PILLIMONO
Pollone Ye PILLIMONO Pepá Topa Sirimu Bokumu
Pollone I Pepá Topa Sirimumunge Ungu Pulu Mare
Pollo kinie yuni pepá topa sirimumenga ungu pulu mare inie yakondo gomo 714 molemo.
‘I pepámo Romo ka-ulkena pepalie torumu.’ ningu pilimele. ‘Epesasi kinie Pillipai kinie Kollosi kinie aku taonomanga yembomanga pepáma yu ka-ulke telune pepalie torumula.’ ningu pilimele.
Pillimono yu ye awili molopa yembo mare yunge kongono we tendeko mele kalolime naa lili yemboma nokopa molorumu. Yunge kongono we tendeli ye te, Onesimasi nilimu, kowa pupe Romo purumu kinie Pollonga ungumu pilipe konopu alowa tepa ‘Kirasi sike.’ nimbe tondolo mundupe pilierimu. Pe yuni Pollo nokorumu.
Kongono we tendeli yemboma kowa pulimele kinie Romo gapomano ungu mane tene nimbendo: ‘Mongo liku singendo toko kondangi.’ nimbe perimu. Nalo Pollone Onesimasi konopu mondopa Pillimono pepá topa sipelie nimbendo: ‘Yu altoko ulkena liku “Ano.” ningu taka liku nokani.’ nirimu. Nalo Pollone Pillimono aku sipe mele mawa tembando sumbi sipe naa nimbe ou ungu mare we nirimumunge ungu marenga ungu pulumu mindili sipu pilimolo. Kowa purumu ye Onesimasinge imbimu kolomongo kanga 10 pulu polopa nimbe, pepámo topa pora simbendo kamu ungu te mawa terimu.
Ya ungu pulumu pora nikimu.
1
1-25 pali PILLIMONONGA KONGONO WE TENDELI KENDEMANDE YEMO OU TALOPA LEPA PURUMU, AKU YEMO PE KONOPU ALOWA TEPA KIRASINGE YEMO MOLORUMU KINIE POLLONE PILLIMONO MOLORUMUNE KELEPA LIPE MUNDORUMUMUNGE UNGUMU
1-3 Pollone Pep mo Tombando Pulu Polopa Torumu Ungumu
1-2 Na Pollo, Kirasi Yesusinge kongono tendeliomonga ka-ulkena pelio yemo, na kinie olionga angenu Timoti pea molopololie ipepámo topo sikiru.
Oltonga paa pulu lemo ye Pillimono, tapu topo kongono telemolo yemo, nu kinie, olionga kemulu Apia keme, olio pea tapu topo opa teli ye Akipasi keme, Kirasinge yembo talape*bokumunge alsena anjokondo “43. sios”. Pillimono nunge ulkena maku tolemele yemboma kinie, eno ipepámo topo sikiru.
3 Olionga Lapa Pulu Yemo kinie Awili Yesusi Kirasiselone†bokumunge alsena anjokondo “6. Bikpela”, “23. Krais”. eno we kondo kolkolo, ‘Eno konopu pe nipili taka liku molangi.’ niengili.
4-7 Pillimono Ulu Peangama Tepa Molorumu Mele Pilipelie Pollone Konopu Sipe Pulu Yemo Kinie “Ange.” Nirimu Temanemo
4-5 Nanga pulu lemo ye ⸤Pillimono⸥, nu Awili Yesusi ⸤molopa, olionga nimbe tenderimu tendelemo mele⸥ ‘Sike.’ ningu tondolo munduku pilku molko,‡bokumunge alsena anjokondo “8. bilip”. Pulu Yemonga yemboma pali konopu mondoko moleno mele pilipulie Pulu Yemo kinie ungu nimbondo alieli nunge mawa tendepo, nanga Pulu Yemo kinie “Ange.” nilio. 6 Pulu Yemo kinie nunge mawa tendepolie, ‘Nu kinie olio ‘⸤Yesusi Kirasi⸥ sike.’ nimbu tondolo mundupu pilimolomonga konopu telune pupili tapu topo molemolo ulumuni nu paa pilipe konginjelimu sipili. Aku pilipe konginjelimu pemba kinie Kirasinge mele peanga olio silimo limoloma kamu tondolo munduku pilieni.’ nilio. 7 Nuni, ango, Pulu Yemonga yemboma konopu mondokolie konopu peanga pepili molonge ulume tenderinu mele pilipulie na konopu sipu konopu paa tondolo pupili molio.
