6
6-ci Ǐvel mə̌ğ
Mə̌ğk'alxoy dəst'in kalat'aynak'. Şeminit'en *6:0 - Me əyit həysə əştenesa, şot'o görəl şot'ay k'ə upsuna lap alimxonal avatet'un. Bakes banekon mo muğ simlə sa ət't'əci s'i, nəəl fare sa yöne. farpi mə̌ğěğala Davidi Ǐvel mə̌ğ.
1 Ay Q'ončux, Vi əcuğ bəc'ük'eğat'an za töhmətmaba,
Vi hirsen biq'at'an za caza ma tada!
2 Za gorox eki, ay Q'ončux, zast'a ene zor tene mande!
Za q'olayba, ay Q'ončux, bez elmoğost'a ene hal tene mande,
3 Ük'eyal q'ı̌ baft'ene bezi,
Mot'in hələ heq'ədər zap'k'ale, ay Q'ončux?
4 Za gorox eki! Za bisunaxun efa,
Vi nu badalbakala çuresuna görə za çark'est'a!
5 Axıri p'urit'uxun oşa hetərez Va eyex badon?
T'e oç̌alin oq'a taśit'uxun oşa hetərez Vi s'iya alabon?
6 Zast'a hal tene mande,
Hər şü ǒnepsunaxun bez ber xene boşe baksa.
Bez piin neğen bez döşəyəne şəyinbsa.
7 Dərdəxun bez pulmuxe bayinq'baki,
Düşmənxon bez pulane k'ač'ibi.
8 Zaxun ə̌xilbakanan, ay pis amdarxo, †6:8 Mat'. 7:23; Luk'. 13:27
Q'ončuğon bez ǒnena ene inebaki!
9 Bezi xoyinš p'anep'i Q'ončuğo,
Q'ončuğon bezi haraya coğabsuz tene efi!
10 Bez düşmənxo q'ı̌yen haq'ale, biyabur bakalt'un şorox!
Xəcələti boş ç̌omə̌yin qaybaki qoş t'it'alt'un şorox!