1 Libwana a munde wu gwene a mpini mu kana, gwene a otsaala a bitsimi bi nde. 2 Mbwuru mumõ li a kana mu odza bilogho byehene. Wu muke, wu gwene a mpini mu kana, nde okadza yini a bisagha. 3 Munde wu aakadza anyaã otsaala wu aagwene okadza, ya munde wu aagwene okadza anyaã olamana wu aakadza, mu kuulu Nzaami aabwana nde. 4 We, we nande li mu olamana musala a mbwuru mukimi? Ngu okala ti nde li mu mukiri, bwunu we nde aabwi, mimye mitala mfumu a nde. Ya nde sa agyighili otemene, mu kuulu Mfumu li a lileene lii otehebe nde.

5 Mu kuulu, mu kana li mfu-nga-empele bitsughu bini bibvulu bibike mupfunu, mu kaana lili wu muke, bitsughu byehene bili nsihi mu mupfunu. Nyaã nswe mbwuru, mu mayele ma nde, akala a kana mu bitsimi bibi ndaa ndeme. 6 Munde wu aakagwa bitsughu mupfunu me mu nkooro a Mfumu aakasa obo. Munde wu aakadza, me mu nkooro a Mfumu aakadza, mu kuulu nde aakabvurulu matuono kundaa Nzaami ŋa aakasa nde obo. Wu aagwene okadza, me mu nkooro a Mfumu nde aagwene okadza. Ndehe si aakabvurulu matuono kundaa Nzaami ŋa aakasa nde obo. 7 Mu kuulu, mbwuru si mumõ mu bihi-a-be ka li mweẽ mu ndeme o, ya mbwuru si mumõ ka kughu okpa mu nkooro a ndeme o. 8 Mu kuulu, kala ti bihi-a-be lili mweẽ, lo bihi lili mweẽ mu nkooro a Mfumu. Ya kala ti bihi liikakpa, bihi mu nkooro a Mfumu liikakpa. Bihi ngu likala mweẽ, bihi ngu likpi, bihi lili baara ba Mfumu. 9 Mu kuulu, kala ti Kriste ákpi ya asighili mu lipfu, me mu okala Mfumu a ba bákpi ya baba mweẽ. 10 Lo we, mu emakye we li mu olamana ndughu a we mu kana? Bwunu we, mu emakye we li mu otsaala ndughu a we mu kana? Mu kuulu, sa balamana bihi bwohono ŋa mbala a muyala a Nzaami. 11 Mu kuulu básono ti:

13 Mu obo, litswe linyaã ofirikalamana babake. Liswe ligwolo munkaana wu ogwene otwulu limeẽ li liisa ti bandughu mu kana bakubu makya, bwunu we libwihi bo mu masumu. 14 Me ngyighili osoolo, ya me nsi kana ti mu Mfumu Yiisu ka oli a elogho ki esuŋumu mu kyeme o. Lo kala ti mbwuru tsimi ti elogho eli ki esuŋumu, kundaa nde elogho ekye sa ekala ki esuŋumu. 15 Kala ti, mu nkooro a bi-odza, ndughu a we mu kana aanyoõ, we ka li mu ofirikadzyara bwunu a bu oli dzyi o. Mu nkooro a bi-odza, ka sa kuulu ti munde wuulu Kriste ákpi mu nkooro a nde apfighili o. 16 Mu obo, mbwuru anyaã otsaala ekye kiili kundaa be eli ki ebwe. 17 Mu kuulu Emfumu e Nzaami ka etala odza ya oŋma o. Lo kye etala bunsumu, edzuunu ya esee bi ookagwa Mufulu a Ngili. 18 Munde wu aakasalala Kriste obo, Nzaami aakadzyi nde, ya baara baakakihi nde.

19 Obo me buulu, litswe lisa mpini mu okasa mandagha ma maakagwa edzuunu ya ma maakakwuhu bihi-a-be. 20 Ka dzwa esala e Nzaami mu nkooro a bi-odza o. Ngaŋma, bilogho byehene bili tse-tse. Lo oli bubi kundaa mbwuru mu odza bilogho bi biikasa kuulu ti babake bakubu kya. 21 Oli bubwe mu onyaã odza tuo ya oŋma mala ma bviini, mu obihi bilogho byehene bi bili limeẽ li ookubu ndughu a we mu kana makya. 22 Kana li li a we, kebe lo we weme ŋa nkulu a Nzaami. Esee kundaa munde wu aagwene okalamana nde ndeme ŋa aakagwolo nde mukaana mu mi aagyighili! 23 Lo munde wu aakeŋe mu bi aadza, nde aabagha masyeme. Mu kuulu ndagha yi aagyighili nde ka yifi mu kana li nde o. Ankoho, myehene mi miigwene okafa mu kana, mili masumu.