8-22 Pollone Pillimonondo “Onesimasi Kelko Sukundu Likulie ‘Nunge Kandi Angenu Mele Molopili.’ Ni.” Nirimu Ungumu
8 Nane nu ulu te ‘tei.’ nimbu mawa tembo tekero akumu nu kinie olto Kirasinge yeselo molembolomonga ‘Nu paa sike tei.’ nimbu tondolo mundupu manda nilke nalo ⸤nuni teleno mele nikiru aku siku molko Pulu Yemonga yemboma kondo kolko teleno⸥ akumunge 9 ⸤aku sipu naa nimbo⸥.§Pollone Pillimono ulu te “Tei.” nimbendo ou ya tepa pangu sirimu. Konopu mondoli ulumuni olto lipe tere lendepa ‘Telune molangili.’ nilimo-na aku sipu molembolomonga nane ⸤‘Nu i siku tei.’ nimbu tondolo mundupu naa nimbu, ‘Ulu te teani.’ nimbu⸥ nu taka lipu mawa tembo tekero. Sike na Pollo, na ye andamo,*Giriki ungu molemo boku tenga “ye anda” molemo akumu Pisini boku oumunge molemo mele. Giriki ungu molemo boku tenga “Kirasinge ungumu andopo nimbu sindilio.” molemo, akumu Pisini Baipele pe toringimunge molemo. Ungu talo Giriki ungune nondopa telu mele. Laye-kolte mindi lupe lupeselo. Kirasi Yesusinge kongono tendeliomonga ka ulkena pelio, na aku sipu yemo moliomonga 10 nanga malo Onesimasinge mawa tendepolie ‘nuni yu teko kondani.’ nikiru. Na ka-ulkena pepolie yu mane sirindu kinie yu ⸤konopu alowa tepa⸥ ‘⸤Kirasi⸥ sike.’ nimbe tondolo mundupe pilipe ⸤Kirasinge yemo⸥ molorumu mele molemomonga kinié yu nanga malo ⸤mele⸥, na yunge lapamo molio. 11 Ou sike yuni nunge kongono peanga te mimi sipe naa tenderimu nalo kinié nu kinie olto pea yuni mimi sipe lipe tapondopa kongono tendemba yemo molemo.
12 Kinié yu nu molenona “Kelko pu.” nikiru nalo pukumu kinie na paa konopu umbune tekemo. 13 Na temane peangamo topo silipu andorundumunge ka siringi ka ulkena pelio kinie Onesimasini nunge kolo wangopa “Na liku tapondoko ka ulkena nokani molou.” nilke 14 nalo ‘nuni paa sike na liku tapondani kene nu molenona yu ou naa opili. Yu pipi sipu nunge nimbe na lipe tapondopili.’ nimbu we karaye tepo naa nimbo. ‘Nu nunu konopuni pilkulie teani.’ nimbu ‘nu molenona yu opili.’ nikiru. ⸤Nu molenona ombá kinie yu pe molopa temba mele nu nunu pilieni!⸥
15 Pe nu molonine kelepa sukundu omba nu kinie kamu-kumu molombando Onesimasi ou wallo-kolte nu molenona mundupe siye kolopa kolea tenga purumu molemonje.†‘Pulu Yemone “Aku sipe ulumu wendo opili.” nirimu-ne aku sipe wendo orumunje.’ konopu lepalie aku sipe nirimunje. 16 Nalo aku liemo yu nunge kongono we tendeli kendemande yemo mindi molombando aku sipe ulumu wendo naa orumu. Yu sike nunge kongono we tendeli yemo molemo nalo kinié akumu mindi molo. Kinié nunge angena kepe molomba kinie nuni yu paa konopu mondonimunge aku sipe mele ulumu wendo orumunje. Nane Onesimasi paa konopu mondopo ‘Yu nanga paa sike kandi angenunje.’ konopu lelio. Pe yu kinie nu pea Awilimunge angenunguluselo molongelemonga kepe, yu nunge angena molopa kendemande kongonomo tendepa kondombamonga kepe, ‘nuni Onesimasi yu konopu mondoni mele olandopamo, nane yu konopu mondolio mele maniendopa.’ konopu lekero.
