1 Ay Q'ončux, Vaz k'ale,

Za q'orişalo Hunnu, za coğabsuz ma efa.

Vaxun coğab nu ibakat'an

Meyid k'inək'ez baksa zu.

2 Va xoyinšp'at'an,

Bez ç̌oya Vi ı̌vel k'ojaç biq'i afırık'at'an za ibaka.

3 Za pist'oğoxun, şər əş biq'alt'oğoxun sagala əfçimaba,

Ç̌oyel muč'a əyitp'i, ama içoğoy ük' pisluğen buy bakalt'oğoxun sa ma biq'a.

4 Şot'oğoy cazina içoğoy əməlxo görə,

İçoğoy biq'i pis əşurxo görə tada.

Şot'oğoy cazina içoğoy kiin biq'i əşurxo görə bot'a,

Ləəğa bada şot'oğoy. *28:4 Qay. əyit 22:12

5 Şot'oğon Q'ončuğoy biq'i əşurxo hik'k'alt'unbsa,

Şot'ay kiyexun c'eri əşurxoy kalaluğa tet'un aksa.

Q'ončuğonal şot'oğo tumexun əfçibale,

İçoğoy bula alabsuna imkan tene tadal ene.

6 Q'ončuğo alxışq'an baki,

Bez xoyinša inebaki Şot'in!

7 Za zor tadalo, za q'orişalo Q'ončuxe,

Şot'oz umudbaksa, bez ük'ə buz k'inək'ez efsa zu.

Za kul boxodi bezi ük'əne mǔqt'i Şot'in,

Şot'ay s'iya alabala mə̌ğur mə̌ğk'oz zu.

8 Q'ončuxe İzi azuk'a zor tadalo,

İzi c'ək'p'it'aynak' bač'an baki şot'o çark'est'alo.

9 Çark'esun eça Vi azuk'eynak',

Vaynak' c'ək'p'it'oğoxun Vi xeyir-bərəkətə kammaba!

Şot'oğoynak' izi sürünə q'orişala sa çoban baka,

Şot'oğo həmişə q'orişa!