1 Oç̌al q'a me oç̌ali loxol bakalorox,

Dünyə q'a me dünyəne yəşəyinşalorox -

Morox bito Q'ončuğoye.

2 Şot'ine oç̌ali binorina dənizxoy loxol laxi,

Şot'ine dünyəni binorina xeyurxoy loxol alabi ost'aarbi.

3 Şuva Q'ončuğoy buruğo lağalo?

Şuva Şot'ay ı̌vel gala çurpes bakalo?

4 Mo iz əməlxo q'a ük' təmiz bakalo,

Ams'i şeyurxo bul nu k'os'balo,

Əfçidən nu elask'alone.

5 Metər amdaraxun Q'ončuğon İz xeyir-bərəkətə kamtenebal,

Metər amdarast'a iz Buxačux bakala Çark'est'alen taxsır tene ak'al.

6 Mone, Va qə̌věğala azuk' metəre,

Va bul k'os'bsa eğalorox metəre, ay İak'ovi Buxačux!

7 Ay ı̌vel gane darvazoox, ef bağala ganu gengbanan,

Ay damna ç̌omxo, qayekinan!

Mone, s'ila Padçağe eysa, bona bağale!

8 Şuva me s'ila Padçağ?

Zorba, bitova başarbala Q'ončux!

Davoğo taşala Q'ončux!

9 Ay ı̌vel gane darvazoox, ef bağala ganu gengbanan,

Ay damna ç̌omxo, qayekinan!

Mone, s'ila Padçağe eysa, bona bağale!

10 Şuva me s'ila Padçağ?

Q'oşuniQ'ončux,

Şone s'ila Padçağ!