1 Yo' bu lijelovcutic batel xchi'uc li Jesuse, tey laj quilcutic jun jchi'ilcutic ta israelal, ma'sat ono'ox c'alal ivoc' li vinique. 2 Vu'uncutic li yajchanc'opuncutique jech la jac'becutic li Jesuse:

―Jchanubtasvanej, ¿boch'o ta smul ti jech ma'sat ivoc' li vinic li'i? ¿Me ta scoj smul stuc, o me ta scoj smul stot sme'? ―xcutcutic.

3 Itac'ov li Jesuse:

―Muc ta scojuc smul li jchi'iltic li'i, muc ta scojuc smul stot sme'. Ti jech ma'sat ivoc' li jchi'iltique, yu'un jech ac'o vinajuc o stsatsal Dios ta sventa. 4 C'alal cuxulun to li' ta banamile, persa ta jpasbe yabtel li Jtot ti la stacun tale. Me lichame, mu xa xi'abtej li'i. 5 Ti jayib to c'ac'al li'oyun ta banamile, ja' jech chac c'u cha'al luz c'otemun avu'unic, vo'oxuc ti li' oyoxuc ta banamile. Yu'un vu'un ta xcac'boxuc avilic ti xu' chacolic ta jventae ―xi li Jesuse.

6 C'alal laj yal jech li Jesuse, la stubta banamil, la spas ta ach'el. Ja' la sbonbe ta jujubej sat li ma'sate. 7 Jech laj yalbe:

―Batan, bat poco tal asat ta stanqueal vo' Siloé sbi ―x'utat. (Ti Siloée ja' “tacbil”, xi smelol.)

Ibat li ma'sate, bat spoc tal li sate. C'alal isut tale, lec xa xil osil. 8 Jech la sjac'be sbaic li boch'otic tey nopol nacajtic xchi'uque, xchi'uc li boch'otic yilojic ti jech ono'ox ma'sat c'alal ivoq'ue:

―Li vinic li'i ¿me mu ja'uc li boch'o tey chotol ta sc'an limosnae? ―xut sbaic.

9 Oy jayibuc jech laj yalic:

―Ja' le'e ―xiic.

Oy yantic jech laj yalic:

―Mu ja'uc, ja' no'ox yu'un co'ol satic ―xiic.

Li vinique jech laj yal:

―Vu'un chavilique ―xi.

10 Jech la sjac'beic:

―¿C'uxi ijam li asate? ―xutic.

11 Itac'ov li vinique:

―Oy jun jchi'iltic, Jesús sbi, la spas juteb ach'el, ja' la sbonbun ta jsat. C'alal la sbonbune, jech laj yalbun: “Batan ta stanqueal vo' Siloé, bat poco tal asat”, xiyutun. Jech tey bat jpoc tal li jsate, jech ijam o. Li' ta orae chquil xa osil ―xi.

12 Jech la sjac'beic:

―¿Bu oy li vinic chavale? ―xutic.

Itac'ov:

―Mu jna' bu ibat ―xi.

13 Laj yiq'uic batel li vinic ti ma'sat to'oxe, tey bat yaq'uic ta stojol li fariseoetique. 14 Yu'un ja' sc'ac'alil ta jcux co'ntoncutic ti c'alal la spas juteb ach'el li Jesuse yu'un ja' la sjambe o sat li ma'sate. 15 Li fariseoetique la sjac'beic yan velta li vinique:

―¿C'uxi ijam li asate? ―xutic.

Itac'ov li vinique:

―La sbonbun ach'el ta jsat, ts'acal bat jpoc li jsate jech ta xquil xa osil ―xi.

16 Oy jayibuc fariseoetic jech laj yalic:

―Mu yich'ojuc ta muc' Dios li vinic chavale yu'un mu xchabi li sc'ac'alil ta jcux co'ntontique ―x'utat.

Oy yantic jech laj yalic:

―Li boch'o oy smule mu xu' yu'un ta spas sq'uelubil stsatsal ―xiic.

Jech cha'oxvoc' ic'otic li fariseoetique. 17 Jech la sjac'beic yan velta li vinique:

―Li vo'ote ¿boch'o avaloj ti la sjambot asate? ―xutic.

Itac'ov li vinique:

―Li vu'une ta xcal ti ja' yaj'alc'op Diose ―xi.

18 Li fariseoetique muc xch'unic ti ja' li ma'sat to'oxe. Ja' to c'alal bat yic'beic tal stot sme'e, ja' to la xch'unic ti ja' li ma'sat to'oxe. 19 C'alal ivul li stot sme'e, jech la sjac'beic:

―¿Me ja' avol anich'onic li'i ti chavalic ma'sat ono'ox c'alal ivoq'ue? ¿C'uxi ijam sat ti ta xil xa osile? ―xutic.

20 Itac'ov li stot sme'e:

―Ja' col jnich'oncutic, ja' ti ma'sat ono'ox c'alal ivoq'ue. 21 Pero mu jna'cutic c'uxi ijam li sate. Mu jna'cutic noxtoc li boch'o ijambat sate. Jac'bo ava'yic stuc yu'un muc' xa, sna' xa yalel ―xiic.

