10
10:1-15 Pulu Yemone Ulu Terimumenga Pulumu Isirele Yembomane Naa Pilieringi Ungu Te (9:30-10:21 pali kanani.)
1 Angokeme, ‘Nanga pulu lemo Isirele yemboma mindili nolemela aulkena wendo ongo, yu kinie pea molko kondonge aulkena pangi.’ konopu lepo ⸤na Pollone⸥ Pulu Yemo alieli mawa tepo molio.*Nambeko molko kondongeye? “Yesusi yu sike Pulu Yemone lipe mundorumu ye nomi Kirasi olionga Lipe Tapondolimu.’ ningulie molko kondonge.’ nimbe nirimunje. Bokumunge alsena anjokondo “21.2.kisimbek” kananila. 2 Enone Pulu Yemone “Teaa.” nilimo ulume ‘Tondolo mundupu teamili.’ ningu telemele mele na kanopo manda nimbu simbo nalo Pulu Yemone kanopa peanga kanolemo ulume naa pilku kondolemele akumunge aku sipu mawa tepo molio. 3 Pulu Yemone ‘yembo sumbi nilime.’ nimbe kanolemo mele naa pilku, eno enono pilku ‘Isipu temolo kinie yembo sumbi nilime molomolo.’ ningu pilku teringi. Akumunge ‘Pulu Yemone eno ‘yembo sumbi nilime’ nimbe kanolemo ulumu teamili.’ naa niringi. 4 Kirasini ‘Yemboma ⸤‘Na sike lipe tapondopa, mindili nolemela aulkena wendo limo.’ ningu⸥ tondolo munduku pilimele yemboma pali Pulu Yemone ‘yembo sumbi nilime’ nimbe kanopili.’ nimbe ⸤Mosisini Pulu Yemonga⸥ ungu manema ⸤sirimume⸥ nga tondolomo Kirasini ‘manie pupili.’ nirimu kanumu.†bokumunge alsena anjokondo “8.bilip”, “45.stretpela man”, “26.lo”.
5 Mosisini sirimu ungu manema pilku liku tenge yemboma Pulu Yemone ‘yembo sumbi nilime’ nimbe kanomba mele Mosisini boku topalie nimbendo:
“Ungu manema ⸤pali⸥ pilku kondokolie
sumbi siku tenge yemboma
aku tengemonga molko kondoko mindi punge.”
nirimu.‡LLipai 18:5. ‘Nalo akumu manda temba yembo te naa molemo.’ nimbe nirimu. Inie yakondo 2:13, 3:10,20,23 kana. 6 Nalo ‘⸤Yesusi Kirasi⸥ sike ⸤nanga nimbe tenderimu⸥.’ ningu tondolo munduku pilimelemonga Pulu Yemone ‘yembo sumbi nilime.’ nimbe kanombamonga ungu te isipe molemo:
“Eno enono konopuni pilkulie,
‘Nawene (‘Kirasi mana manie lipu membo wambo.’
nimbe) mulu koleana ola pumbeye?’
ni naa niengi.ӤUnguManema 30:12.
ungu te aku sipe molemo. 7 Molo i siku ninge:
“ ‘Nawene (Kirasi kelepa kololi koleana
wendo lipe memba ombándo)
yembo kololime pulimele koleana
manie pumbeye?’ ni naa niengi.”*UnguManema 30:13.
nimbe molemo.
8 ⸤Aku sipe ungumu manda molo. Pulu Yemone yembo sumbi nilime nimbe kanolemomonga⸥ ungumu nambolka nimbe molemoye? Isipe nilimo:
“Ungumu eno-kinie nondopa molemo.
Enonga kerena molopa konopune pelemo.ӠUnguManema 30:14.
