4
1 Aku ungume pilipu pora sipulie pe kanorundu kinie mulu koleana ulke nangapemo topa lierimu kanorundu. Kanu kinie ungu ou pilierindu kinie biyukele mele ungu nirimu*inie yakondo 1:10. akumuni nimbendo: “Pe wendo ombá ulume nane nu lipu ora siembo inie olando ou.” nirimu. 2 Aku nirimu kinie walsikele na molorundune Mini Kake Telimu omba na ambolorumu-ne†inie yakondo 1:10. kanorundu kinie mulu koleana ye nomi kingimu molopa koleama nokolemo polo te lierimu, akune ye te molorumu.‡akumu Pulu Yemo. 3 Akune ola molorumu yemo isipe mele molorumu. Kou mone olandopa pulimo kou jasipa kinie§inie anjokondo 21:18. kou kondoli konillianeselo pa telemo mele yu aku sipe pa terimu. Kou mone olandopa pulimo kou kondili nili emera pa telemo mele mulúne-wambiye te kolombe-kaweya melemo aku sipe ye nomi kingimunge polomo lipe makaye tendepa kanu kou emera mele tondolo pa tepa lierimu.
4 Kanu ye nomi kingimunge polona ye nomi kingimenga polo wane paono po*10 tokapu telu (24) kanumu. nosiku makaye teringi, aku polomanga ola ye nomi wane paono po moloringi. Eno wale-pakoli kake telime pakoko, ye nomi kingime wanie kou-gollone telime pakolemele mele wanie pakoko moloringi. 5 Ye nomi kingimunge polona kariapá tepa, ungu tondolo mundupe nimbe, mulú torumu. Polomonga kumbine kiye yepoko pakera norumu, akume Pulu Yemonga Mini yepoko pakera.†inie yakondo 1:4***. 6 Polomonga kumbine nomu kusa molorumu akumu gallási none tepa paa kake terimu.
Mele kise konde mololime kolea awi-suku-singine ye nomi kingimunge polomonga makaye teko moloringi, aku melemanga bulkundu olkondo pali mongo awisili angilierimu. 7 Aku melemanga te lopa-posi llayono melemo,‡pikisa talo gomo 1286 kinie, 1223 kinie molemo. te kongi kao melemo, te yunge kumbikeremo yembo melemo, te mulune mangopa andolemo kera iliaka melemo aku siku mele moloringi. 8 Konde mololi mele kise aku poko enonga yu-mele-mele pou talo pakera nimbe angilipe, mongo paa awisili kangimenga angilipe, poumenga pea olakondo kepe maniekondo kepe angilierimu. Ipulueli tangoli eno múlu naa pilku taki-teki ningendo:
“Pulu Ye Olandopa Molopa Enge Nilimu
yu paa kake telimu,
yu paa kake telimu,
yu paa kake telimu,
ou molorumu, kinié molemo, pe ombá yemo.”
ningu molemele. 9 Ye nomi kingimunge polomonga molemo ye, alieli molopa mindi pulimo pumbe yemo yu konde mololi mele kisene taki-teki kapi ningu imbi liku ola mundunduku “Ange.” nilimele kinie 10 ye nomi wane paono po eno ne ye polona molemomonga kumbikerena manie puku tamalu peko, kanu ye alieli konde molopa mindi pulimo pumbe yemo kapi ningu imbi liku ola mundunduku, enonga ye nomi kingi pakolemele wanie mele pakolemelema wendo liku yunge kumbikerena manie nosikulie ningendo:
11 “Olionga Awilimu, olionga Pulu Yemo,
melema pali nuni wengendeko terinu.
Nunu konopuni pilkulie nunge engemone
melema terinu kinie wendo oringi,
nunge engemone melema kinie
wendo wendo ongo molemele, akumunge
yembomane pali
“Nu Ye Awilimuni teleno mele paa teleno.” ningu
“Ange.” ningu
“Nunge imbimu paa ola molemo.
Nu ye nomi paa awilimu molko
melema pali nokoleno nokoni tondolomo
pelemo yemo.” ningu
nu aku siku kapi ningu molonge kinie papu.”
nilimele.