Mark'en
śampi Mǔq Xavar
Běšin əyit
Me girkə śampi Mark'en süft'ə ap'ost'ol P'avelane İsusi Mǔq Xavara yəymişbsuna köməybey. Oşa isə şo Rima köçp'i miya İsusi c'ək'p'i p'as's'e şagirdaxun soğo bakala Pet'eraxune sagala əşbsa burqi. Axıri Q'ončux İsusen göynul ěqeğat'an İz şagirdxo dirist' dünyəne karoozbi Mǔq Xavara yəymişbsunane tapşurbey. P'et'eri Mark'eynak' İzi İsusaxun bakala vədine ak'it'oğo, t'e hadisoğo exlət'bsuni me girke bex c'eysunast'a gele köməye bake. Mark'en me girkə Rima, təxminən 57-60-ci usenxone śampe.
Mark'en śampi girk t'ı̌yə̌mi Mǔq Xavarxo běğat'an boxoy tene zap'e. Girke boş İsusi zombsuni barada bakala hadisoox t'ema gele tene, şot'aynak' ki, Mark'en gelo İsusi biq'i əşurxo q'a Şot'ay hər şeya amdar k'inək' hisbsunane ak'est'un çuresa. Şot'ay hələ İsaya xavareçalen pi "Buxačuğoy yaq'abi, me dünyəne əzyət zap'k'ala sa K'ul" baksunane ak'est'a.
Girk İsusi nanaxun baksunaxun təə, ama Şot'ay k'unuk'baksunaxune burqesa. Oşa Şeytanen Şot'o şinəyinşbsunaxun, mot'oxun oşa isə İsusen İz q'ulluğa burqsunaxune exlətesa. İsusen dirist' Galileyina tarapi Buxačuğoy Padçağluği baradane karoozbsa, ak'est'ala möcüzoğon İzi Buxačuğoy C'ək'p'iyo baksunane ak'est'a. Axırda İsus xaçane t'ə̌qt'esa, xib ği oşa isə p'uri ganuxun běyinebaksa. Axırınci bəndurxost'a İsusi İz şagirdxo ak'esuni q'a Şot'ay göynul ěqesuni baradane exlətesa.
İsus İzi saturběš avabakest'i k'inək'e bisa. Metər xavareçalxon piyorox bito hari bex p'anep'sa. Şo amdarxoy günaxa İz p'iyen os'kseynak' yaq'abaki sa Çark'est'al, Buxačuğon amdarxo əyit tadi sa Q'urbaney. Me Mǔq Xavara qabulbsunenal yan hələ me dünyəne Buxačuğoy Padçağluğa yaynak' ga həzirbiyan baksa.
Girke boş bakalorox:
1:1-13 İsusi eyseynak' həzirluğ
1:14-9:50 İsusi Galileyina bakala q'ulluğ
10:1-52 Galileyinaxun Yerusalima eysun
11:1-15:47 İsusi Yerusalima baki axırınci ğimxo
16:1-8 İsusi běyinbaksun
16:9-20 Běyinbaki Q'ončuğoy İzi şagirdxo ak'esun saal göynul ěqesun
1
K'unuk'bal İoani yaq' həzirbseynak' eysun
(Mat'. 2:1-12; Luk'. 3:1-18; İoan. 1:19-28)
1 Buxačuğoy Ğar İsus Xrist'osiMǔq Xavar metəre burqesa.
2 Xavareçal İsayay girke boş śameśi k'inək':
«Mone, Vaxun běš Bez elçinaz yaq'absa.
Şot'in Vi yaq'a həzirbale». *1:2 Mal. 3:1
3 «Çöle car sak'alt'ay səse eysa:
"Q'ončuğoy yaq'a həzirbanan,
Şot'ay c'ovakala ganxo düzbanan"». †1:3 İsa. 40:3
4 Śameśi k'inək'əl, K'unuk'bal İoan meydane c'eri amdarxo içoğoy günaxxoy bağışlayinşakseynak' toobabsuna, mot'ay nišan k'inək'əl k'unuk'baksunane çöle karoozbsay. 5 Bütüm İudeyin oç̌ala bakalorox saal Yerusalima yəşəyinşala amdarxo şot'ay t'ǒğǒlt'un eysay. Şot'oğon içoğoy günaxxo ozanet'un exst'ay, İoanenal şot'oğo İordan oqe boş k'unuk'ebsay.
