61
61-ci Ǐvel mə̌ğ
Mə̌ğk'alxoy dəst'in kalat'aynak'. Simlə ət't'əcxoy faren mə̌ğěğala Davidi Ǐvel mə̌ğ.
1 Ay Buxačux, bez şivana ibaka,
Bez afırına coğabsuz ma efa.
2 Dünyəni ošelxunez k'ale Va,
Umuda bot'ezu ene zu.
Hun za kul nu p'ap'ala sa q'ayana taşa,
3 Şot'aynak' ki, Hunnu bezi umudi ga,
Düşmənəxun za efala ost'aar q'ala.
4 Barta həmişəluğ Vi ı̌vel çadıra yəşəyinşaz,
Vi q'ənədxoy oq'a zaynak' gabes bakaz.
5 Bez tadi elasxon ibaki Hun, ay Buxačux,
Va çalxalt'oğoynak' həzirbi payaxunen za q'ısmatbi.
6 Padçaği ömürə boxoyba Hun,
Barta şot'ay padçağluğ nəsiləxun nəsilə c'ovaki ost'aarq'an baki.
7 Barta Vi piyes şaat' ak'eśi həmişəluğq'an arśi iz taxt'e loxol,
Barta Vi nu badalbakala çuresunen q'a şaat'luğen şot'o q'orişi efeq'an.
8 T'e vədə zu həmişə Vi s'iya alabala mə̌ğur mə̌ğk'oz,
Bez tadi əyiti loxol çurpi hər ği q'urbanxo šamk'oz!