17 Akumunge, ‘Na nu kinie pea Kirasinge kongonomo tapu topo telembolo.’ konopu leno liemo na olka kinie “Pea molambili ou.” nilina mele yu ombá kinie “Pea molambili ou.” nieni. 18 Yuni nu kinie ulu te tepa kenjerimu liemo, molo yunge pundu te nu kinie angilierimu liemo akume Onesimasindu “Pundu tou.” naa ningu, siye kolani. Aku pundume pali nane tombo kene nanga imbi tondani. 19 Na Pollo, nanu aku pundume tombomonga nanga kimuni nanga imbimu ipepána tokoro. Nalo nu na-kinie pundu te angilimo, ‘aku pundumu naa nindu liemo nu we pilku moleno.’ konopu lekero. Nu na kinie pundu angilimo akumu, nane nu lipu tapondorundumunge nu konde molko kondoko mindi puni ulumu nu kinie pelemo kanumu. 20 Ano, ‘Awilimunge kongono te tendambo.’ ningu na liku tapondoko ulu peanga te teani.‡‘na ulu peanga te teko liku tapondani.’ nirimu akumu Giriki ungune ye Onesimasinge imbimu kinie ya ‘ulu peanga’ nimbe molemo unguselonga imbiselo nondopa telu mele. Bisinete teko kou olandopa limele, aku unguselonga ungu pulumu mele telu sipe. Pollone aku sipe pilipelie laye ungu iko mele topa aku sipe nikimunje. Olto Kirasinge yeselo molembolomonga nuni na konopu peanga pepili ulu te teani.
21 Na paa mimi sipu pilkiru: ‘Nane “Tei.” nikiru ungumu nu paa pilku liku teni.’ konopu lepolie ipepámo nu topo sikiru. ‘Nane nu “⸤Onesimasi kinie⸥ teani.” nimbu mawa tekero akumu nuni paa olandopa yu liku tapondoko teni.’ konopu lekero.
22 Na ungu te pea mawa tekerola: Na pilkirumu, ‘Enone Pulu Yemo kinie mawa telemele mele yuni pilipelie ‘Na eno molemelena wambo.’ nimbé.’ konopu lekero. Akumunge ‘na nunge ulke ombo pembo kene suluminia te teko mimi teko nosindeni.’ ⸤nimbu mawa tekero⸥.
23-25 Pollone Pep Topa Pora Sipelie “Molou.” Nirimu Ungume
23 Epaparasi, yu§yemonga ungu te Kollosi 4:12. Kirasi Yesusinge kongono tenderimumunge yu ka siringi, kinié olto pea ka ulkena tapu topo pelembolomo, yuni “Nu manda molenoye?” nimbe, nimbe mundukumu. 24 Na kinie pea tapu topo kongono telemolo ye Mako kinie Arisitakasi kinie*yeselonga ungu te Kollosi 4:10. Dimasi kinie LLuku kinie†yeselonga ungu te Kollosi 4:14. enone “Nu manda molenoye?” nikimilila.
25 Awili Yesusi Kirasini enonga minime we kondo kolopa molopili molangi.
⸤Aku pea nikiru.⸥
*1:1-2: bokumunge alsena anjokondo “43. sios”.
†1:3: bokumunge alsena anjokondo “6. Bikpela”, “23. Krais”.
‡1:4-5: bokumunge alsena anjokondo “8. bilip”.
§1:9: Pollone Pillimono ulu te “Tei.” nimbendo ou ya tepa pangu sirimu.
*1:9: Giriki ungu molemo boku tenga “ye anda” molemo akumu Pisini boku oumunge molemo mele. Giriki ungu molemo boku tenga “Kirasinge ungumu andopo nimbu sindilio.” molemo, akumu Pisini Baipele pe toringimunge molemo. Ungu talo Giriki ungune nondopa telu mele. Laye-kolte mindi lupe lupeselo.
†1:15: ‘Pulu Yemone “Aku sipe ulumu wendo opili.” nirimu-ne aku sipe wendo orumunje.’ konopu lepalie aku sipe nirimunje.
‡1:20: ‘na ulu peanga te teko liku tapondani.’ nirimu akumu Giriki ungune ye Onesimasinge imbimu kinie ya ‘ulu peanga’ nimbe molemo unguselonga imbiselo nondopa telu mele. Bisinete teko kou olandopa limele, aku unguselonga ungu pulumu mele telu sipe. Pollone aku sipe pilipelie laye ungu iko mele topa aku sipe nikimunje.
§1:23: yemonga ungu te Kollosi 4:12.
*1:24: yeselonga ungu te Kollosi 4:10.
†1:24: yeselonga ungu te Kollosi 4:14.