İoanen
śampi Mǔq Xavar
Běšin əyit
Me girkə śampiyo ap'ost'ol İoane. İçal me girke boş śampi hadisoğoy şahide. Şot'in ham əbraniğoy ədətxo q'a şot'oğoy fikirxo, hamal İsraili coğrafiina şaat'e avay. Metər sa fikire bu ki, İoanen me girkə beş erin 50-70 ci usenxoy aranene śampe.
İoanen iz girke məksədə qay təst'iğebsa: «Ama memiya bakalorox şot'aynak'e śameśe ki, və̌n İsusi Xrist'os, Buxačuğoy Ğar baksuna věbaki Şot'ay s'iyen yəşəyinş haq'es bakanan» (20:31).
«İoanen śampi Mǔq Xavar» girken İsusa Buxačuğoy həmişəluğ Əyit k'inək'e ak'est'a: «Əyit Amdar baki beş aranene yəşəyinşi. Şo ük' bok'ospsunen q'a seriluğen buyey». (1:14). İsusa Buxačuğoy həmişəluğ Əyit k'inək' ak'est'ala samci bəndurxoxun oşa «Mǔq Xavarast'a» İsusi cürbəcür möcüzoğoy ak'est'uni baradane exlətesa. Me möcüzoğon İsusi əyit tadeśi Çark'est'al saal Buxačuğoy Ğar baksunane ak'est'a. Morox ak'est'i möcüzoğo q'andırişala əyitmoğone təst'iğbaksa. Girke me hissinen bəzi amdarxoy İsusa hetər věbaksuna q'a İz bač'anexun taysuna, t'ı̌yə̌mit'oğoy isə Şot'ay əleyinə baki nu věbaksunane ak'est'a. 13-17-ci bulurxost'a isə İsusi biq'eśi biyəsin İz şagirdxoxun sagala baksuna q'a içoğoy hərtərəflu exləti baradane śamesa. İsusen xaça t'ə̌q't'esunaxun běš şagirdxo ük'e tast'a. Axırınci bulurxon isə İsusi biq'esuna, divanbaksuna, běyinbaksuna, běyinbakit'uxun oşal İz şagirdxo ak'esunane ak'est'a.
İoanen me girke boş Xrist'osi tərəfəxun amdarxo tadeğala həmişəluğ yəşəyinşi haq'suni yaq'ane ak'est'a. Me həmişəluğ yəşəyinş İsusi yaq'a, düzluğa, Şot'ay yəşəyinşə věbakala amdarxone tadesa. İoani Mǔq Xavari t'ı̌yə̌mi girkurxoxun c'ək'esun şone ki, İsusen İçu "xe", "šum", "çoban", "eğelxo", "c'ap' saal iz zoğurux" əyitmoğon İzi "Həmişə Bakalo" baksunane ak'est'a.
Girke boş bakalorox:
1:1-18 P'rolog: İsus - Buxačuğoy Əyite
1:19-51 İsusi q'ulluği burqesun: K'unuk'bal İoani şahidluğ saal İsusi samci şagirdxo
2:1-11:57 İsusen amdarxoynak' bi q'ulluğ
12:1-19:42 İsusi axırınci ğimxo
20:1-29 İsusi běyinbaksun saal amdarxoynak' ak'esun
20:30-31 İoani girke məksəd
21:1-25 Ep'ilog: Q'ončuğoy Galileyina p'ə̌mci kərəm ak'esun
1
Buxačuğoy Əyit Amdare baksa
1 Burqesunast'a Əyit buney. Əyit Buxačuğoxun sagalaney, Əyit Buxačuxey. 2 Şo burqesunast'a Buxačuğoxun sagalaney. 3 Hər şeya Şot'ine yaratmişi, yaranmişaki şeyurxoxun sal soğo Şosuz tene yaranmişaki. 4 Şo yəşəyinşi orayiney, me yəşəyinşal amdarxoy işiğey. 5 İşiğen bayinq'luğa s'alest'a, bayinq'luğen şot'o bəc'ürpes tene baki.
6 Buxačuğoy tərəfəxun yaq'abaki sa amdare hari, şot'ay s'i İoaney. * 1:6 Mat'. 3:1-2; Mrk'. 1:4; Luk'. 3:1-2 7 Şo şahidluğbseynak'e harey ki, işiği barada şahidluğbane, bütüm amdarxonal me şahidluğa ibaki vě bakat'un. 8 Şo iç işiğ teney, ama işiği barada şahidluğbseynak'e harey.
