54
54-ci Ǐvel mə̌ğ
Fark'alxoy dəst'in kalat'aynak'. Simlə ət't'əcxoy faren mə̌ğěğala Davidi ögüd-nəsyət tadala Ǐvel mə̌ğ.
Zifluğon hari Şaula "David beşi şəhərene c'ap'baksa" pit'uxun oşa śameśi Ǐvel mə̌ğ. *54:0 1 Şam. 23:19-28; 26:1-2
1 Ay Buxačux, Vi şu baksuna ak'est'i za çark'est'a,
Bezi taxsırsuz baksuna Vi kiin c'evk'a ç̌oyel!
2 Bezi afırına ibaka,
Bezi Va k'alpsuna coğabsuz ma efa, ay Buxačux!
3 Mone, buxačuxsuzorox bez loxolt'un ěqesa,
Bespsunt'un çuresa za me zalımxon!
Buxačuğo nu çalxaloroxe şorox!
4 Ama avazu, Buxačuğon za tək tene bare,
Zaynak' bač'an bakalone Q'ončux!
5 Bez düşmənxoy pis əməlxo qaydi içoğoy bel śik'ale Şot'in,
İz tadi əyiti loxol çurpi əfçibale şot'oğo!
6 Bez ük'exun Vaynak' q'urban eşt'un c'ovakale, ay Q'ončux!
Vi s'iya, Vi t'e gözəl s'iya alaboz zu!
7 Bez bel eğala bəloğoxunen çark'est'i za Hun,
Bez düşmənxoy biti ç̌axç̌uxesunan ak'est'i za!