nilimo. Aku ungu nirimumu ‘⸤Kirasi⸥ sike ⸤olionga lipe tapondolimu⸥.’ nimbu tondolo mundupu pilimolo ungumu olione andopo nimbu silimolo ungu kanumu. Akumu isipe: 9 Enone sumbi siku “Yesusi yu nanga Awilimu.” ningu siku, enonga konopune ‘Yu kolorumu kinie Pulu Yemone yu ono koleana topa makinjinderimu.’ ningu tondolo munduku pilimele kinie Pulu Yemone lipe tapondopa eno mindili nolemela aulkena wendo lipe, yu kinie pea molko kondonge aulkena lipe mondomba.‡LipeMundorumuYema 8:37, 16:30-31; bokumunge alsena anjokondo “21.2.kisimbek”. 10 Konopuni ⸤‘Yesusi sike nanga nimbe kolondorumu kinie Pulu Yemone sike yu topa makinjinderimu. Yu nanga Awilimu.’ ningu⸥ tondolo munduku pilimele yemboma aku siku pilimelemonga Pulu Yemone eno kanopalie, enonga ulu pulu kerime siye kolopa eno ‘yembo sumbi nilime.’ nimbe we kanomba. Konopuni ningu pilimele mele ‘Yemboma piliengi!’ ningu keremone ningu silimelemonga Pulu Yemone eno lipe tapondopa mindili nolemela aulkena wendo lipe yu-kinie molko kondonge aulkena lipe mondolemo. 11 Akumu Pulu Yemonga bokune ungu te molemo mele isipe:
“Yu sike ⸤lipe tapondomba⸥.’ ningu
tondolo munduku pilimele yembomane
⸤yuni sike lipe tapondombamonga⸥
pe ‘Yu kolo tokomo.’ ningu
konopu keri panjinge aulke te naa lemba.’§Aisaya 28:16, inie yakondo 9:33.
nilimo. 12 Bokune ‘tondolo munduku pilimele yemboma’ nilimo akumu Juda yembomando mindi naa nilimo. Juda yemboma naa molemele yembomando*bokumunge alsena anjokondo “14.Grik”. kepe pali nilimo. Ye awili telumu olionga pali Ye Awilimu akumunge olio pali telu sipe nokolemo. Awilimu yu walsiku ‘Na liku tapondou.’ ningu mawa telemele yemboma pali awili tepa, tepa kondolemo.
13 “Awilimu imbi leko walsiku
⸤‘Liku tapondou.’ ningu⸥ mawa telemele†bokumunge alsena anjokondo “28.nem”.
yemboma pali yu sike lipe tapondopa
mindili nolemela aulkena wendo lipe
yu-kinie pea molko kondonge aulkena
lipe mondomba.”‡Joele 2:32; bokumunge alsena anjokondo “21.2.kisimbek”.
akumunge olio pali telu sipe nokolemo.
14 Aku liemo ‘Yu sike. ⸤Yuni sike lipe tapondopa mindili nolemela aulkena wendo limbe.⸥’ ningu tondolo munduku naa pilkulie “Liku tapondou.” ningu nambeko yu walsingeye? Yuni enonga nimbe tenderimu, yu molemo mele temanemo naa pilkulie ‘Yuni lipe tapondomba.’ ningu nambeko tondolo munduku pilingeye? Yembo tene yuni enonga nimbe tenderimu, yu molemo mele nimbe naa simbe kinie eno nambeko pilingeye? 15 “Ungumu ningu si-pe!” nimbe lipe naa mundumbe kinie eno nambeko ungumu puku ningu singeye? Aku sipe Pulu Yemonga bokune ungu te molemo, akumu isipe:
“Yemboma ungu peangamo ningu singendo
kimbu kongono teko olemele akume
yembo paa peangama.ӤAisaya 52:7.
nilimo.
10:16-21 Isirele Yembomane Pulu Yemonga Temane Peangamo Pilku Naa Lsingi Ungu Te (9:30-10:21 pali kanani.)
16 Nalo Isirele yembo mare temane peangamo pilku naa lsingi. Akumunge Aisayane nimbendo:
“Awilimu, nunge ungu andopo nimbu simulumu
namelene ‘Sike.’ ningu
tondolo munduku pilieringiye?”*Aisaya 53:1.
nirimu. 17 Akumunge Pulu Yemonga ungu ningu silimele pilimele aku ulumuni yembomane ‘⸤Kirasi⸥ sike. ⸤Yuni sike na lipe tapondopa mindili nolka aulkena wendo limbe.⸥’ ningu tondolo munduku pilimele aulkemo akisindilimo. Ungu ningu silimele pilimele akumu Kirasinge ungumu.
18 Nalo nane walsipulie: ‘Isirele yemboma eno ⸤iungumu⸥ naa pilieringiye?’ nimbu walsikiru. Molo, ⸤aku naa nikiru⸥. Eno paa sike pilieringi. ⸤Akumu Pulu Yemonga bokune ungu te molemo:⸥
“Kerena niringi ungume yembo moloringi
ma koleamanga pali wendo omba purumu.
