Mukaana a
DZAKE
OSOMO
Wu mukaana wu ósono Dzake kundaa baara ba Nzaami ba bátsaŋama mu nsie yi nsyini. Mu matala ma makulu, Dzake áli mbwuru wu munene ŋa kara li banga-a-kana ba báli mu Yerusaleme ya nde li mbwee a Yiisu. Ŋa kara li babo ba ásono nde mukaana wu, bana bali mu okalyele ti bo baasi kana, lo nzya-nzyara a bo, yili yi a baara baala nkini baasi kana o. Me mu obo, nde ali mu akalyele bo ti, kana liikasuo nzya-nzyara yimbwe.
Dzake ágyughu ti kundaa banga-a-kana, bagwele bákamono mpara, mu kuulu bisini bíkabvulu omoŋono. Me mu obo nde ályele kundaa bisini binyaã okadzyara ti anga baara ba nsie yi, bakabaha bagwele. Nde áfirilyele bo bwohono, bakabara mimbaŋana ya bakasoolo si okakuru miŋma mi bo. Bo bafaana okasuo nzya-nzyara yi mbwe matala mwohono ti bu ookalyele Ndagha a Nzaami.
Mukaana wu baakakaba nde bu:
- Mamboro (1.1).
- Kana ya bunsughu (1.2-18).
- Ogyughu ndagha a Nzaami ya ogyighili bu yiikalyele yo (1.19-27)
- Linyaã okasa munsuolo ŋa kara li baara (2.1-13).
- Kana, ya osa bigyighili bi bibwe (2.14-26).
- Bunsughu ya munzeele (3.1-18).
- Ka bubwe mu okala a dzyi li mandagha ma nsie o (4.1–5.6).
- Okuru mukolo mu okebe ya lisamana (5.7-20).
1
Mamboro
1 Me, Dzake musala a Nzaami ya wu a Mfumu Yiisu-Kriste, ngwi mamboro kundaa bikaana kwumu ya byele (12) bi bítsaŋama mu nsie yohono.
Otsihi, mukama ya okala mukughu
2 Bandughu ba me mu kana, likala ya esee mu matala ma baakatsihi be mu bifa byehene. 3 Mu kuulu be lisoolo ti kimini li baakasuo mu otsihi kana li be, liikaburu mukama. 4 Lo mukama faana osala mu be mpaala be likala mukughu, ku ogwene a epfwumu, ya elogho si emõ ka ekuono be o.
Kana ya bunsughu
5 Kala ti mbwuru ŋa kara li be gwene a bunsughu, nde aluomo bo kundaa Nzaami, ya Nzaami sa agwa nde bo. Nzaami aakagwa mu bunya-nyaã kundaa baara bwohono, gwene a masyeme. 6 Lo nde faana oluomo ya kana, ya anyaã okala a makeŋe. Buulu mbwuru wu li a makeŋe li efaana ki mampo ma mubu, ma oonyihi ya ooseene lipwubu. 7 Mbwuru wu obo anyaã otsimi ti Mfumu sa agwa nde elogho nga-emõ. 8 Mu kuulu nde li mbwuru wu mikolo myele, ya nde aakasobo bitsimi mu mandagha mwohono.
Muwele ya esini
9 Nyaã ndughu mu kana wu li muwele akala a mutwunu mu kuulu Nzaami aakuhubu nde mu yulu, 10 lo esini, Nzaami sa abwihi kye mu nsie, mu kuulu nde sa aluru ti anga efulu kii bisagha. 11 Tala liipala ya kyaŋana kii mbaa, lo liikehe esagha, efulu e kye eebwi ya bumpala bu kye buudzimini. Me obo si baakuomo esini mu bisala bi nde.
Biyeele
12 Esee kundaa mbwuru wu aakakuru mukolo mu bigyeele! Mu kuulu, ŋa mbihi a bigyeele, nde sa abagha kagha lili laama lili mibvu ya mibvu li ósiini a Nzaami babo ba baakadzyi nde.
13 Kala ti mbwuru li kunsa bigyeele, anyaã olyele ti: «Nzaami li mu okagyeele me.» Mu kuulu bubi ka bukughu ogyeele Nzaami o. Mu obo ndehe si ka kughu ogyeele mbwuru o. 14 Nswe mbwuru aakasomo mu bigyeele mu nkooro a nzala a obagha a nde, yi aakakobo nde ya yiikapfiri nde. 15 Ŋa nseele, nzala a obagha yibvulu, yiikaburu lisumu ya lisumu bu ligyele, lo liburu lipfu.
16 Bandughu ba me mu kana baba mukolo, ka ligwuŋumu o. 17 Nswe kaba li libwe ya nswe embwaã kii mukughu biikafa ku yulu, kundaa Taara nga-a-mambaa, mu nde ka oli a lisobo o, ka oli a edzyimi-a-dzyimi ki eenyiŋi o. 18 Mu waa li ndeme, Nzaami áburu bihi mu ndagha a nde yi engaŋma mpaala bihi likala baba nsomo mu bilogho byehene bi ágyighili nde.
Ogyughu ka okughu o
19 Bandughu ba me mu kana baba mukolo, lisoolo ti nswe mbwuru faana okala a mamamana mu ogyughu, maleme mu obili, ya maleme mu obagha nkehe. 20 Mu kuulu nkehe a mbwuru ka yiikakuhu bunsumu bu Nzaami o. 21 Mu obo, litsili mubviini wohono ya bubi bwohono. Likihi Ndagha a Nzaami mu edzuunu, Ndagha yi bákunu mu mikolo mi be, ya yikughu obvwuhu be.
22 Liikasalala Ndagha a Nzaami, ka likagyughu yini a ogyughu o, kala pele, be beme lili mu okapfiri. 23 Mu kuulu, kala ti mbwuru gyughu Ndagha ya ka salala yo o, nde afaana ti baghala wu li mu okatala edzili e nde mu tala-tala. Nde li mu omono bu oli efa e nde. 24 Bu amana otala, nde gyene ya ŋaana oŋo, nde dzimini nsimi bu ali nde. 25 Lo munde wu aagyighili okehene mikyene mimi mukughu, mikyene mi miigwa bihi bunya-nyaã ya nabara mu mye, nde ka agyughu yini a ogyughu o mpaala ŋa mbihi adzimini nsimi, lo nde aakasalala mye. Nde sa akala a esee mu okasalala mye.
26 Kala ti mbwuru tsimi ti nde li aakasamana Nzaami, ya kuono okuru nzalisogho a nde misyi, lo nde li mu opfiri ndeme, enzaami e nde eli kii ngolo. 27 Enzaami kii tse-tse ya ki egwene a mpiri ŋa nkulu a wu li Nzaami ya Taara me ki: okabaha bisyana ya bapfiili mu mpara a bo ya onyaã obagha mviini yohono yi bilogho bi nsie.