1 Tsꞌacal to iquil jun anjel ta vinajel iyal tal. Stomoj tal syaveal li natilchꞌene. Slicoj tal jlic mucꞌta carina noxtoc. 2 Jaꞌ istsac li tsajal chone, jaꞌ li antivo chone, jaꞌ ti totil pucuje, jaꞌ ti Satanase. Ixchuc ta carina jmil jabil. 3 Isjip yalel ta natilchꞌen, ismacbe stiꞌil, iyacꞌbe seyoal yoꞌ mu xa sloꞌlo o li crixchanoetic ta sjunlej balamile. Jaꞌto cꞌalal stsꞌaqui li jmil jabile ta xloqꞌuesat, pero mu xa jaluc ta xcol.

4 Tsꞌacal to iquil ep chotlebaletic. Tey chotajtic li muchꞌutic iticꞌatic ta pasmantale. Iquil ti tey xchꞌulelic noxtoc ti muchꞌutic ilajic o ta milel li scꞌop Rioxe xchiꞌuc ti jamal iyalic ti jaꞌ istoj jmultic ti Jesuse. Jaꞌ ti muchꞌutic muc xichꞌic ta mucꞌ li bolome, ti muc xichꞌbeic ta mucꞌ li slocꞌole, xchiꞌuc ti muc xichꞌbeic li sbie xchiꞌuc li snumeroal ta stiꞌbaique, o mi ta scꞌobic. Iquil ti ichaꞌcuxi scotolique. Jmil jabil ispasic mantal xchiꞌuc ti Cristoe. 5 Jaꞌ baꞌyi ichaꞌcuxiic. Ti muchꞌutic muc xichꞌic ta mucꞌ Cajvaltic Jesús ti cꞌalal ichamique, jaꞌto ichaꞌcuxiic ti cꞌalal itsꞌaqui li jmil jabile. 6 Ti muchꞌutic baꞌyi ichaꞌcuxiique jun xa yoꞌonic, tey xa xchiꞌuquic ti Rioxe. Mu xa bu ta xchamic ta xchaꞌechꞌelal. Jaꞌ xa ta xtunic yuꞌun ti Rioxe xchiꞌuc ti Cristoe chac cꞌu chaꞌal ti paleetique. Jmil jabil tspasic mantal xchiꞌuc ti Cajvaltic Jesuse.

7 Ti cꞌalal stsꞌaqui ti jmil jabile, ta xloqꞌuesat ta chuquel ti Satanase. 8 Chba sloꞌlo noxtoc scotol li crixchanoetic ta sjunlej balamile yoꞌ stsob o sbaic ta acꞌ cꞌoqꞌue. Gog xchiꞌuc Magog sbi scotol li crixchanoetique. Ep tajmec ta stsob sbaic, mu xlaj ta nitel yuꞌun coꞌol xchiꞌuc li yiꞌal mare. 9 Ta sjunlej balamil chliquic tal, jaꞌ chtal scomonjoyinic li mucꞌta jteclum Jerusalene ti stꞌujoj Rioxe yoꞌ bu nacajtic li xchꞌamaltac Rioxe. Jaꞌ yoꞌonicuc xchꞌaybeic stsꞌunbal. Ti Rioxe chacꞌ tal cꞌocꞌ liꞌ ta balamile jaꞌ ta xcham o scotol li muchꞌutic ta xcrontainat oe. 10 Ti pucuje ti tsloꞌlo crixchanoetic ta sjunlej balamile, chjipe ochel ta mucꞌta cꞌocꞌ yoꞌ bu chtil xchiꞌuc asuvree, jaꞌ yoꞌ bu tiqꞌuil ti bolome xchiꞌuc ti jcot chone ti tspꞌis sba ta yajꞌalcꞌop Rioxe. Ta cꞌacꞌal acꞌubal tey chichꞌic castico ta sbatel osil.

11 Iquil jcot mucꞌta saquil chotlebal, jaꞌ tey chotol ti Cajvaltic Jesuse. Li vinajel balamile iquil isacchꞌay. 12-15 Iquil ti tey vaꞌajtic ta stojol Cajvaltic Jesús scotol li muchꞌutic muc xchꞌunic ti jaꞌ istoj jmultic ti cꞌalal ichamique. Tey scotolic, ta biqꞌuit ta mucꞌ. Acꞌu mi ta mar ichamic, acꞌu mi ta balamil mucajtic li spat xoconique, pero li xchꞌulelique ilocꞌ tal ta cꞌotebal, ichaꞌcuxi scotolic. Jaꞌo isjam libroetic ti Cajvaltic Jesuse jaꞌ yoꞌ bu tsꞌibabil ti cꞌu xꞌelan iꞌechꞌic liꞌ ta sba balamile. Iquil isjam otro jlic libro noxtoc, jaꞌ yoꞌ bu tsꞌibabil sbiic ti muchꞌutic ta xcuxiic ta sbatel osile. Scotol ti muchꞌutic tey vaꞌajtique muc bu tey tsꞌibabil sbiic yoꞌ bu li libro scuenta cuxlejal sbatel osile, yechꞌo ti chba yichꞌic castico xchiꞌuc spat xoconique. Iꞌalbatic ti ch-ochic ta cꞌocꞌ ta sbatel osile. Ti cꞌu xꞌelan iꞌechꞌic jujuntal liꞌ ta sba balamile, jaꞌ yech chba stojic. Mi ep cꞌusi chopol ispasique, tsots castico chichꞌic. Mi jutuc noꞌoxe, jaꞌ noꞌox yech mu masuc tsots castico chichꞌic. Sbatel osil ibatic o, jaꞌ xa xchaꞌechꞌelal o ta xchamic.