ágwi nde me tee mu etsughu ekye.
13 Kwara, mu kana ya mu dzyi li lili mu Yiisu-Kriste, efaana ki mandagha mama nsumu ma ágyughu we kundaa me. 14 Kebe, mu nzili a Mufulu a Ngili wu li mu bihi, mandagha mwohono ma mabwe ma bágwi we.
Bunsumu bu Onesifore
15 We soolo ti baara bwohono ba bali ku Adzi baanyaghala me. Fingele ya Eremongene bali mu mutala a bo. 16 Nyaã Mfumu amono nzo a Onesifore nyiĩ mu kuulu matala malagha, nde aakagwa me mpini, ya ka aakamono budzwa mu me wu ndi mu boloko o. 17 Me mu obo, nde bu aagyi ku bvulu lili Rome, nde aasi maswa mu osagha me ya nde aamono me. 18 Nyaã Mfumu Yiisu agwa nde bwehe mu etsughu kii mumfwunu, mpaala Nzaami amono nde nyiĩ. We weme gyighili osoolo obvulu baara bwohono ti ku bvulu lili Efedze, nde áabaha bihi.