9 T'e işiğ seri işiğey, şo dünyəne harit'oğoy hər sunt'u işiğlune bsay. 10 Şo dünyəneney, dünyənə Şot'ine yaratmişi, ama dünyənen Şot'o tene çalxi. 11 Şo İzt'oğoy t'ǒğǒle hari, ama İzt'oğon İçu tet'un q'abulbi. 12 Ama Şot'in İçu q'abulbi İz s'iya věbakit'oğo bitova Buxačuğoy əylux baksuni ext'iyəre tadi. 13 Şorox nə sa amdari əsiləxun, nə bədəni nəəl insani çuresunen tet'un baki, ama Buxačuğoxunt'un baki.
14 Əyit Amdar baki beş aranene yəşəyinşi. Yan Şot'ay kalaluğa q'a zora ayank'i. Şot'in mot'oğo İz Bavaxun Şot'ay tək sa Ğar baksunene haq'i. İzi eysunen Şot'in yax ük' bok'ospsuni q'a het'ay seri baksunane ak'est'i.
15 İoanen Şot'ay barada şahidluğbi ost'aar pine: «"Zaxun oşa Eğalo zaxun üst'üne, şot'aynak' ki, zaxun běš buney" pi, İz barada bez exlətp'i Amdar mone». 16 Yan bitot'in Şot'ay bakalt'uxun hayanq'i, Şot'in İz ük' bok'ospsunen yax bol xeyir-bərəkəte tadi. 17 Buxačuğon İz k'anuna Moiseyaxune avabakest'i, ük' bok'ospsuna q'a seri bakala yaq'a ak'est'una isə İsus Xrist'osane tapşurbi. 18 Buxačuğo şuk'k'alen sal sa vədə tene ak'e, ama Bavay t'ǒğǒl bakala tək sa Ğaren Buxačuğo yax çalxesedi.
İoan Xrist'os tene
(Mat'. 3:1-12; Mrk'. 1:1-8; Luk'. 3:1-18)
19 İudeyxoy kalat'oğon İoanaxun "hun şunu?" pi xavar haq'seynak' Yerusalimaxun běyinšxo q'a leviğo şot'ay t'ǒğǒlt'un yaq'abi. T'e vədə İoanen şahidluğbi 20 düzə pi c'ap'tenebi, şot'in qay pine: «Zu Xrist'os tezu». 21 Şot'oğon İoanaxun xavart'un haq'i: «P'oy hun şunu? İlyanu?» İoanen "təə, şo tezu" pine. T'e vədə şot'oğon xavart'un haq'i: «Bərkə yan yaq'běğala xavareçalnu?» İoanen "təə" coğabe tadi. † 1:21 K'an. 18:15,18; Mal. 4:5 22 Şot'oxun saal xavart'un haq'i: «P'oy hun şunu? Yax yaq'abit'oğo k'ə coğab taden? Vi barada k'ən pes bakon?» 23 İoanen İsaya xavareçali pi əyitmoğone coğab tadi:
«"Q'ončuğoy yaq'a düzbanan" pi
ams'i oç̌ala bayanbalt'ay səszu». ‡ 1:23 İsa. 40:3
24 T'e vədə bəzi yaq'abaki fariseyxon 25 İoanaxun xavart'un haq'i: «P'oy hun Xrist'os, İlya nəəl yan yaq'běğala xavareçal tenusa, het'aynak'en xena badi k'unuk'bsa?» 26 İoanen şot'oğo coğabe tadi: «Zu xenenez k'unuk'bsa, ama ef arane və̌n nu çalxala sa Tano. 27 Şo zaxun oşa eğale. Zu Şot'ay sal torok'ali bağa şadbsunal tez lafst'a».