6 İoanen buşe xayaxun paltare layey, iz bǐyex t'olaxun q'ayinşe ğaç̌ey. Çərtk'ən saal cir uč'e uksay. ‡1:6 2 Padç. 1:8
7 Şot'in metəre karoozbsay: «Zaxun oşa zaxun gele Zorbone eysa. Zu sal k'os'baki Şot'ay torok'ali bağa şadbsuna layiğ tezu. 8 Zu və̌x xenenez k'unuk'bsa, ama Şot'in və̌x Ǐvel Urufen k'unuk'bale».
İsusi k'unuk'baksun saal sinəyinşaksun
(Mat'. 3:13-4:11; Luk'. 3:21-22; 4:1-13)
9 T'e ğimxo İsus Galileya oç̌ali Nazaret' şəhərexun hare. İoanenal Şot'o İordan oqe boş k'unuk'ebi. 10 İsus xenaxun c'eğat'an hat'e saad göyurxoy qayesuna saal Urufi göyərçin k'inək' İz loxol śiysunane ak'i. 11 Göynuxun sa səse hari: «Hun Bez gele çureğala Ğarnu, Vaxun irəzizu». §1:11 Ǐvel mə̌ğ. 2:7; İsa. 42:1; Mat'. 3:17; 12:18; Mrk'. 9:7; Luk'. 3:21-22
12 Mot'o uk'ala k'inək' Urufen Şot'o çölene zapi taşeri. 13 Şo çöle q'ırx ği manedi. Me q'ırx ğinast'a Şeytanen Şot'o sinəyinşebi, Şot'o ə̌qnə heyvanxoy aranene efi. Angelxon isə Şot'o q'ulluğt'unbsay.
İsusi İz q'ulluğa burqsun
(Mat'. 4:12-17; Luk'. 4:14-15)
14 İoan biq'eśit'uxun oşa İsusen Galileyina hari Buxačuğoy Mǔq Xavaranekaroozbsay. 15 Şot'in nexey: «Vaxt' ene p'ap'ene, Buxačuğoy padçağluğ ı̌šabakene. Toobabanan, Mǔq Xavara věbakanan!» *1:15 Mat'. 3:1-2
Samci şagirdxo
(Mat'. 4:18-22; Luk'. 5:1-11)
16 İsus Galileya göle t'ǒğen c'ovakat'an xena tor bosala Simona q'a iz viçi Andreyane ak'i. Me amdarxo çəlibiq'alxoney. 17 İsusen şot'oğo pine: «Bez bač'anexun ekinan, Zu və̌x amdar biq'ala çəlibiq'alxo booz». 18 Şot'oğon hat'e saad torurxo boseri Şot'ay bač'anexunt'un taśi. 19 İsus samal běš taśi Zavday ğar İak'ova q'a şot'ay viçi İoanane ak'i. Şot'oğon lodk'in boş arśi torurxot'un yamaluq'bsay. 20 İsusen hat'e saad şot'oğo k'alepi. Şot'oğonal içoğoy bava Zavdaya əyiteśi əşp'alxoxun lodk'ina efi Şot'ay bač'anexunt'un taśi.
İsusi amdaraxun murdar urufa c'evksun
(Luk'. 4:31-37)
21 Şorox K'efernaumat'un hari. Şamat' ği eğat'an İsusen sinagoga baśi zombsane burqi. 22 Şot'ay zombsuna bütüm məət't'əlt'un manst'ay, şot'aynak' ki, şot'oğo k'anun zombalxo k'inək' təə, Buxačuğon ext'iyər tadi sa amdar k'inək'e zombsay. †1:22 Mat'. 7:28-29 23 Hame vədə me sinagoga içust'a murdar uruf bakala sa amdare baśi. 24 Murdar urufen harayepi: «Ay nazaret'lu İsus, yaxun k'ən çuresa? Yax əfçibseynak'en hare? Zu avazu Hun Şunu! Hun - Buxačuğoy Ǐvelonu!» 25 Ama İsusen murdar urufa əmirebi: «Şip' çurpa, me amdaraxunal c'eki!» 26 Murdar urufen me amdara ǰǐk'p'i ost'aar haraypsun şot'oxun c'ere. 27 Bütüm q'ı̌ya baft'i sun-sunaxun xavart'un haq'i: «Mo hik'ə? Maninesa təzə sa zombsune! İz ext'iyərəl t'etəre ki, murdar urufxo əmirebsa, şoroxal İçu tabit'unbaksa».
