1 Jamal ta xal ti Chꞌul Espíritue ti cꞌalal slajebtic xa batel ti cꞌacꞌale, oy jlom ta xchiꞌbaj ta xchꞌunel ti Cajvaltique. Yuꞌun tey chbat stsꞌacliic jloꞌlavanej jchanubtasvanejetic ti ta xchanubtasvan ti cꞌusi iꞌacꞌbat snaꞌic yuꞌun ti pucuje. 2 Yuꞌun tey ta stsꞌetan schiquinic ta yaꞌyiel scꞌop ti jutcꞌop cristianoetic ti ta spacꞌta sbaique. Yuꞌun coꞌol xa sꞌelan cꞌaqꞌuem xa ta cꞌacꞌal taqꞌuin ti sjol yoꞌntonique. Mu xa xaꞌiic tijbel ti yoꞌntonique. 3 Ti jutcꞌop cristianoetic taje ta xalic ti mu xuꞌ xijnupune. Jaꞌ jech xtoc ta xalic ti mu scotoluc stacꞌ lajesel ti veꞌliletique, acꞌo mi pasbil onoꞌox yuꞌun Dios ti veꞌliletique ti xuꞌ ta slajesic ti jchꞌunolajeletic ti xojtiquinic ti melele, ti ta xalbeic vocol ti Dios ti cꞌalal ta slajesique. 4 Yuꞌun scotol ti cꞌusi spasoj ti Diose, lec onoꞌox. Altic ta jbajtic. Yuꞌun jaꞌ noꞌox ta scꞌan ti colaval xcutic ti Dios cꞌalal ta jlajestique. 5 Yuꞌun yaloj ti Dios ti lec scotole. Jech o xal un, colaval, xcutic ti cꞌalal ta jlajestique.

6 Ti mi jech ta xachanubtas ti jchꞌunolajeletic taje, ta melel umbi, jaꞌ jun lequil jtunelot yuꞌun ti Jesucristoe. Jaꞌ jech xtoc yacal ta xamalqꞌuin aba, ta xatsatsubtas avoꞌnton yuꞌun ti scꞌop Dios ti jchꞌunojtique, schiꞌuc staoj yav achꞌunoj ti cꞌusi lec lachanubtasate. 7 Mu xatsꞌet-chiquinta ta yaꞌyiel ti voꞌne loꞌiletic ti sventa banomil noꞌoxe, ti altic ta aꞌyiele. Jaꞌ lec, acꞌo persa yoꞌ xuꞌ ta xapas ti cꞌusi ta scꞌan ti Diose. 8 Ti buchꞌu ta xchan yip ta anilajele, ta xtun yuꞌun jutuc. Yan ti buchꞌu ta xacꞌ persa ta snopilanel ti cꞌusi ta scꞌan ti Diose, jaꞌ toj jtunel ta scotol. Ta xtun yuꞌunic ti jech liꞌ to cuxulique. Ta xtun yuꞌunic ti bu ta xcuxiic o sbatel osile. 9 Melel ti cꞌop taje. Jechuc acꞌo xchꞌunic scotolic. 10 Jech o xal un, jaꞌ stu ti ta xijꞌabtejotique, ti ta jtsꞌictic ti ilbajinele. Yuꞌun tey jpatoj coꞌntontic ta stojol ti cuxul Diose, ti jaꞌ Jcoltavanej yuꞌun scotol ti cristianoetique. Pero jaꞌ más to Jcoltavanej yuꞌun ti buchꞌu xchꞌunojique.

11 Jaꞌ yuꞌun un, ti jech laj calbot avaꞌi taje, jaꞌ me jech xaval, jaꞌ me jech xachanubtasvan. 12 Acꞌo iluc ta stojol ti jchꞌunolajeletique ti lec xacꞌopoje, ti tucꞌ ta xapase, ti jun avoꞌnton achꞌunoj ti Diose, ti cꞌux ta xavaꞌi ti jchꞌunolajeletique, ti lec ta qꞌuelel ti acuxlejale. Ti mi jech ta xavacꞌ iluque, manchuc mi queremot to, pero mu xuꞌ xasbajic ti jchꞌunolajeletique. 13 Cꞌalal mu to ta xicꞌote, jech ti voꞌote, jaꞌ me abtelano ta sqꞌuelel ti scꞌop Dios ta stojol ti jchꞌunolajeletique. Tsatsubtasbo yoꞌntonic ti quermanotique. Chanubtaso me. 14 Tunan me yuꞌun ti avabtele. Yuꞌun jaꞌ abijil ti laꞌacꞌbat yuꞌun ti Diose ti cꞌalal laj scajan scꞌobic ta ajol ti ancianoetic yuꞌun ti jchꞌunolajeletique. Yuꞌun jech iꞌacꞌbat snaꞌic yuꞌun ti Diose.

15 Jaꞌuc me batuc o avoꞌnton schiꞌuc ti vaꞌi sꞌelan laj calbote, yoꞌ jech ta xilic scotolic ti lec ta xbat avuꞌune. 16 Jaꞌ yuꞌun un, ichꞌo me aba ta cꞌacꞌal. Bijan me ti cꞌusi ta xachanubtasvane. Junuc me avoꞌnton yuꞌun scotol. Ti mi jech ta xapase, ta xacol. Jaꞌ jech xtoc ta xcolic ti buchꞌutic ta xaꞌiic ti acꞌope.