1 Ti Pedroe schiꞌuc ti Juane yacalic ta xcꞌopojic ta stojol ti cristianoetique, cꞌalal jaꞌ o talic ti paleetique schiꞌuc ti banquilal yuꞌunic ti jchabiej temploe, schiꞌuc ti jsaduceoetique. 2 Toj capem tal ti sjolique. Yuꞌun ti Pedroe schiꞌuc ti Juane ta xalbe yaꞌi ti cristianoetique ti ta xchaꞌcuxi ti animaetique jech chac cꞌu chaꞌal ichaꞌcuxi ti Jesuse. 3 Jech o xal laj stsaquic batel, laj stiqꞌuic comel ta chuquel. Ta yocꞌlomal to laj sloqꞌuesic. Yuꞌun mal xa ti cꞌacꞌale. 4 Ti buchꞌutic laj yaꞌiic ti cꞌu sꞌelan laj yal ti Pedroe ep laj xchꞌunic. Iꞌepajic ti jchꞌunolajeletic nopol voꞌmil ti jaꞌ noꞌox viniquetique.

5 Ta yocꞌlomal tey laj stsob sbaic ta Jerusalén ti banquilaletic yuꞌun ti jꞌisraeletique, schiꞌuc ti moletic ti ichꞌbil yeique, schiꞌuc ti jchanubtasvanejetic yuꞌun ti mantale. 6 Jaꞌ jech xtoc tey oy ti Anas ti banquilal pale to oxe, ti Caifase, ti Juane, ti Alejandroe. Talic xtoc scotolic ti buchꞌutic jaꞌic yutsꞌ yalaltac ti banquilal paleetique. 7 Tey laj yalic mantal ti acꞌo sloqꞌuesic talel ta chuquinab ti Pedroe schiꞌuc ti Juane. Tsꞌacal to tey lic svaꞌanic ta oꞌlol. Jech lic sjacꞌbeic:

―¿Buchꞌu ta sventa, buchꞌu laj yacꞌboxuc avabtelic ti jech ta xapasique? ―xutic.

8 Ti Pedroe ta sventa ti ventainbil yoꞌnton yuꞌun ti Chꞌul Espíritue, jech laj yal:

―Banquilal jꞌabteletic, moletic yuꞌun ti jlumaltique, 9 yuꞌun ti jech ta xajaqꞌuic ti ta xacꞌan xanaꞌic ti cꞌu sꞌelan icol ti coxov vinique, 10 jamal ta xcalboxuc avaꞌiic yoꞌ jech ta xanaꞌic, yoꞌ jech ta snaꞌic scotol ti jchiꞌiltique. Ti vinic ti colem xa ti ta xavilic ti liꞌ vaꞌal ta atojolique, jaꞌ coltaat yuꞌun ti Jesucristo ta Nazarete, jaꞌ ti Buchꞌu laj ajocꞌanic ta cruze. Pero ichaꞌcuxesat yuꞌun ti Diose. 11 Ti Jesús taje jaꞌ ti jbej ton ti laj ajipic loqꞌuel ti voꞌoxuc jꞌabteloxuque. Pero jaꞌ itun ta sliquebal ti nae. 12 Muꞌyuc xa yan ti bu ta jta ti jcoltaeltique. Yuꞌun muꞌyuc laj svaꞌan yan Jcoltavanej ti Dios liꞌ ta banomile. Jaꞌ noꞌox ta sventa Jesús ta jtatic ti jcoltaeltique ―xi ti Pedroe.

13 Ti jchapanvanejetique laj yilic ti muꞌyuc xiꞌel ta xaꞌiic cꞌalal ta xcꞌopojic ti Pedroe, ti Juane. Laj yilic xtoc ti jaꞌ viniquetic ti muꞌyuc yichꞌojic chanubtasele, ti jaꞌ cristiano noꞌoxe. Jech o xal tey labal ta xaꞌiic. Tey ivul ta yoꞌntonic ti jaꞌic ti jmoj to ox ixanavic schiꞌuc ti Jesuse. 14 Jaꞌ jech xtoc ti coxov vinic to oxe tey jmoj vaꞌajtic schiꞌuc ti Pedroe schiꞌuc ti Juane. Jech o xal ti jchapanvanejetique muꞌyuc cꞌusi xuꞌ ta stabeic ti smulique. 15 Tey itacatic loqꞌuel ti bu tsobolique. Stuquic xa noꞌox tey xvulajetic comic. 16 Jech ta xalbe sbaic:

―¿Cꞌusi ta xcutic ti viniquetic leꞌe? Yuꞌun scotol ti jnaclejetic liꞌ ta Jerusalene laj xa snaꞌic lec ti laj xa yaqꞌuic iluc ti smucꞌul stsatsal ti Diose. Mu xa xuꞌ ta jmuctic. 17 Jaꞌ lec, laꞌ jsibtastic yoꞌ jech mu xꞌepajic ti cristianoetic ti buchꞌutic ta xichꞌic albel scꞌoplal ti Jesuse ―xiic.