28 Me əşurxo İordan oqe t'e soğo tərəf - Bet'anyina, İoanen xena badi k'unuk'bala galane bakey.
K'unuk'bal İoani şahidluğbsun
29 Əyc'indəri İoanen İsusi şot'ay t'ǒğǒl eysuna ak'i pine: «Dünyəni günaxa İz loxol ext'ala Buxačuğoy Q'uzi mone! 30 "Zaxun oşa Eğalo zaxun üst'üne, şot'aynak' ki, zaxun běš buney" pi İz barada bez exlətp'i Amdar mone. 31 Zu Şot'o tez çalxsay, ama Şot'o İsraila çalxest'eynak'ez xenen k'unuk'bsa hari». 32 İoanen şahidluğbi pine: «Azk'i ki, Uruf göynuxun göyərçin k'inək' śiri Şot'ay loxole çurpi. 33 Zu Şot'o tez çalxsay, ama xenen k'unuk'bseynak' za Yaq'abit'in İçin za peney: "Uruf şi loxol śiri manst'una ak'ayin, Ǐvel Urufen k'unuk'balo§ 1:33 Ǐvel Urufen k'unuk'balo - yəni Ǐvel Urufen amdarxoy ük'ə təmizbalo Şone". 34 Zuval mot'o ak'i şahidluğezbsa ki, "Buxačuğoy Ğar mone"».
İsusi samci şagirdxo
35 Əyc'indəri İoan iz şagirdxoxun p'ǒğǒ iz t'ǒğǒl p'urum t'et'iya çurpeney. 36 Şot'in içoğoy t'ǒğǒlxun c'ovakala İsusa ak'i pine: «Běğanan, Buxačuğoy Q'uzi mone!»
37 Me p'ə̌ şagirdal şot'ay əyitə ibaki İsusi bač'anexunt'un taśi. 38 İsusen fırıpi İz bač'anexun eğalt'oğo ak'i şot'oğo pine: «Və̌x k'ə lazım?» Şot'oğon İsusa pit'un: «Ravvi, Hun mayan manst'a?» ("Ravvi" "Məəlim" upsune.) 39 İsusen şot'oğo pine: «Zaxun ekinan, ak'alnan». Şoroxal taśi İsusi maya manst'una at'unk'i, t'e ği vis'imci saadal śirik'əl * 1:39 vis'imci saad - həysət'in vədine berezəre saadin bip'. Şot'oxunt'un baki.
40 İoanaxun ibaki İsusi bač'anexun taśi p'ə̌ tanaxun soğo Simon P'et'eri viçi Andreyey. 41 Şot'in süft'ə taśi iz viçi Simona bə̌ğə̌bi şot'o pine: «Yan Xrist'osa bə̌ğə̌yanbi!» ("Xrist'os" "lə̌ə̌meśi, yəni c'ək'eśi amdar" upsune.) 42 Andreyen şot'o İsusi t'ǒğǒle taşeri. İsusen Simoni loxol běği pine: «Hun İoani ğar Simonnu, ama K'efa k'aleğalnu». (K'efa isə grek'i muzin P'et'er, yəni ǰe upsune.)
43 Əyc'indəri İsus Galileyina taysune çureśi. Şot'in Filip'a bə̌ğə̌bi şot'o pine: «Bezi bač'anexun eki». 44 Filip'al, Andrey q'a P'et'er k'inək' Bet'sayda şəhərexuney.
45 Filip'en Nat'anaila bə̌ğə̌bi şot'o pine: «Moiseyi k'anuna śameśi, xavareçalxonal pi Amdara bə̌ğə̌yanbi. Mo nazaret'lu İosifi ğar İsuse». 46 Nat'anailen şot'o pine: «Nazaret'axun şaat' sa şey c'eneğon ki?» Filip'en isə "eki, huncə ak'alnu" pine.
47 İsusen Nat'anaili İçuç eysuna ak'i şot'ay barada metəre pi: «Mo iz ük'e bic'luğ nu bakala əsil sa israillune». 48 Nat'anailen "Hun za k'ən çalxsa?" pi Şot'oxun xavare haq'i. İsusen şot'o coğabe tadi: «Filip'en va k'alk'alt'uxun běš va incilnə xodin oq'a ak'ezuy». 49 Nat'anailen Şot'o pine: «Ravvi, Buxačuğoy Ğar Hunnu, İsraili padçağ Hunnu!» 50 İsusen pine: «Bezi va incilnə xodin oq'a azk'i upsuna görən Za vě baki? Hun kot'oxunal kala şeyurxo ak'alnu». 51 Oşa p'urum şot'o pine: «Serina, serinaz və̌x nex: göye qayesuna saal Buxačuğoy angelxo Amdari Ğare t'ǒğǒl laśi-śiysuna ak'alnan». † 1:51 Burq. 28:12