1 ¡Aꞌyio avaꞌiic liꞌe, jcꞌulejetic! Ocꞌanic, avananic yuꞌun ti vocol ti ta xcꞌot ta atojolique. 2 Yuꞌun coꞌol sꞌelan cꞌaꞌemic xa ti acꞌulejalique. Jaꞌ jech xtoc coꞌol sꞌelan tiꞌbil ta chon ti jun yutsiquil ti acꞌuꞌique. 3 Yuꞌun cuxinemic ti oroe, ti plata avuꞌunique. Jaꞌ svinajeb ti muꞌyuc cꞌusi xꞌayan avuꞌunique. Tey ta xavaꞌiic ti ta xꞌan ta qꞌuexlal ti abecꞌtalique. Yuꞌun jaꞌ o laj atsob acꞌulejalic ti slajebtic xa batel ti cꞌacꞌale. 4 Ti jꞌabteletic ti buchꞌutic muꞌyuc laj avacꞌbeic stojol ti cꞌalal laj stsobic ti atsꞌunubalique, tey ta scꞌanic parte. Jaꞌ yuꞌun un, ti Dios ti scotol xuꞌ yuꞌune laj xa yil ti xꞌocꞌlajetic ti jꞌabteletic avuꞌunique. 5 Ti liꞌ ta sba banomile, laj xa avacꞌbe abaic scotol ti cꞌusi xal ti avoꞌntonique. Laj xa ajubes abaic jech chac cꞌu chaꞌal ti vacaxe. Pero ta xcꞌot yorail ti ta xichꞌ milele. 6 Yuꞌun ti voꞌoxuque laj asaꞌbeic smul, laj amilic ti buchꞌutic chꞌabal ti smulique. Mi jaꞌuc laj spoj sbaic ti jech laj amilique.

7 Jech o xal un, Quermanotac, oyuc me smucꞌul avoꞌntonic, malaic ti ta xtal ti Cajvaltique. Qꞌuel avil ti buchꞌu ta xchabaje oy smucꞌul yoꞌnton smalaoj ti ta xtal ti voꞌe, yoꞌ jech tsꞌacal to ta stsob ti stsꞌunubale. 8 Jech ti voꞌoxuque, oyuc smucꞌul avoꞌntonic. Mu me xachibajic. Yuꞌun poꞌot xa scꞌan xtal ti Cajvaltique. 9 Quermanotac, mu me xasaꞌbe aba amulic ta jujun tal, yoꞌ jech mu xavichꞌic chapanel. Yuꞌun ti Diose jaꞌ Juez ti nopol xa talel ta tiꞌ nae. 10 Quermanotac, jaꞌ me cꞌotuc ta ajolic ti oy smucꞌul yoꞌntonic icuch yuꞌun svocolic ti jꞌalcꞌopetic ta voꞌne ti cꞌalal icꞌopojic ta sventa ti Cajvaltic Diose. 11 Ti voꞌotique jnaꞌojtic ti xmuyubajic noꞌox ti buchꞌutic icuch yuꞌunic ti svocolique. Ti voꞌoxuque avaꞌbinojic xa ti oy smucꞌul yoꞌnton ti Jove. Jaꞌ jech xtoc avaꞌbinojic xa ti cꞌu sꞌelan lec ipasbat yuꞌun ti Cajvaltic Dios ta tsꞌacal toe. Yuꞌun ti Diose oy slequil scꞌuxul yoꞌnton ta xcoltavan.

12 Tsots scꞌopal ti mu me cꞌusi xavaꞌanic ta rextigo, Quermanotac. Mu me xavaꞌanic ta rextigo ti vinajele, ti banomile. Mi ta xavalic jech mi xachiique, jechuc me. Pero mi ta xavalic moꞌoj mi xachiique, moꞌojuc me, yoꞌ jech mu xataic chapanel yuꞌun ti Diose.

13 Mi oy buchꞌu ta xichꞌ svocole, acꞌo scꞌopon ti Diose. Yan mi oy buchꞌu xmuyubaje, qꞌuejinuc yuꞌun ti sqꞌuejoj Diose. 14 Mi oy buchꞌu ip ta xaꞌie, acꞌo yicꞌ talel ti ancianoetic ti yichꞌojic ta sventa ti jchꞌunolajeletique, yoꞌ jech ta scꞌoponic Dios ta stojol. Jaꞌ jech xtoc ta sventauc Cajvaltic, acꞌo xjaxbeic aceite. 15 Ti jech xchꞌunojic ti cꞌalal ta scꞌoponic ti Cajvaltique, jech ti jchamele ta xcol, ta xtoyat yuꞌun ti Cajvaltique. Mi oy bu staoj smule, tey ta xꞌacꞌbat perdón. 16 Jech o xal un, jamal albo abaic ti amulic ta jujun tale. Cꞌoponbo abaic Dios ta jujun tal, yoꞌ jech ta xacolic. Ti lequil vinic ti sjunul yoꞌnton ta scꞌopon ti Diose, oy stsatsal ti scꞌope. 17 Ti jꞌalcꞌop Eliáse jaꞌ jun vinic jech chac cꞌu chaꞌal ti voꞌotique. Cꞌalal laj scꞌanbe Dios ti mu xacꞌ ti voꞌe, jech o xal un, oꞌlol schanibal jabil muꞌyuc xacꞌ voꞌ liꞌ ta banomile. 18 Tsꞌacal to un, ti cꞌalal lic sta ta cꞌoponel ti Dios yan veltae, jech o xal un, tal ti voꞌe. Lic chꞌiuc ti cꞌusitic xꞌayan ta banomile.

19 Quermanotac, mi oy buchꞌu junucal avuꞌunic ti ta xchꞌac sba ta stojol ti melele, pero mi oy buchꞌu ti ta xicꞌ sutel talel ti jsaꞌmulile, 20 naꞌic me lec ti ta scolta talele, yoꞌ jech mu chꞌayeluc ta xbat o. Jaꞌ jech xtoc ta xꞌacꞌbat perdón yuꞌun ti Dios ti ep smul staoje.