18 Jech o xal itaatic ta iqꞌuel yan velta. Tsots iꞌalbatic ti mu xa xalbeic scꞌoplal ti Jesuse. 19 Pero ti Pedroe, ti Juane jech laj staqꞌuic:

―Jchiꞌiltac, nopo avaꞌiic lec, ¿mi jaꞌ lec ta xil ti Diose ti jaꞌ ta jchꞌuncutic ti amantalique, mi jaꞌ lec ti jaꞌ ta jchꞌunbecutic smantal ti Diose? 20 Yuꞌun ti vuꞌuncutique mu xuꞌ xquicta jbacutic ta yalel ti cꞌusi quilojcutique, ti cꞌusi caꞌyiojcutique ―xiic.

21 Manchuc mi laj yichꞌic sibtasel yuꞌun ti jchapanvanejetique, pero icoltaatic batel. Yuꞌun mu snaꞌic cꞌusi ta xut yoꞌ ta xacꞌbeic castigo. Jaꞌ ti scotol ti cristianoetique ta xalbeic slequilal ti Diose ti cꞌusi icꞌot ta pasele. 22 Ti vinic ti buchꞌu icol ta sventa smucꞌul stsatsal ti Diose más ta chaꞌvinic (40) jabil yichꞌoj.

23 Ti Pedroe schiꞌuc ti Juane ti cꞌalal icoltaatic batele, tey ibatic ti bu oy ti yan schiꞌiltaque. Tey laj yalic ti cꞌu sꞌelan iꞌalbatic yuꞌun ti banquilal paleetique schiꞌuc ti moletique. 24 Cꞌalal jech laj yaꞌiique, scotolic jech laj yalic ti laj staic ta cꞌoponel ti Diose:

―Cajval, voꞌot Diosot ti laj apas ti vinajele, ti banomile, ti nabe, scotol ti cꞌusitic oye. 25 Ta sventa ti Chꞌul Espíritu avuꞌune, laj sjam ye ti avajtunel Davide ti jech laj avale:

27 ’Ti Herodese, ti Poncio Pilatoe, melel, laj stsob sbaic liꞌ ta Jerusalene schiꞌuc ti jyanlum cristianoetique, schiꞌuc ti jchiꞌilcutique ta scrontainel ti Achꞌul Nichꞌon Jesuse, ti jaꞌ vaꞌanbil avuꞌun ta Jcoltavaneje. 28 Ti jech taje, jaꞌ laj spasic scotol jech chac cꞌu chaꞌal anopoj ti ta xcꞌot ta pasel onoꞌoxe. 29 Avi tana un, Cajval, qꞌuel avi sꞌelan ta sibtasvanic. Acꞌbun yip coꞌntoncutic ti avajꞌabteluncutique yoꞌ jech mu ta xiꞌeluc ta xcalcutic ti acꞌope. 30 Ta sventa amucꞌul atsatsal, coleso ti jchameletique. Acꞌo iluc ti tsots xuꞌ avuꞌun ta sventa ti Achꞌul Nichꞌon Jesuse ―xiic.

31 Cꞌalal jech laj yoꞌntonic ta scꞌoponel ti Diose, tsots inic ti bu stsoboj sbaic ti jchꞌunolajeletique. Scotolic iventainbatic yoꞌntonic yuꞌun ti Chꞌul Espíritue. Oy yip yoꞌntonic ta yalel batel ti scꞌop Diose.

32 Ti epal jchꞌunolajeletique jmoj yoꞌntonic scotolic. Mi jaꞌuc oy bu ta xalic ti jaꞌ yuꞌun stuquic ti cꞌusi oy yuꞌunique. Yuꞌun ti cꞌusitic oy yuꞌunique, ta xalic ti jaꞌ yuꞌun scotolic. 33 Ti jcholcꞌopetique tsots xuꞌ yuꞌunic. Ta xalbeic scꞌoplal ti ichaꞌcuxi ti Cajvaltic Jesuse. Scotolic ep ta xꞌacꞌbatic bendición yuꞌun ti Diose. 34 Muꞌyuc buchꞌu junucal ta xichꞌ svocol yuꞌunic. Yuꞌun scotolic ti buchꞌutic oy yosilique, mi snaique, ta xchonic. Ta xichꞌic talel ti taqꞌuine. 35 Tey chba yacꞌbeic ti jcholcꞌopetique yoꞌ jech ti stuquique ta xchꞌacbeic ti jchꞌunolajeletic ti buchꞌutic muꞌyuc cꞌusi oy yuꞌunique. 36 Jaꞌ jech laj spas jun vinic ti oy ta stojol ti jchunolajeletique. Ti jun vinic taje, jaꞌ jun levita ti jaꞌ José sbie. Voqꞌuem talel ta Chipre banomil ti joyobtabil ta nabe. Ti jcholcꞌopetique laj yacꞌbeic yan sbi ti Josee, jaꞌ Bernabé, Jpat oꞌntonal, xi ti smelol ta xale. 37 Ti vinic taje laj xchon jsep yosil. Ti stojol ti yosile laj yacꞌbe ti jcholcꞌopetique.