1 Ti muchꞌu tscꞌan ch-och ta jchanubtasvanej ta scꞌop Rioxe, lec ti cꞌusi tscꞌan tspase. 2 Ti muchꞌu ch-oche persa lec scꞌoplal yuꞌun scotolic. Tscꞌan ti jun noꞌox yajnil yichꞌoj ta muqꞌue, lec tsnop ti cꞌusi ta spase, lec srazón, lec xcꞌopoj. Chicꞌ ochel crixchanoetic ta sna. Lec ta xchanubtasvan. 3 Mu xyacub, mu xmajvan, mu xpichꞌ yoꞌon taqꞌuin. Chcꞌuxubinvan, mu sliques cꞌop. 4 Jaꞌ ti muchꞌu lec snaꞌ spasel mantal ta snae, ti lec snaꞌ spas ta mantal li xchꞌamaltaque, ti chꞌunbil smantal yuꞌun li xchꞌamaltaque. 5 Yuꞌun ti muchꞌu mu snaꞌ spas mantal ta snae, ti mu snaꞌ spas ta mantal li xchꞌamaltaque, jaꞌ noꞌox yech mu spas yuꞌun ta mantal xchꞌamaltac ti Rioxe. 6 Mu me xꞌoch ti muchꞌu achꞌ to ixchꞌun li scꞌop Rioxe naca me stoy o sba. Mi istoy sbae, coꞌol chba yichꞌ castico xchiꞌuc ti pucuje. 7 Ti muchꞌu ch-oche jaꞌ tscꞌan ti lec xꞌile yuꞌun ti muchꞌutic mu to ta xchꞌunic li scꞌop Rioxe. Yan mi chopol ch-ilee, yicꞌal xloꞌloat yuꞌun ti pucuje.

8 Jaꞌ noꞌox yech noxtoc ti muchꞌutic ta scuentainic ti cꞌusitic chaqꞌuic li muchꞌutic xchꞌunojic li scꞌop Rioxe, jaꞌ tscꞌan ti lec li cꞌusitic tspasique, ti yech li cꞌusitic chalique. Mu xyacubic, mu xpichꞌ yoꞌonic taqꞌuin. 9 Tscꞌan ti sjunul yoꞌon xchꞌunojic ti cꞌusi liyalbotic xa ti Rioxe. Chaꞌi sbaic noxtoc ti chꞌabal smulique. 10 Jaꞌ tscꞌan ti baꞌyi chvinaj mi lec li cꞌusitic tspasique chac cꞌu chaꞌal li jchanubtasvanejetique. Mi leque, xuꞌ xꞌochic ta scuentainel ti cꞌusitic chaqꞌuic li muchꞌutic xchꞌunojic li scꞌop Rioxe. 11 Jaꞌ noꞌox yech li antsetique ti ta xtꞌujeique ti chtunic yuꞌun ti Rioxe, jaꞌ tscꞌan ti lec li cꞌusitic tspasique, mu sloꞌilta xchiꞌilic, tsnopic lec ti cꞌusitic tspasique, sjunul yoꞌon tspasic ti cꞌusi ta xtunic oe. 12 Ti muchꞌutic ta scuentainic ti cꞌusitic chichꞌ aqꞌuele, tscꞌan ti jun noꞌox yajnilic yichꞌojic ta muqꞌue, ti lec snaꞌic spasel ta mantal xchꞌamalique xchiꞌuc ti jayvoꞌ crixchanoetic tey ta snaique. 13 Mi lec tsqꞌuelic ti cꞌusitic chacꞌ ti muchꞌutic xchꞌunojic li scꞌop Rioxe, jaꞌ ch-ichꞌeic o ta mucꞌ. Más to ta stsatsub yoꞌonic yuꞌun chilic cꞌu xꞌelan ta xcoltaatic yuꞌun ti Jesucristoe.

14-15 Coꞌonuc tal jqꞌuelot, pero mi muc xital ta orae, chajtsꞌibabe cꞌu xꞌelan tscꞌan chatun yuꞌun Riox yoꞌ bu ta stsob sbaic li muchꞌutic xchꞌunojic li scꞌop Rioxe. Yuꞌun coꞌol yicꞌojotic ti Rioxe ti cuxul ta sbatel osile. Jaꞌ chac cꞌu chaꞌal li nae ti jaꞌ vaꞌal o li yoyale, jaꞌ yechotic yaꞌel uc. Yuꞌun jchꞌunojtic li scꞌop Rioxe, yechꞌo ti mu xchꞌay ti cꞌusi yaloje. Ti cꞌusi yaloje, yech. 16 Toj lec ti cꞌusi yalojbotic ti Rioxe ti jchꞌunojtic xae