28 İsusi barada bakala exlət Galileya oç̌ali hər tərəf usum yəymişaksane burqi.
İsusi gele amdarxo q'olaybsun
(Mat'. 8:14-17; Luk'. 4:38-41)
29 Şo sinagogaxun c'eğala k'inək' İak'ovaxun q'a İoanaxun sagala Simoni q'a Andreyi k'oyane taśi. 30 Şorox t'iya bağat'an avat'unbaki ki, Simoni q'aynako q'ızdırmin boş bask'ene. 31 İsusen şot'ay t'ǒğǒl taśi iz kulaxun biq'i alanebi, çuğoy q'ızdırmal hat'e saad śire. Çuğon şot'oğo q'ulluğbsane burqi.
32 Biyəsin běğ batk'it'uxun oşa bütüm azariğo saal içoğoy boş murdar uruf bakalxo İsusi t'ǒğǒlt'un eçeri. 33 Bütüm şəhəri amdarxo ç̌omoy t'ǒğǒlt'un gireśi. 34 Şot'in cürbəcür azar baft'i gele amdarxone q'olaybi, gele murdar urufxone şəp'eśi. Ama murdar urufxo əyitpsuna icaza tene tadi, şot'aynak' ki, şot'oğon İsusi Şu baksuna avat'uniy.
İsusi İz q'ulluğa davambsun
(Luk'. 4:42-44)
35 Savaxt'an üşenen hələ işiğ bitinut' İsus hayzeri k'oyaxun c'ere, Şo amdar nu bakala sa gala taśi t'et'iya afırınepi. 36 Simonen q'a iz t'ǒǒx bakalt'oğon isə İsusa qə̌vesat'un burqi. 37 Şot'o bə̌ğə̌bi pit'un: «Bitot'in Vane qə̌vesa». 38 İsusen şot'oğo pine: «Ekinan q'erəz ganxo - hərrəmine bakala ayizmoğo tağen, t'et'iyal karoozbaz, şot'aynak' ki, Zu mot'aynak'ez hare».
39 Hametər, İsusen taśi bütüm Galileyina, t'iya bakala sinagogxokaroozebsay, murdar urufxone şəp'esay. ‡1:39 Mat'. 4:23; 9:35
İsusi cuzam azara baft'i amdara q'olaybsun
(Mat'. 8:1-4; Luk'. 5:12-16)
40 Sa ği cuzam azara baft'i §1:40 cuzam azara baft'i - iz bədən yara baft'i. Me azari s'i - cuzamey. sa amdaren İsusi t'ǒğǒl hari İz běš çökt'i xoyinšebi: «Axıri Hun çureğayin za təmizbes bankon». 41 İsusi şot'o goroxe hari. İz kula boxodi şot'ay loxol laxi pine: «Çurezsa, təmizbaka!» 42 Mot'o uk'ala k'inək' t'e amdar cuzamaxun təmizbaki q'olayebaki. 43 İsusen hat'e saad şot'o yaq'abadi 44 möhk'əm tapşurebi: «Běğa, me barada şuk'k'ala sa əyit ma upa, ama taki va běyinšen běğěq'an. Mot'o bitot'in ak'seynak'al vi cuzamaxun təmiz baksuna görə Moiseyen bürmişi q'urbanxo eça». *1:44 Lev. 14:1-32
45 Ama t'e amdaren c'eri me bakit'oğo bitot'aynak' exlətp'i hər gala yəymişebi. Şot'aynak'al İsus ene şəhəre qay bayes tene baksay. Şo şəhərexun t'ǒǒx, şuk'k'al nu bakala galane manst'ay, amdarxo isə hər tərəfəxun İz t'ǒğǒlt'un eysay.
*1:2 1:2 Mal. 3:1
†1:3 1:3 İsa. 40:3
‡1:6 1:6 2 Padç. 1:8
§1:11 1:11 Ǐvel mə̌ğ. 2:7; İsa. 42:1; Mat'. 3:17; 12:18; Mrk'. 9:7; Luk'. 3:21-22
*1:15 1:15 Mat'. 3:1-2
†1:22 1:22 Mat'. 7:28-29
‡1:39 1:39 Mat'. 4:23; 9:35
§1:40 1:40 cuzam azara baft'i - iz bədən yara baft'i. Me azari s'i - cuzamey.
*1:44 1:44 Lev. 14:1-32