1 Qꞌuel avilic ti cꞌu yepal cꞌuxotic ta yoꞌnton ti Jtotic Diose ti jech ta xisbisotic ta snichꞌone. Jech onoꞌox melel. Jech o xal un, ti buchꞌutic sventainojic ti sba banomile, mu xaꞌibeic smelol ti jech snichꞌonotic ti Diose. Yuꞌun ti stuquique mu xojtiquinic ti Diose. 2 Quermanotac, jnaꞌtic xa ti snichꞌnabotic ti Diose. Jaꞌ noꞌox ti mu to bu acꞌbil quiltic ti cꞌu sꞌelan ta xijcꞌototic ta slajeb cꞌacꞌale. Jaꞌ noꞌox jnaꞌtic ti cꞌalal mi tal ti Jesucristoe, jech ta xijcꞌototic jech chac cꞌu chaꞌal ti stuque, yuꞌun ta xquiltic ti cꞌu sꞌelan ti stuque. 3 Scotol ti buchꞌutic jech spatoj yoꞌntonic ta stojole, jech o xal un, stuc ta scomtsan ti mulile, yuꞌun snaꞌ ti lec yoꞌnton ti Jesucristoe.

4 Scotol ti buchꞌutic ta saꞌ ti smulique ta sbajbeic smantal ti Diose. Yuꞌun ti mulile, jaꞌ jbajmantal. 5 Ti voꞌoxuque anaꞌojic xa ti ital ta sba banomil ti Jesucristoe, yoꞌ jech tal stub ti jmultique. Ti stuque mi jaꞌuc jutebuc oy ti smule. 6 Jaꞌ yuꞌun un, buchꞌuuc noꞌox ti staoj yav junic schiꞌuc ti Jesucristoe, mu xa ta saꞌolan ti smulique. Yan ti buchꞌutic ti tey onoꞌox ta saꞌolan ti smulique, muꞌyuc yiloj, muꞌyuc yaꞌbinoj cꞌu sꞌelan yoꞌnton ti Jesucristoe. 7 Jnichꞌnabtac, mu me buchꞌu xasloꞌlaic. Yuꞌun ti buchꞌu ta spas ti leque, yuꞌun onoꞌox lec jech chac cꞌu chaꞌal ti Jesucristoe. 8 Yan ti buchꞌu tey onoꞌox ta saꞌolan ti smule, jaꞌ yuꞌun ti pucuje. Yuꞌun ti pucuje, jaꞌ noꞌox jsaꞌmulil ta sliquebal. Jech o xal un, jaꞌ smelol ti ital Snichꞌon ti Diose, yoꞌ jech ta slilinbe yabtel ti pucuj ti sliquesoj xae.

9 Yan ti buchꞌutic snichꞌnabtac ti Diose, mi junuc ti tey onoꞌox ta saꞌolanic ti smulique. Yuꞌun acꞌbilic scuxlejal Dios ta stojolic. Jech o xal un, mu teyuc onoꞌox ta saꞌolan ti smulique. Yuꞌun snichꞌon Dios xa. 10 Yuꞌun xvinaj lec buchꞌutic snichꞌnab ti Diose, buchꞌutic snichꞌnab ti pucuje. Yuꞌun buchꞌuuc noꞌox ti muꞌyuc cꞌusi lec ta spasique, ti mu xcꞌuxubin ti yermanoe, maꞌuc snichꞌon ti Diose.

11 Ti lequil cꞌop ti lic avaꞌiic talel ta sliquebale, jech chac cꞌu chaꞌal liꞌe: Cꞌuxuc me xcaꞌi jbatic ta jujun tal. 12 Mu me jechucotic jech chac cꞌu chaꞌal ti Caine ti jaꞌ stotinoj ti pucuje, ti laj smil ti yitsꞌine. ¿Cꞌu chaꞌal laj smil un? Yuꞌun ti cꞌusi ta spas ti Caine, toj chopol. Yan ti cꞌusi ta spas ti yitsꞌine, lec.

13 Quermanotac, mu me chꞌayaluc xcꞌot avoꞌntonic yuꞌun ti xtiꞌet sjolic ta atojolic ti buchꞌutic sventainojic ti sba banomile. 14 Ti voꞌotique lijelavotic xa batel ta cuxlejal ti jech chamemotic to oxe. Jaꞌ jech ta jnaꞌtic, yuꞌun cꞌux ta xcaꞌitic ti quermanotique. Yan ti buchꞌu muꞌyuc cꞌux ta xaꞌi ti yermanoe, staoj yav chamem. 15 Scotol ti buchꞌu xtiꞌet sjol yuꞌun ti yermanoe, jaꞌ jun jmilvanej. Xanaꞌic lec ti voꞌoxuque, ti jun jmilvaneje muꞌyuc ta yoꞌnton ti oy cuxlejal sbatel osile. 16 Jnaꞌtic lec cꞌu sꞌelan ti cꞌuxul oꞌntonale, yuꞌun ti Jesucristoe laj xa yacꞌ sba ta milel cuꞌuntic. Jaꞌ me jechuc ti voꞌotique, laꞌ me jcoltatic ti yan quermanotique manchuc mi ta xijlaj ta milel. 17 Ti mi oy buchꞌu staoj scotol ti cꞌusi ta xtun yuꞌun yoꞌ jech ta xcuxie, pero ti mi mu xcꞌuxubij yoꞌnton yuꞌun ti yermano ti mi ta xil ti oy cꞌusi tsots scꞌoplal ta xtun yuꞌune, ¿cꞌusi xut ta xaꞌi ti oy scꞌuxul yoꞌnton ti Dios ta stojole? 18 Jnichꞌnabtac, maꞌucuc noꞌox me ta xlocꞌ ta quetic ti cꞌux ta xcaꞌi jbatique. Acꞌo vinajuc ta sventa ti cꞌusi lec ta jpastique.

19 Mi cꞌux ta xcaꞌi jbatique, jaꞌ jech ta jnaꞌtic ti oyotic ta stojol ti melele, schiꞌuc ta xcaꞌitic ti jun coꞌntontic vaꞌalotic ta stojol ti Diose. 20 Yuꞌun ti mi ta xacꞌ jnaꞌ ti coꞌntontic ti oy jpaltatique, jaꞌ jelavem snaꞌ scotol ti Diose, jaꞌ mu sta ti coꞌntontique. 21 Jech o xal un, Quermanotac, mi muꞌyuc ta xacꞌ jnaꞌ ti coꞌntontic ti oy jpaltatique, jech o xal un, jun coꞌntontic ta stojol ti Diose. 22 Jech ti stuque ta xijyacꞌbotic scotol ti cꞌusi ta jcꞌanbetique. Yuꞌun ta jchꞌunbetic ti smantale, ta jpastic ti cꞌusi lec ta xile. 23 Ti smantale, jaꞌ ti acꞌo jchꞌuntic ti Nichꞌonil Jesucristoe, ti cꞌuxuc caꞌi jbatic ta jujun tal jech chac cꞌu chaꞌal laj yalbotique. 24 Mi ta jchꞌunbetic smantal ti Diose, tey oyotic ta stojol. Jech ti Diose tey oy ta jtojoltic ec. Jnaꞌtic ti oy ta jtojoltic ti Diose, yuꞌun ta xacꞌ jnaꞌtic ti Chꞌul Espíritu ti laj xa yacꞌbotique.