22 Ti jech laj yalic li stot sme'e, yu'un ta xi'ic yu'un li jchapanvanejetic cu'uncutique. Yu'un li jchapanvanejetic cu'uncutique xchapojic xa ti j'ech'el mu xu' ch‑ochic ta nail tsobobbail li boch'o jamal ta xalbeic sc'oplal Jesús ti ja' xa li boch'o sc'oplal ono'ox chtal ventainvanuque. 23 Ja' ta sventa ti jech laj yalic li stot sme'e: “Muc' xa, jac'bo ava'yic stuc”, ti xiic no'oxe.

24 Laj yiq'uic tal yan velta li vinic ti ma'sat to'oxe. Jech laj yalbeic:

―Ja' xavalbe slequilal li Diose yu'un ja' la scoltaot. Li vinic chavale ta jna'cutic ti mu xich' ta muc' Diose ―xutic.

25 Itac'ov li vinique:

―Mu jna' me mu xich' ta muc' Dios li vinique. Ja' no'ox ta jna' ti ma'satun to'oxe, li' ta orae chquil xa osil yu'un ―xi.

26 Jech lic sjac'beic yan velta:

―¿C'uxi laj yut la sjambot li asate? ―xutic.

27 Itac'ov li vinique:

―Laj xa calboxuc ava'yic. Mu xac'an xach'unic. ¿C'u yu'un ti chac'an chava'yic yan veltae? ¿Me yu'un chac'an chanaban abaic ta stojol ec? ―xi.

28 Tey lic slabanic, jech laj yalbeic:

―Li vo'ote ja' nabalot ta stojol li boch'o mu xch'unbe smantal Diose. Li vu'uncutique ja' ta jch'uncutic c'usi yaloj li j'alc'op Moisese. 29 Jna'ojcutic ti la sc'opan sbaic xchi'uc Dios li Moisese. Li boch'o chavale mu jna'cutic bu liquem tal ―xiic.

30 Itac'ov li vinique:

―Ta xch'ay co'nton avu'unic ta xca'i ti mu xana'ic bu liquem tale. Yu'un chavilic ti ja' la sjambun jsate. 31 Li Diose ta jna'tic ti mu stuc'ulanbe sc'op li boch'otic mu xch'unbat smantale. Li boch'o ta xich' ta muc' Diose, ti tspasbe c'usi tsc'ane, ja' ta x'a'ibat sc'op yu'un li Diose. 32 C'alal ilic tal li banamile xchi'uc c'alal to tanae, mu'yuc boch'o jech ca'yojbetic sc'oplal ti xu' yu'un ta sjambe sat li boch'o ma'sat ono'ox c'alal ivoq'ue. 33 Ti manchuc tey liquem tal ta stojol Dios li boch'o ta xcale, mu'yuc c'usi xu' yu'un ta spas ti jechuque ―xi.

34 C'alal jech laj ya'yique, la slabanic. Jech laj yalbeic:

―Vo'ote yu'un pucujot ja' yu'un ma'sat lavoc'. Pero li' ta orae vo'ot chac'an chachanubtasuncutic ―xutic.

Jech laj yalbeic ti j'ech'el mu xu' ta x'och o ta nail tsobobbaile.

35 Li Jesuse laj ya'ibe sc'oplal ti j'ech'el mu xu' ta x'och ta nail tsobobbail li vinique. Jech ital li Jesuse, tal sc'opan li vinique. Jech la sjac'be:

―Li vo'ote ¿me ach'unoj ti talem xa li Xnich'on Dios ti ja' xu' ta scoltaot yu'un amule? ―xut.

36 Itac'ov li vinique:

―¿Bu oy? tata. Ta jch'un ―xi.

37 Li Jesuse jech laj yalbe:

―Li' xa aq'uelojbe sate yu'un vu'un ti li' ta jc'opanote ―xut.

38 C'alal laj ya'i li vinique, la squejan sba ta stojol. Jech laj yalbe:

―Cajval, ta jch'un ti vo'ot chacoltaun yu'un jmule ―xi.

39 Li Jesuse jech laj yalbe li vinique:

―Ti lital li' ta banamile yu'un jech chvinaj c'u x'elan yo'ntonic li cristianoetique. Yu'un li boch'otic tsc'an ono'ox chotquinic Diose ja' ta xjambat satic ya'yel yu'un ta xotquinic. Yan li boch'otic xotquinic ono'ox Dios yalojique ja' tspasic ta ma'sat ya'yel yu'un mu xu' chotquinic o ―xi.

40 Oy jayibuc fariseoetic tey xchi'inojic li Jesuse. C'alal laj ya'yic jech laj yal li Jesuse, jech la sjac'beic:

―¿Me yu'un ma'satuncutic avaloj ec li vu'uncutique? ―xutic.

41 Itac'ov li Jesuse:

―Ti ma'satucoxuque, mu'yuc amulic ti jechuque. Yu'un chavalic ti xavotquinic Diose, ja' amulic c'otem ―xi li Jesuse.