Enonga ungume koleamanga pali pilieringi.ӠKonana 19:4.
⸤ungu te aku sipe molemo.⸥ 19 Altopo ungu te walsipulie: ‘Isirele yemboma iungumunge pulumu naa pilieringiye?’ nimbu walsikiru. Molo. Paa sike pilieringi. Mosisini ⸤Isirele yembomando Pulu Yemonga⸥ ungu te nirimumu ou niembo:
⸤Pulu Yemone nimbendo:⸥
“ ‘⸤Na Pulu Yemone ‘eno Isirele yemboma mindi
tepa kondomba.’ konopu lemele mele pilipulie
enone⸥ ‘Yembo talape imbi naa mololime.’
ningu kanolemele yemboma
⸤tepo kondombo kinie⸥
molko kondongemonga kanokolie
eno Isirele yembomane
kanu yemboma-kinie konopu keri panjiku
⸤‘Olio aku sipe tepa kondopili kene
yunge ungumu pilipu
yu bulu naa siemili.’ niengi.’⸥ nimbo.
‘Nane ⸤eno Isirele yemboma
lipu tapondambo.’ nimbu molio mele
enone⸥ ‘Yembo talape konopu naa peli
molko kenjilimele yemboma.’
⸤ningu kanolemele⸥ yemboma
lipu tapondombo kinie
molko kondongemonga kanokolie
nane ‘eno Isirele yembomane akume kanoko
mumindili kolko,
⸤‘Olio aku sipe tendepili
yu molemona pamili⸥.’ niengi.’ nimbo.”‡UnguManema 32:21. Mateyu 17:27, Romo inie anjokondo 14:20-21.
nirimu. 20 ⸤Sike Isirele yembomane ‘Olio manjipu Pulu Yemonga yemboma molemolo.’ ningu pilieringi nalo⸥ Aisayane kepe aku sipe ⸤Isirele yemboma⸥ pipili naa kolopalie ⸤Pulu Yemonga⸥ ungu te ⸤Isirele yembo talape ulsukundu yembomando⸥ sumbi sipe nimbendo:
“Na ‘koropo kanamili.’ naa niringi yembomane
na kanoko lenderingi.
Na ungu te walsiku naa pilieringi yemboma
‘Na kanangi.’ nimbu eno moloringine
ombo mona molorundu.ӤAisaya 65:1.
nirimu. 21 Isirele yembomando Aisayane ⸤Pulu Yemonga⸥ ungu te pea nimbendo:
“Nanga ungumu naa pilku liku
kara pulimele yembomando
nane alieli “Wangi.” nimbu
koronga-ou kepe kinié yandopa kepe
kangulupu limbo tepo angilio.”*Aisaya 65:2.
nirimu.
*10:1: Nambeko molko kondongeye? “Yesusi yu sike Pulu Yemone lipe mundorumu ye nomi Kirasi olionga Lipe Tapondolimu.’ ningulie molko kondonge.’ nimbe nirimunje. Bokumunge alsena anjokondo “21.2.kisimbek” kananila.
†10:4: bokumunge alsena anjokondo “8.bilip”, “45.stretpela man”, “26.lo”.
‡10:5: LLipai 18:5. ‘Nalo akumu manda temba yembo te naa molemo.’ nimbe nirimu. Inie yakondo 2:13, 3:10,20,23 kana.
§10:6: UnguManema 30:12.
*10:7: UnguManema 30:13.
†10:8: UnguManema 30:14.
‡10:9: LipeMundorumuYema 8:37, 16:30-31; bokumunge alsena anjokondo “21.2.kisimbek”.
§10:11: Aisaya 28:16, inie yakondo 9:33.
*10:12: bokumunge alsena anjokondo “14.Grik”.
†10:13: bokumunge alsena anjokondo “28.nem”.
‡10:13: Joele 2:32; bokumunge alsena anjokondo “21.2.kisimbek”.
§10:15: Aisaya 52:7.
*10:16: Aisaya 53:1.
†10:18: Konana 19:4.
‡10:19: UnguManema 32:21. Mateyu 17:27, Romo inie anjokondo 14:20-21.
§10:20: Aisaya 65:1.
*10:21: Aisaya 65:2.