1 Bez ğar, bezi əyitmoğo q'orişa,

Bezi əmirxo vast'a efa.

2 Bezi əmirxo efayin, yəşəyinşalnu;

Bezi zombalt'oğo vi piin işiğ k'inək' q'orişa.

3 Şot'oğo boğoç̌al k'inək' vi k'əşine lavk'a,

Vi ük'e loxol śampa.

4 Müdrikluğa vi xunçi,

Q'amişaksuna vi dost' hesabba.

5 Şot'oğon va tarak'ala çuğoxun,

Muč'a muzin bakala q'ert'ay çuğoxune q'orişon.

6 Sa ği bezi k'ojin ayninaxun

Qavunaz běğsay.

7 Azk'i ki, sa dəst'ə cəyilxoy arane,

Q'ammaz sa cəyile bu.

8 Şo tarak'ala çuğoy k'oja ı̌ša küçinene c'ovaksay,

Şot'ay k'oj bakala yaq'ene taysay.

9 Vaxsızey, běğ batk'eney,

Ene biyə bakeney.

10 Me çuuxal tarak'ala çuux k'inək' lapi, iz ük' əfçinen buy

Kap şot'ay běše c'eri.

11 (Şo hay-küy sakale, hayasuze,

İz k'oya nu arśalone.

12 Gəh küçinə, gəh meydanxone c'eysa,

Hər dönbine sa busq'une biq'sa.)

13 Şot'in ğara biq'i muçepi,

Ot'p'inut' metəre pi:

14 «Bezi elasa əməlbi

Ğe serluği q'urbanez šampe,

K'oyal yeq' bune pi

15 Va akseynak' vi běšez c'eri,

Va gelez qə̌věśi, axır ki, bə̌ğə̌zbi.

16 Bezi döşəyə Misiri kətanaxun ěbeśi,

Śampi ç̌oz zap'e.

17 Bezi yorğan-döşəyə

Mirra, aloye, darçinez *7:17 Mirra, aloye, darçin - Şaat' adeğala şeyurxo duğe.

18 Eki kəybakamin suna çureğen,

Çuresunaxun ləzət haq'en.

19 Bezi işq'ar k'oya tene,

Ə̌xil galane taśe.

20 Təngin kisinəl ext'ene,

K'oya xaş kalabakamin tene qaybakal».

21 Fəndurxo əşp'est'i şot'o toolayinşebi,

İz muč'a muzin şot'o yaq'axun c'evek'i.

22 Me ğaral hat'e saad t'e çuğoy bač'anexun bafedi,

Šamseynak' taşala arak'en,

Təlinə baft'ala maralen

23 Axırda iz ciyərə sa ox t'ə̌q'esuna nu avabakala k'inək',

Purpi usum tora baft'ala sa q'uşen

İz elmux haq'esuna nu avabakala k'inək'.

24 İsə, ay bezi ğarmux, za ǔmǔxlaxanan,

Bezi ǰomoxun c'eğala əyitmoğo ibakanan,

25 Ma bartanan ef ük' metər sa çuğoç fırık'ane,

Şot'ay yaq'en tağane.

26 Şot'aynak' ki, şot'in gele amdare əfçibe,

Gele amdare besp'e,

27 İz k'oj gərəmzinə taşala yaq'e,

Axırınci mənziləne taşt'a.